నాకు ప్రాణహాని ఉంది - సైబరాబాద్​ పోలీసులకు వైఎస్​ సునీత ఫిర్యాదు

YS Sunitha Complaint to Cyberabad Police: వైఎస్ వివేకా కుమార్తె సునీత ఫిర్యాదు చేశారని సైబరాబాద్ సైబర్ క్రైమ్ డీసీపీ శిల్పవల్లి తెలిపారు. చంపేస్తామంటూ ఇటీవల కొందరు వ్యక్తులు ఫేస్ బుక్​లో పోస్టులు పెట్టినట్లు చెప్పారన్నారు. సునీత ఫిర్యాదు మేరకు, విచారణ జరుపుతామని డీసీపీ వెల్లడించారు.

YS Sunitha Complaint to Cyberabad Police : తనకు ప్రాణహాని ఉందని వైఎస్ సునీత ఫిర్యాదు చేశారని సైబరాబాద్ సైబర్ క్రైం డీసీపీ శిల్పవల్లి వెల్లడించారు. ఇటీవలి కొంత కాలం నుంచి కొందరు వ్యక్తులు ఫేస్‌బుక్​లో చంపుతామంటూ పోస్టులు పెడుతున్నారని వారిపై తగిన చర్యలు తీసుకోవాలని సునీత ఫిర్యాదులో పేర్కొన్నారని డీసీపీ తెలిపారు. చంపేస్తామని అర్థం వచ్చే విధంగా ఆ పోస్టులు ఉన్నాయని ఆమె ఫిర్యాదు చేశారని డీసీపీ తెలిపారు. ఈ తరహా బెదిరింపులు ఎక్కువవుతున్నాయని, చర్యలు తీసుకోవాలని వైఎస్‌ సునీత ఫిర్యాదులో కోరినట్లు శిల్పవల్లి వివరించారు.

కాగా ఇటీవల వైఎస్ సునీత (YS Sunitha) ఇడుపులపాయలో కాంగ్రెస్ పార్టీ రాష్ట్ర అధ్యక్షురాలు వైఎస్ షర్మిలతో (YS Sharmila) భేటీ అయిన విషయం తెలిసిందే. దీంతో అప్పటి నుంచి సునీత కాంగ్రెస్​లో చేరబోతున్నారనే ప్రచారం సాగుతోంది. ఈ నేపథ్యంలో వైఎస్ సునీతను చంపేస్తామంటూ బెదిరించడం, ఆమె ఫిర్యాదు చేయడంతో మరోసారి ఆమె రాజకీయ ప్రవేశం గురించి చర్చకు దారితీసింది.

ఇప్పటికే సునీత తన తండ్రి వైఎస్ వివేకానందరెడ్డి హత్య కేసులో పోరాటం చేస్తున్నారు. ఈ కేసులో వైఎస్ భాస్కర్ రెడ్డి, వైఎస్ అవినాష్ రెడ్డి (YS Avinash Reddy) నిందితులుగా ఉన్నారు. వైఎస్ భాస్కరరెడ్డితో పాటు మరికొంతమంది జైలులో రిమాండ్ ఖైదీలుగా ఉండగా, వైఎస్ అవినాష్‌రెడ్డి బెయిల్‌ తెచ్చుకున్నారు.

దీనిపై సునీత సుప్రీంకోర్టులో న్యాయపోరాటం చేస్తున్న విషయం తెలిసిందే. ఇలాంటి పరిస్థితుల్లో కొద్ది రోజుల క్రితం షర్మిలను సునీత కలవడంతో, రాజకీయంగానూ వారిని ఎదుర్కొనేందుకు సిద్ధమవుతున్నట్లు ప్రచారం సాగుతోంది. కడప లోక్‌సభకు కాంగ్రెస్ పార్టీ తరపున సునీతను పోటీ చేస్తారని, ఇదే అంశాన్ని వారు షర్మిలతో భేటీలో ప్రస్తావనకు వచ్చినట్లు తెలిసింది.

అయితే ఇటువంటి పరిస్థితుల్లో వైఎస్ సునీతకు ఫేస్​బుక్​లో బెదిరింపులు రావడం, తీవ్ర చర్చనీయాంశమైంది. ఆమె రాజకీయ ప్రవేశం గురించి ప్రచారం జరుగుతున్న సమయంలోనే ఈ ఘటనలు జరుగుతుండటంతో, ఇవి రాజకీయపరమైన బెదిరింపులా లేక ఇతర కారణాలు ఏమైనా ఉన్నాయా అనే అనుమానాలు వ్యక్తమువుతున్నాయి. దీనిపై మరిన్ని విషయాలు తెలియాలంటే కొద్దిరోజులు వేచి చూడాల్సిందే.

మరోవైపు రాహుల్ గాంధీ సమక్షంలో సునీత కాంగ్రెస్​ పార్టీలో చేరుతారనే ప్రచారం సైతం సాగుతోంది. త్వరలోనే దీనిపై సైతం పూర్తి వివరాలు తెలియనున్నాయి. ఏది ఏమైనప్పటికీ సునీత రాజకీయ ప్రవేశంపై తెలుగు రాష్ట్రాల్లో తీవ్ర చర్చకు దారితీసింది అని విశ్లేషకులు చెప్తున్నారు. ఎందుకంటే సునీత బరిలో నిలిస్తే చేస్తే ఒకే కుటుంబ నుంచి పోటీ ఉండటమే దీనికి కారణం.