గడుస్తున్న ఏళ్లు - నెరవేరని హామీలు - అంధకారంలో వంశధార నిర్వాసితులు - Vamsadhara Project Expats Problems

Vamsadhara Project Expats Facing Problems : మాట తప్పను మడమ తిప్పను అని నీతులు చెప్పే జగన్ తీర అధికారంలోకి వచ్చాక ప్రజలకు పంగనామాలు పెడుతున్నారు. శ్రీకాకుళం జిల్లాలోని వంశధార ప్రాజెక్టు నిర్వాసితులకు ఇచ్చిన మాటను మరచి వారికి కంటిమీద కునుకు లేకుండా చేస్తున్నారు. చివరికి త్రాగునీరు, డ్రైనేజీ, వీధి దీపాలు లాంటి ప్రాథమిక మౌలిక వసతులు లేక నిర్వాసితులు తీవ్ర ఇబ్బందులు పడుతున్నారు.

Vamsadhara Project Expats Facing Problems : వంశధార ప్రాజెక్టు వస్తే తమ బతుకులు బాగుపడతాయనుకున్నారు ఆ గ్రామస్థులు. గ్రామాలను పట్టణాలుగా చేసి అందరికీ ఉపాధి చూపి అభివృద్ధి వైపు బాటలు వేస్తామని వైఎస్సార్సీపీ ప్రభుత్వం హామీ ఇచ్చి ఏళ్లు గడుస్తోంది. అభివృద్ధి మాట దేవుడెరుగు కనీసం మౌలిక సదుపాయాలు లేక వంశధార నిర్వాసిత గ్రామస్థులు తీవ్ర ఇబ్బందులు ఎదుర్కొంటున్నారు. ప్రాజెక్టును ఆనుకొని ఉన్న హిరమండలం మేజర్ పంచాయితీలో చివరికి త్రాగునీరు, డ్రైనేజీ, వీధి దీపాలు లాంటి ప్రాథమిక మౌలిక వసతులు లేక గ్రామస్థులు తీవ్ర ఇబ్బందులు ఎదుర్కొంటున్నారు.

శ్రీకాకుళం జిల్లాలో వంశధార రిజర్వాయర్​ను 2005లో అప్పటి ముఖ్యమంత్రి వైయస్ రాజశేఖర్ రెడ్డి ప్రారంభించారు. ప్రాజెక్టు నిర్మించడం కోసం హిరమండలం, కొత్తూరు, ఎల్​.ఎన్ పేట మండలాల్లో మొత్తం 21 గ్రామాలకు చెందిన 10 వేల మంది కుటుంబాలును ఖాళీ చేయించారు. వీరందరిని నిర్వాసిత గ్రామాలకు తరలించారు. ప్రాజెక్టు రావడం వల్ల నష్టపోయిన గ్రామస్థులకు భవిష్యత్తులో నిర్మించే నిర్వాసిత కాలనీలో మౌలిక వసతులతో పాటు ఉపాధి పొందేందుకు అవకాశం కల్పిస్తామని అప్పటి ప్రభుత్వం హామీ ఇచ్చింది.

Vamsadhara Expats Fire YCP Government : అయితే ఏళ్లు గడుస్తున్నా ఇప్పటికీ ఆ హామీ నెరవేరటం లేదని నిర్వాసిత గ్రామస్థులు ఆవేదన వ్యక్తం చేస్తున్నారు. ప్రాజెక్టు రాకముందు చుట్టుపక్కల 20కి పైగా గ్రామాలకు వ్యాపార, వాణిజ్య, ఉపాధి కార్యకలాపాలకు కేంద్ర స్థానమైన హిరమండలం మేజర్ పంచాయితీలో కూడా ప్రస్తుతం మౌలిక వసతుల కొరతతో ప్రజలు తీవ్ర ఇబ్బందులు ఎదుర్కొంటున్నారు. గ్రామంలో త్రాగునీరు, డ్రైనేజీ, వీధి దీపాలు లాంటి కనీసం మౌలిక వసతులు కల్పించకపోవడంతో ప్రభుత్వంపై గ్రామస్థులు ఆగ్రహం వ్యక్తం చేస్తున్నారు.

గత ఎన్నికల ప్రచారంలో ప్రస్తుతం ముఖ్యమంత్రి జగన్ మోహన్ రెడ్డి తాను అధికారంలోకి వస్తే నిర్వాసిత గ్రామస్థులకు అన్ని సదుపాయాలు కల్పిస్తామని హామీ ఇచ్చారు. అంతేగాక ఆ గ్రామాలను అభివృద్ధి చేసి ఉపాధి చూపుతామని హామీ ఇచ్చి ఐదేళ్లు గడిచిపోయింది. మాటతప్పను మడమ తిప్పను అని చెప్పిన వ్యక్తి కనీసం మౌలిక వసతులు కూడా కల్పించ లేదు. - బుచ్చిబాబు, బాధితుడు

ప్రస్తుతం వైఎస్సార్సీపీ ప్రభుత్వంలో పంచాయతీలకు నిధులు ఇవ్వకపోవడంతో డ్రైనేజీలో పూడిక తీసే పరిస్థితి లేదు. డ్రైనేజీలు లేక రోడ్లపైనే మురుగునీరు పారుతుంది. తాగేందుకు మంచినీరు లేక ఇతర ప్రాంతాల నుంచి కొనుక్కునే పరిస్థితి వచ్చింది. ఈ నీటికోసమే ప్రతి నెల వెయ్యి రూపాయల వరకు ఖర్చు అవుతుంది. అధికారులకు ఎన్నిసార్లు ఫిర్యాదులు చేసినా ఎవరు తమ గోడు పట్టించుకోవడం లేదు. ఇప్పటికైనా ప్రభుత్వం స్పందించి తమ సమస్యలు పరిష్కరించాలి. - భవాని, బాధితురాలు