TTD Board Member MS Raju Sensational Allegations : తిరుపతి తొక్కిసలాట ఘటనపై టీటీడీ బోర్డు మెంబర్ ఎంఎస్ రాజు సంచలన ఆరోపణలు చేశారు. ఈ ఘటనలో కుట్రకోణం ఉందనే అనుమానాలు వ్యక్తం అవుతున్నాయని తెలిపారు. కావాలనే కొంతమంది అరుపులు సృష్టించి తొక్కిసలాటకు కారణం అయ్యారని తెలుస్తొందన్నారు. అందరి కంటే ముందే వైఎస్సార్పీపీ సోషల్ మీడియాలోకి వీడియోలు ఎలా వచ్చాయని ప్రశ్నించారు. శవ రాజకీయాలు చేయడం వైఎస్సార్పీపీకి ముందు నుంచి ఉన్న విద్య అన్నారు. తిరుపతి ఘటనపై ఆయన అనంతపురంలో ఏర్పాటు చేసిన మీడియా సమావేశంలో మాట్లాడారు.
తిరుపతి తొక్కిసలాట ఘటన జరగటం దురదృష్టకరమన్నారు. వైఎస్సార్సీపీ సోషల్ మీడియా టీటీడీ ప్రతిష్టకు భంగం కలిగేలా ప్రవర్తిస్తుందని విమర్శించారు. అనవసర ప్రచారాలను భక్తులు నమ్మవద్దని కోరారు. వైకుంఠ ద్వార దర్శనం కోసం టీటీడీ భక్తులకు అన్ని ఏర్పాట్లు చేసిందని చెప్పారు. 9 ప్రాంతాల్లో 90 కేంద్రాలను ఏర్పాటు చేశామన్నారు. వైఎస్సార్పీపీ కుట్ర రాజకీయాలను ప్రజలు, భక్తులు నమ్మకూడదని కోరారు. కుట్ర కోణంలో నిజాలు బయటికి వస్తే ఎలాంటి వారినైనా ఉపేక్షించేది లేదని టీటీడీ బోర్డు మెంబర్ ఎంఎస్ రాజు స్పష్టం చేశారు.
తిరుపతిలో తొక్కిసలాట ఘటన - మృతుల కుటుంబాలకు రూ.25 లక్షల పరిహారం
దుష్ప్రచారాన్ని నమ్మొద్దు : తిరుపతి తొక్కిసలాటలో నిర్లక్ష్యం వహించిన అధికారులపై క్రమశిక్షణాచర్యలకు వెనుకాడేది లేదని TTD బోర్డు సభ్యుడు భానుప్రకాష్‌ స్పష్టం చేశారు. టోకెన్లు లేని భక్తులకు తిరుమల కొండపైకి ప్రవేశం లేదనే దుష్ప్రచారాన్ని నమ్మొద్దని ఆయన కోరారు. పద్మావతి ఆస్పత్రిలో క్షతగాత్రుల్ని పరామర్శించిన ఆయన వారంతా స్వామివారి దర్శనాలు అడుగుతున్నారని తెలిపారు.
బాధ్యులపై కఠిన చర్యలు : తిరుపతిలో తొక్కిసలాట ఘటన ప్రమాదమా? కుట్రా? అనే కోణంలో విచారణ చేస్తున్నామని హోంమంత్రి అనిత తెలిపారు. ఎవరి వైఫల్యం ఉందనేది సీసీ కెమెరాల ద్వారా తెలుస్తుందని చెప్పారు. బాధ్యులు ఏ స్థాయిలో ఉన్నా కఠిన చర్యలు తీసుకుంటామన్నారు. ఇలాంటి ఘటనలు భవిష్యత్తులో జరగకుండా చూస్తామని పేర్కొన్నారు.
రూ.25లక్షల పరిహారం : తిరుపతిలో జరిగిన తొక్కిసలాట ఘటనలో మృతిచెందిన వారి కుటుంబాలకు ఏపీ ప్రభుత్వం ఎక్స్‌గ్రేషియా ప్రకటించింది. ఒక్కో కుటుంబానికి రూ.25లక్షల పరిహారం ఇవ్వనున్నట్లు రెవెన్యూ మంత్రి అనగాని సత్యప్రసాద్‌ తెలిపారు. తిరుపతి రుయా ఆస్పత్రిలో మృతుల కుటుంబ సభ్యులను మంత్రుల బృందం పరామర్శించింది. స్విమ్స్‌ ఆస్పత్రిలో క్షతగాత్రులను పరామర్శించి వైద్యులతో మాట్లాడారు. వైకుంఠ ఏకాదశి మొదలయ్యే సమయంలోనే ఈ ఘటన జరగడం దురదృష్టకరమన్నారు. ఘటనకు కారణం తొందరపాటు చర్యా? సమన్వయా లోపమా? అనేది విచారణలో వెల్లడవుతుందని చెప్పారు.
'వారిద్దరే కారణం' - తిరుపతి తొక్కిసలాట ఘటనపై చంద్రబాబుకి అందిన నివేదిక
ఎందుకు ఏర్పాట్లు చేయలేదు? - అప్రమత్తంగా ఉండాల్సిన బాధ్యత లేదా?: సీఎం చంద్రబాబు
