వాట్సాప్​ నయా వీడియో కాల్​ ఫీచర్స్​​ - స్క్రీన్​​ షేరింగ్, స్పీకర్ స్పాట్​లైట్​ - గూగుల్​ మీట్​, జూమ్​లకు పోటీగా! - WhatsApp Video Call Features

WhatsApp Video Call Features : యూజర్లను సంతృప్తి పరచేందుకు వాట్సాప్ ఎప్పటికప్పుడు కొత్తకొత్త అప్డేట్స్ తెస్తూనే ఉంటుంది. తాజాగా గూగుల్ మీట్​, జూమ్​లకు పోటీగా వీడియో కాలింగ్​లో 3 సరికొత్త ఫీచర్లను తీసుకురావడానికి సన్నాహాలు చేస్తోంది. పూర్తి వివరాలు మీ కోసం.

WhatsApp Video Call Features : ఇప్పుడు వాట్సాప్ ప్రజల జీవితాల్లో ముఖ్య భాగం అయిపోయింది. వాట్సప్ కాలింగ్‌ ఫీచర్​ను ప్రవేశపెట్టిన తరువాత కమ్యూనికేషన్ వ్యవస్థలో పెద్ద మార్పే వచ్చింది. ఇప్పటికీ వాయిస్ కాల్స్, వీడియో కాల్స్​కు సంబంధించి వాట్సప్ కొత్త కొత్త ఫీచర్స్​ను తీసుకువస్తూనే ఉంది. ఇప్పుడు గూగుల్ మీట్​, జూమ్​లకు పోటీగా వీడియో కాలింగ్​లో 3 సరికొత్త ఫీచర్లను తీసుకురావడానికి సన్నాహాలు చేస్తోంది.

స్క్రీన్ షేరింగ్ :
వాట్సాప్ కాల్​లోనే స్క్రీన్ షేరింగ్ చేసుకొనేలా వాట్సాప్​ అప్డేట్ తీసుకువస్తోంది. ప్రస్తుతానికి ఇది బీటా టెస్టర్లకు మాత్రమే అందుబాటులో ఉంది. గూగూల్ మీట్​, జూమ్​లకు పోటీగా వాట్సాప్​ ఈ ఫీచర్​ను అందుబాటులోకి తెస్తోంది. ఈ స్క్రీన్ షేరింగ్ ఫీచర్​తో, మీరు వీడియో కాల్ కొనసాగిస్తూనే సినిమాలను, లేదా వీడియో కంటెంట్​ను మీ మిత్రులకు, కుటుంబ సభ్యులకు షేర్ చేయడానికి వీలవుతుంది.

గ్రూప్ వీడియో కాల్
వాట్సాప్​ ఇప్పుడు గ్రూప్​ వీడియో కాల్‌లో కూడా గణనీయమైన అప్​డేట్​ను తీసుకువచ్చింది. ఈ ఫీచర్​తో గ్రూప్ వీడియో కాల్​లో ఒకేసారి 32 మందితో మాట్లాడవచ్చు. సింపుల్​గా చెప్పాలి అంటే మీరు ఇప్పుడు డెస్క్‌టాప్​తో పని లేకుండా ఒకే వీడియో కాల్‌లో ఎక్కువ మంది స్నేహితులు, కుటుంబ సభ్యులు లేదా సహోద్యోగులతో సమావేశం కావచ్చు.

స్పీకర్ స్పాట్‌లైట్ :
గ్రూప్ కాల్​లో ఎక్కువ మంది ఉన్నప్పుడు ఎవరు మాట్లాడుతున్నారో తెలుసుకోవటం కష్టం. కానీ త్వరలో ప్రవేశపెడుతున్న 'స్పీకర్ స్పాట్‌లైట్' ఫీచర్‌ వల్ల, మాట్లాడుతున్న వ్యక్తి ఆటోమేటిక్‌గా హైలైట్ అయ్యి, స్క్రీన్‌పై మొదట కనిపిస్తాడు. దీంతో ఎలాంటి కన్ఫ్యూజన్ లేకుండా, అందరూ సులువుగా మాట్లాడే వ్యక్తిని గుర్తించవచ్చు.

వీటితో పాటూ వాట్సప్ MLow అనే కొత్త కోడెక్‌ ద్వారా, ఓల్డ్ డివైజెస్ లేదా వీక్ నెట్‌వర్క్ సిగ్నల్స్ ఉన్న ప్రాంతాలలో వాట్సప్ కాల్ క్వాలిటీని ఇంప్రూవ్​ చేయనుంది. దీనితో వాట్సప్ కాల్​లో బయట నుంచి వచ్చే నాయిస్​ పూర్తిగా తొలగిపోయి, స్పష్టమైన వాయిస్ వినిపిస్తుంది.

ట్రాన్స్​క్రిప్షన్​
వాట్సాప్‌ వినియోగదారులు వారి వాయిస్ మెసేజ్‌లను నేరుగా టెక్ట్స్‌ మెసేజ్‌లుగా మార్చే కొత్త ఫీచర్​పై కూడా కసరత్తులు జరుగుతున్నట్టు టెక్ వర్గాలు చెబుతున్నాయి. ఈ ఫీచర్‌ను మొదట ఐఫోన్‌లో అందుబాటులోకి తీసుకువచ్చి, తర్వాత అండ్రాయిడ్‌ ఫోన్లకు కూడా విస్తరించనున్నారు. ఈ ట్రాన్స్‌క్రిప్షన్ ఫీచర్‌ను వినియోగించుకోవాలనే వినియోగదారులు, అదనంగా 150MB డేటా కలిగిన యాప్‌ను డౌన్‌లోడ్ చేసుకోవాల్సి ఉంటుంది. వాయిస్‌ మెసేజ్‌ చేయడం సాధ్యం కాని సందర్భాల్లో ఈ ట్రాన్స్‌క్రిప్షన్‌ ఫీచర్ వినియోగదారులకు ప్రత్యేకంగా ఉపయోగపడుతుంది. ఈ ట్రాన్స్‌క్రిప్షన్‌లో హిందీ, ఇంగ్లీష్, రష్యన్, పోర్చుగీస్, బ్రెజిల్‌, స్పానిష్‌ సహా మనకు ఇష్టం వచ్చిన భాషను ఎంపిక చేసుకుని మెసేజ్‌ చేసే అవకాశం ఉంటుంది.