మందుబాబులకు షాకుల మీద షాకులు - రెండు రోజులు వైన్స్​ బంద్ - Wines Shops Closed In Telangan

Wine Shops Close: సమ్మర్‌లో కూల్‌ కూల్​ బీర్లతో రిలాక్స్‌ అవుతున్న మందు బాబులకు మళ్లీ షాకింగ్​ న్యూస్​. రెండు రోజులపాటు వైన్స్‌, బార్‌ షాపులు మూసివేయాలని ఎక్సైజ్‌ శాఖ నిర్ణయం తీసుకుంది. దీనికి సంబంధించి పూర్తి వివరాలు ఇప్పుడు చూద్దాం.

Wines Shops Closed : తెలంగాణలో మందు బాబులకు వరుస షాక్​లు తగులుతున్నాయి. మళ్లీ వైన్స్​ షాపులు మూత పడనున్నాయి. ఈ నెలలోనే రెండోసారి మద్యం షాపులు బంద్ ​కానున్నాయి. మే 13న జరిగిన లోక్​సభ ఎన్నికల నేపథ్యంలో 2 రోజులపాటు వైన్‌ షాపులు, బార్లు మూతపడగా తాజాగా మరో రెండు రోజులు వైన్స్​ షాప్స్​ మూతపడనున్నాయి. మరి, ఎక్కడెక్కడ మూత పడనున్నాయి? దీనికి గల కారణాలేంటి? మళ్లీ మద్యం దుకాణాలు ఎప్పుడు తెరుస్తారు? అనే విషయాలను ఈ స్టోరీలో తెలుసుకుందాం.

తెలంగాణ రాష్ట్రంలో మే 27న (సోమవారం) నల్గొండ-ఖమ్మం-వరంగల్ జిల్లా పట్టభద్రుల ఎమ్మెల్సీ ఎన్నికల పోలింగ్‌ జరగనుంది. ఈ నేపథ్యంలో వైన్స్​ షాపులు, బార్లు మూసివేయాలని ఎక్సైజ్​ శాఖ అధికారులకు ఎన్నికల సంఘం ఆదేశాలు జారీ చేసింది. ఈ క్రమంలో అన్ని వైన్స్​ షాపులు, బార్లు మూసివేయాలని అధికారులు నిర్ణయం తీసుకున్నారు. ఎన్నికల వేళ మద్యం ఏరులైపారుతూ ఉంటుంది. ఈ నేపథ్యంలో ఎటువంటి అవాంఛనీయ ఘటనలూ జరగకుండా ముందు జాగ్రత్తగా ఈ చర్యలు తీసుకున్నారు. మే 27న పోలింగ్‌ జరగనుండగా ముందు నుంచే బంద్ పాటించాలని ఆదేశించారు. ఈ క్రమంలోనే మద్యం దుకాణాలతోపాటు అన్ని కల్లు కంపౌండ్‌లు సైతం 48 గంటల పాటు మూతపడనున్నాయి.

ఆ మూడు జిల్లాల్లోనే : మే 25వ తేదీన శనివారం సాయంత్రం 4 గంటల నుంచి మూసివేత నిర్ణయం అమలు కానుంది. తిరిగి మే 27వ తేదీన సాయంత్రం 4 గంటలకు మద్యం షాపులు ఓపెన్​ కానున్నాయి. అయితే ఈ బంద్ రాష్ట్రం మొత్తం కాదు. ఎన్నికలు జరుగుతున్న నల్లగొండ, ఖమ్మం, వరంగల్ జిల్లాల్లోని వైన్‌ షాపులను మాత్రమే బంద్‌ చేయనున్నారు. ఆ జిల్లాల్లో ప్రశాంతంగా పోలింగ్‌ జరిగేందుకు వీలుగానే ఈ నిర్ణయం తీసుకున్నట్లు అధికారులు తెలిపారు. ఈ నిబంధనలను ఎవరైనా అతిక్రమిస్తే చట్టపరంగా కఠిన చర్యలు తీసుకుంటామని హెచ్చరించారు. ఇదిలా ఉంటే.. సార్వత్రిక ఎన్నికల ఓట్ల కౌంటింగ్​ రోజైన జూన్​ 4న కూడా మద్యం దుకాణాలు మూత పడనున్నాయి.

వరుస బంద్​లు.. మందు బాబులకు వరుస బంద్​లు షాకిస్తున్నాయి. ఏప్రిల్​ నెలలో శ్రీరామ నవమి, హనుమాన్ జయంతి సందర్భంగా మద్యం దుకాణాలు మూసేశారు. మే నెలలో సార్వత్రిక ఎన్నికల పోలింగ్ సందర్భంగా వరుసగా రెండు రోజులు మూత పడ్డాయి. మళ్లీ ఇప్పుడు మూడు జిల్లాల్లో రెండు రోజుల పాటు బంద్​ కానున్నాయి. అటు జూన్​ 4న సార్వత్రిక ఎన్నికల కౌంటింగ్​ రోజున కూడా మూసివేయనున్నారు. ఇలా వరుసగా షాకుల మీద షాకులు తగులుతుండడంతో మద్యం ప్రియులు నిరాశ వ్యక్తం చేస్తున్నారు.