ఆపత్కాలంలో ఆదుకున్న ట్యూబ్‌లు - పంపిణీ చేసిన స్వచ్ఛంద సంస్థలు - Lorry Tubes to Save Lives

Victims Used Lorry Tubes to Save Lives in Flooded Areas : బుడమేరు వరద బాధితులను లారీ ట్యూబ్​లు ఆదుకున్నాయి. ముంపు ప్రాంతవాసులను రక్షించడానికి ప్రభుత్వం బోట్లు ఏర్పాటు చేసినా అవి బాధితులకు సరిపోలేదు. దీంతో చాలా మంది వరద ముంపు బాధితులు తమ ప్రాణాలను కాపాడుకోవడానికి ఈ ట్యూబులను వినియోగించుకున్నారు.

Victims Used Lorry Tubes to Save Lives in Flooded Areas : బుడమేరు వరద ఉద్ధృతితో నీటమునిగిన విజయవాడ బాధితులను లారీ ట్యూబ్‌లు ఆదుకున్నాయి. వరద నీటి నుంచి బాధితులను సురక్షిత ప్రాంతాలకు తరలించేందుకు ప్రభుత్వం పడవలు ఏర్పాటు చేసినా సరిపోలేదు. దీంతో చాలామందిని ఈ పాత ట్యూబ్‌ల ద్వారా నీటిలో మునిగిపోకుండా సురక్షితంగా ఒడ్డుకు చేర్చారు. ఆహారం, తాగునీరు అందించడానికి సైతం వీటినే వినియోగించారు.

ట్యూబ్‌ల ద్వారా సురక్షిత ప్రాంతాలకు తరలింపు : విజయవాడ ముంపు ప్రాంత బాధితుల్ని లారీ టైర్ ట్యూబ్​లు బాగా ఆదుకున్నాయి. వరద ముంపులో చిక్కుకు పోయిన తమ వారిని రక్షించుకునేందుకు పెద్ద సంఖ్యలో వీటిని బాధితులు వినియోగించారు. ఆహారపొట్లాలు, తాగునీరు లాంటి వాటిని తరలించేందుకు కూడా ఈ ట్యూబులనే ఉపయోగించారు. లక్షల సంఖ్యలో ఉన్న వరద ముంపు బాధితుల్ని ఆదుకునేందుకు ఎస్డీఆర్ఎఫ్, ఎన్డీఆర్ఎఫ్ సహా మత్స్యకారుల బోట్లేవీ సరిపోక పోవటం, మారుమూల ప్రాంతాలకు సహాయం అందకపోటంతో గాలికొట్టిన లారీ ట్యూబులే బాధితుల్ని ఆదుకున్నాయి. అజిత్ సింగ్ నగర్ , రాజరాజేశ్వరీ పేట, నందమూరి నగర్, వాంబేకాలనీ, చిట్టినగర్, సితారా, భవానీపురంలో ఈ లారీ ట్యూబ్​లను వినియోగించి చాలా మంది ప్రాణాలను కాపాడారు.

పాత ట్యూబ్​లను పంపిణీ చేసిన స్వచ్ఛంద సంస్థలు : వరద నీటిలో నడవలేని మహిళలు, వృద్ధులు, చిన్నారులను సురక్షిత ప్రాంతాలకు ఈ లారీ టైర్ ట్యూబ్​ల ద్వారా తరలించారు. అలాగే ఒడ్డున ఉన్న ఆహరపొట్లాలు, మంచినీళ్ల బాటిళ్లు, అత్యవసర వస్తువుల్ని వరద ముంపు ప్రాంతానికీ ట్యూబులపైనే అందజేశారు. స్థానిక యువత అత్యధికంగా ఈ ట్యుబులపైనే తమ కుటుంబంతో పాటు తోటివారిని రక్షించే ప్రయత్నం చేశారు. ఈ క్రమంలోనే కొన్ని స్వచ్ఛంద సంస్థలు లారీ పాత ట్యూబ్​లను సేకరించి వాటికి గాలికొట్టించి బాధితులకు అందజేశారు.