యూట్యూబ్​లో సరికొత్త ఫీచర్​- కంటెంట్ ఖండాలు దాటేలా.. వారిపై ఇక కాసుల వర్షమే!

కంటెంట్ క్రియేటర్లకు గుడ్​న్యూస్- యూట్యూబ్​లో 'ఆటో డబ్బింగ్' ఫీచర్- ఎలా ఉపయోగించాలంటే..?

YouTube Auto Dubbing Feature: కంటెంట్ క్రియేటర్లకు గుడ్​న్యూస్. ప్రముఖ వీడియో స్ట్రీమింగ్‌ ప్లాట్‌ఫామ్‌ యూట్యూబ్‌ ఏఐ ద్వారా పనిచేసే సరికొత్త ఫీచర్​ను తీసుకొచ్చింది. దీనిసాయంతో ఇకపై సినిమాలే కాదు, భాష రాకపోయినా ఇకపై యూట్యూబ్ వీడియోలను ఖండాంతరాలను దాటించొచ్చు. అంటే మీ యూట్యూబ్ ఛానెల్​లోని కంటెంట్​ను విదేశాల్లోని వారికీ తమ భాషల్లో వినిపించొచ్చు.

ఇందుకోసం మీకు ఆ భాష రావాల్సిన పనిలేదు. యూట్యూబ్ 'ఆటో డబ్బింగ్' పేరుతో తీసుకొచ్చిన ఈ ఫీచర్.. మీ వీడియోల్లోని వాయిస్​ను ఆటోమేటిక్​గా డబ్​ చేసి వేర్వేరు భాషల్లోకి ట్రాన్స్​లేట్ చేసి వినిపిస్తుంది. దీంతో కంటెంట్‌ క్రియేటర్లు ఇకపై ఎలాంటి ఇబ్బందులూ లేకుండా తమ వీడియోను ఇతర భాషల్లో అప్​లోడ్ చేసుకోవచ్చు. ఈ ఫీచర్‌ స్లైడ్స్‌, వీడియో బిట్స్‌తో కంటెంట్‌ ఇచ్చేవారికి మరింత ఉపయోగపడుతుందని నిపుణులు అభిప్రాయపడుతున్నారు.

ఈ ఫీచర్​ను ఉపయోగించడం ఎలా?:

• ఇందుకోసం యూట్యూబ్​లోని మీ ఛానెల్​లో ఎప్పటిలాగే మీ వీడియోలను అప్‌లోడ్ చేయండి. యూట్యూబ్​ ఈ ఆటో డబ్బింగ్ ఫీచర్​ సహాయంతో భాషను గుర్తించి, అది సపోర్ట్‌ చేసే ఇతర భాషల్లోకి ఆటోమేటిక్​గా వీడియోలోని వాయిస్​ను డబ్ చేస్తుంది.
• ఆ తర్వాత మీ డబ్బింగ్ వీడియోలను చూసేందుకు 'YouTube Studio'లోని 'Languages' సెక్షన్​కు వెళ్లండి. అందులో ఇతర భాషల్లోకి డబ్​ అయిన మీ వీడియోలు ఉంటాయి. అవి మీకు నచ్చకపోతే వాటిని అన్​పబ్లిష్ లేదా డిలీట్ చేసేయొచ్చు.
• అంతేకాక డబ్​ అయిన కంటెంట్​ను ఫైనల్​గా అప్​లోడ్ చేయడానికి ముందు రివ్యూ కూడా చేసుకోవచ్చు.

ఏ భాషలోకి అయినా మార్చుకోవచ్చా?:

• యూట్యూబ్ ప్రాథమికంగా ఈ ఫీచర్​ను ఇంగ్లిష్​లోని వీడియో కంటెంట్‌ను ఫ్రెంచ్, జర్మన్, హిందీ, ఇండోనేషియన్, ఇటాలియన్, జపనీస్, పోర్చుగీస్, స్పానిష్ భాషల్లోకి ఆటోమేటిక్​గా డబ్ చేసేలా తీసుకొచ్చింది.
• వీడియోలోని వాయిస్ పైన తెలిపిన ఏ లాంగ్వెజ్​లో ఉన్నా అది ముందుగా ఇంగ్లిష్​లోకి మారిపోతుంది.
• ఉదాహరణకు మీరు హిందీలో వీడియోను క్రియేట్ చేస్తే అది ఆటోమేటిక్​గా ఇంగ్లిష్​లోకి మారిపోతుంది.
• ఇలా ఆడియో డబ్ చేసిన వీడియోలపై 'auto-dubbed' అనే లేబుల్ యూజర్లకు కన్పిస్తుంది.
• ఒకవేళ వినియోదారులకు యూట్యూబ్‌ ఏఐ డబ్‌ చేసిన వాయిస్‌ వద్దనుకుంటే 'track selector' ఆప్షన్​ ఉపయోగించి ఒరిజినల్ వాయిస్​ను వినొచ్చు.
• యూట్యూబ్​లో కంటెంట్​ క్రియేటర్లు ఏ లాంగ్వెజ్​లోకి డబ్​ చేసేందుకు ఎక్కువ ప్రాధాన్యతను ఇస్తున్నారో ఈ ప్లాట్​ఫారమ్ నోట్ చేసుకుంటుంది.
• అయితే ఈ ఫీచర్​ కొన్ని సందర్భాల్లో పనిచేయదని యూట్యూబ్ స్పష్టం చేసింది.

ఏ సందర్భాల్లో ఈ ఫీచర్ పనిచేయదంటే?:

• కంటెంట్ క్రియేటర్లు అప్​లోడ్ చేసిన వీడియోల్లో వాయిస్​ను గుర్తించని సందర్భంలో ఇది పనిచేయదని యూట్యూబ్ వెల్లడించింది.
• ఒకవేళ ఈ డబ్బింగ్‌ ఆప్షన్‌ వినియోగించుకోవాలంటే మాత్రం కంటెంట్ యూజర్లు అప్లోడ్​ చేసిన వాయిస్‌ క్లారిటీగా ఉండడంతోపాటు రికార్డింగ్‌ సమయంలో ఎలాంటి అవాంతరాలు లేకుండా జాగ్రత్తపడడం మంచిది.
• ఈ ఫీచర్​ సాయంతో ఇప్పటివరకు ఇంగ్లిష్‌ కంటెంట్‌ను అప్‌లోడ్‌ చేసే రిజినల్‌ కంటెంట్‌ క్రియేటర్ల సంపాదన పెరగబోతుందని నిపుణులు అంటున్నారు.
• కంటెంట్‌ క్రియేటర్ల నుంచి వచ్చిన ఫీడ్‌బ్యాక్‌ ఆధారంగా ఈ ఫీచర్​లో మరిన్ని మార్పులు చేయనున్నట్లు యూట్యూబ్ తెలిపింది.