TTD Compensation Stampede Victims: తిరుపతి తొక్కిసలాట బాధితులకు అన్ని విధాలుగా ఉంటామని హోంమంత్రి వంగలపూడి అనిత భరోసా ఇచ్చారు. తొక్కిసలాటలో మృతిచెందిన ఆరుగురిలో నలుగురు విశాఖవాసులే కావడం దురదృష్టకరమన్నారు. టీటీడీ సభ్యులు జ్యోతుల నెహ్రూ, పనబాక లక్ష్మి, ఎంఎస్ రాజుతోపాటు టీడీపీ రాష్ట్ర అధ్యక్షుడు పల్లా శ్రీనివాస్, విశాఖ ఉత్తర ఎమ్మెల్యే విష్ణుకుమార్ రాజు బాధిత కుటుంబాలను పరామర్శించారు. విశాఖలోని కంచరపాలెంలో తొక్కిసలాట బాధితురాలు శాంతి ఇంటికి వెళ్లి కుటుంబసభ్యులను ఓదార్చారు. 27 లక్షల 50 వేల రూపాయల చెక్కును అందించారు. మృతుల కుటుంబంలో ఒకరికి ఒప్పంద ఉద్యోగం ఇచ్చేందుకు చర్యలు చేపడతామని హామీ ఇచ్చారు.
టీటీడీ బోర్డు సభ్యులతో రెండు కమిటీలు: కాగా వైకుంఠ ఏకాదశి సర్వదర్శనం టోకెన్ల జారీలో మృతిచెందిన ఆరుగురు కుటుంబాలకు పరిహారం చెల్లించేందుకు టీటీడీ పాలకమండలిలోని బోర్డు సభ్యులతో రెండు కమిటీలను ఏర్పాటు చేసినట్లు ఛైర్మన్ బీఆర్ నాయుడు శనివారం రాత్రి తెలిపారు. తిరుపతిలోని స్విమ్స్ డైరెక్టర్ ఛాంబర్లో జరిగిన సమావేశంలో జిల్లా ఎమ్మెల్యేలు, టీటీడీ అధికారులతో కలిసి గాయపడిన బాధితులకు పరిహారం అందజేశారు.
మృతుల కుటుంబంలో ఒకరికి ఉద్యోగం: తొక్కిసలాటలో తీవ్రంగా గాయపడ్డ ఇద్దరికి 5 లక్షల రూపాయలు, గాయాలైన మరో 5 మందికి 2 లక్షల రూపాయల చొప్పున పరిహారాన్ని అందజేశారు. ముఖ్యమంత్రి చంద్రబాబు ఆదేశాల మేరకు ఆస్పత్రిలో ఉన్న క్షతగాత్రులకు చెక్కులను అందజేశామని టీటీడీ ఛైర్మన్ బీఆర్ నాయుడు తెలిపారు. మృతుల కుటుంబంలో ఒకరికి టీటీడీ కాంట్రాక్ట్ ఉద్యోగం, వారి పిల్లలకు ఉచిత విద్య అందించేందుకు వివరాలు సేకరిస్తామని తెలిపారు.
ఈ మేరకు టీటీడీ బోర్డు సభ్యులతో ఏర్పాటుచేసిన కమిటీల వివరాలను వెల్లడించారు. విశాఖ, నర్సీపట్నం వెళ్లే కమిటీలో జ్యోతుల నెహ్రూ, పనబాక లక్ష్మి, జంగా కృష్ణమూర్తి, జానకి దేవి, మహేందర్‌ రెడ్డి, ఎంఎస్ రాజు, భానుప్రకాష్‌రెడ్డి ఉన్నట్లు తెలిపారు. తమిళనాడు, కేరళ రాష్ట్రాలలోని ప్రాంతాలకు వెళ్లే కమిటీలో రామమూర్తి, కృష్ణమూర్తి వైద్యనాథన్, నరేష్‌కుమార్, శాంతారామ్, సుచిత్ర ఎల్ల ఉన్నట్లు పేర్కొన్నారు. పరిహారం అందజేసేందుకు వెళ్లే కమిటీ సభ్యుల ప్రయాణ, ఇతర ఖర్చుల కోసం తన సొంతనిధులు వెచ్చిస్తానని ఛైర్మన్ బీఆర్ నాయుడు తెలిపారు.
కోలుకున్న భక్తులకు వైకుంఠద్వార దర్శనం: మరోవైపు తొక్కిసలాట ఘటనలో గాయపడి కోలుకున్న భక్తులకు వైకుంఠద్వార దర్శనం కల్పిస్తున్నారు. తాజాగా మరో 28 మంది భక్తులకు టీటీడీ వైకుంఠద్వార దర్శనం చేయించింది. క్షతగాత్రులకు పరిహారం అందజేసి, ప్రత్యేక దర్శనం చేయించాలని టీటీడీ ఛైర్మన్ ఆదేశించిన విషయం తెలిసిందే. ఛైర్మన్ అదేశాలతో బాధిత భక్తులకు ప్రోటోకాల్ బ్రేక్ దర్శనం చేయించారు. ప్రభుత్వం, టీటీడీ బోర్డు, అధికారులు చాలా జాగ్రత్తగా చూసుకున్నారని, మెరుగైన వైద్యం అందించి వైకుంఠ ద్వార దర్శనం కల్పించారని భక్తులు తెలిపారు.
