ఇకపై ఆ టికెట్లు రద్దు - రెండు గంటల్లోనే శ్రీవారి సర్వదర్శనం - టీటీడీ సంచలన నిర్ణయాలు

కీలక నిర్ణయాలు తీసుకున్న టీటీడీ పాలకమండలి - తిరుమలలో విశాఖ శారదాపీఠం లీజు రద్దు

TTD GOVERNING BODY KEY DECISIONS : తిరుమలలో టీటీడీ ధర్మకర్తల మండలి సమావేశం ముగిసింది. ధర్మకర్తల మండలి నిర్ణయాలు టీటీడీ ఛైర్మన్‌ బీఆర్‌ నాయుడు వెల్లడించారు. సర్వదర్శనానికి వచ్చే భక్తులకు 2 నుంచి 3 గంటల్లోగా దర్శన భాగ్యం కల్పిస్తామని అన్నారు. ఒక నిపుణుల కమిటీ ఏర్పాటు చేస్తామని, కమిటీ ఇచ్చే నివేదిక ఆధారంగా భక్తులకు త్వరితగతిన దర్శనం చేయించేందుకు నిర్ణయించామన్నారు. టీటీడీలో పని చేస్తున్న అన్యమత ఉద్యోగులను బయటకు పంపేందుకు ఎటువంటి చర్యలు తీసుకోవాలనే విషయమై ప్రభుత్వానికి నివేదించి ప్రభ్వుత శాఖలకు బదిలీ చేసేలా నిర్ణయం తీసుకున్నామన్నారు.

ప్రభుత్వ బ్యాంకుల్లోకి టీటీడీ నగదు: తిరుమలలో డంపింగ్ యార్డులోని చెత్తను మూడు నెలల్లో తొలగించాలని, తిరుప‌తిలోని శ్రీనివాస సేతును గరుడ వారధిగా పేరు మార్చడానికి నిర్ణయించామన్నారు. తిరుమలలో రాజకీయాలు మాట్లాడకుండా చర్యలు తీసుకుంటామని అన్నారు. ప్రైవేటు బ్యాంకుల్లోని టీటీడీ నగదును ప్రభుత్వ బ్యాంకుల్లోకి బదిలీ చేస్తామని తెలిపారు.

శారదా పీఠం లీజును రద్దు చేసి స్థలాన్ని తిరిగి తీసుకుంటామన్న బీఆర్‌ నాయుడు, పర్యాటక శాఖ ద్వారా ఇచ్చే దర్శన టికెట్లు రద్దు చేస్తున్నామని అన్నారు. నూతనంగా నిర్మిస్తున్న ముంతాజ్‌ హోటల్‌ అనుమతి రద్దు చేస్తున్నట్లు ప్రకటించారు. తిరుపతి ప్రజలకు ప్రతినెలా మొదటి మంగళవారం దర్శనానికి అవకాశం కల్పిస్తామని తెలిపారు. శ్రీవాణి ట్రస్టు పేరు రద్దు చేస్తున్నట్లు స్పష్టం చేశారు. అనంతరం 2025 ఏడాది టీటీడీ క్యాలెండర్‌ను ఛైర్మన్‌ బీఆర్‌ నాయుడు ఆవిష్కరించారు.

80 అంశాల అజెండాను పరిశీలించిన సభ్యులు: బీఆర్ నాయుడు తన తొలి సమావేశంలోనే సామాన్య భక్తులకు మెరుగైన సౌకర్యాలు కల్పించేలా చర్యలు చేపట్టారు. దాదాపు ఉదయం 10:30 గంటలకు ప్రారంభమైన సమావేశం మధ్యాహ్నం 3:30 గంటలకు వరకు సుధీర్ఘంగా 80 అంశాల అజెండాను పరిశీలించిన సభ్యులు నిర్ణయాలను తీసుకున్నారు. గత ఐదు ఏళ్లలో పాలకమండలి తీసుకున్న నిర్ణయాలను పునర్ సమీక్షించి వాటిని రద్దు చేశారు.

కూటమి ప్రభుత్వం ఏర్పడిన అనంతరం దాదాపు ఐదు నెలల తర్వాత తిరుమలలో టీటీడీ ధర్మకర్తల మండలిని రాష్ట్ర ప్రభుత్వం నియమించింది. గత ప్రభుత్వంలో ఇష్టానుసారంగా నిర్ణయాలతో సామాన్య భక్తుల ఇబ్బందులు, స్వామివారి నిధులు దుర్వినియోగం, ప్రసాదాల నాణ్యత లోపం వంటివి అభియోగాలు వ్యక్తమయ్యాయి. ఈ నేపథ్యంలో కొత్తగా ఏర్పడిన మండలి వాటిని సరిచేసింది. సామాన్య భక్తుల దృష్టిలో పెట్టుకొని పలు కీలక నిర్ణయాలకు సభ్యులు ఆమోదించారు. అలిపిరిలో టూరిజం కార్పొరేష‌న్ ద్వారా దేవలోక్​కు కేటాయించిన 20 ఎకరాల భూమిని వెనక్కి తీసుకుని టీటీడీకి ఇచ్చే విధంగా ప్రభుత్వాన్ని కోరాలన్న నిర్ణయంకు వచ్చామన్నారు.