లోక్​సభ ఎన్నికల ఎఫెక్ట్​ - టీఎస్​ఆర్టీసీ, దక్షిణ మధ్య రైల్వేలకు రికార్డు స్థాయిలో సమకూరిన ఆదాయం - TSRTC and SCR Highest Revenue

TSRTC and SCR Record Revenue on Election Time : ఎన్నికల సమయంలో ఓటేసేందుకు ఓటర్లు భారీ ఎత్తున పోటెత్తారు. ప్రయాణికుల రద్దీకి అనుగుణంగా దక్షిణ మధ్య రైల్వే ప్రత్యేక రైళ్లను నడిపించింది. మరోపక్క టీఎస్​ఆర్టీసీ ప్రత్యేక బస్సులను నడిపించింది. దీంతో రైళ్లలో, బస్సుల్లో రికార్డ్ స్థాయిలో ప్రయాణించారు. తద్వారా ఆర్టీసీకి, రైల్వేకు భారీగా ఆదాయం సమకూరింది.

TSRTC and SCR Record Revenue in Election : ఎన్నికల సమయంలో దక్షిణ మధ్య రైల్వే ప్రత్యేక రైళ్లతో పాటు, సాధారణ రైళ్లకు అదనపు బోగీలను ఏర్పాటు చేశారు. మే 9 నుంచి 12 వ తేదీ వరకు జంటనగర పరిధిలోని సికింద్రాబాద్, హైదరాబాద్, కాచిగూడ, లింగంపల్లి తదితర రైల్వే స్టేషన్ల నుంచి వివిధ గమ్యస్థానాలకు సుమారు 4.3 లక్షల మంది జనరల్​ భోగిలో ప్రయాణికులు ప్రయాణించారు. జంట నగరాల నుంచి ప్రతి రోజు జనరల్ కోచ్​లలో సగటున 1.05 లక్షల మంది ప్రయాణించారు. రోజువారీ సగటున ప్రయాణించే 68,800 మంది అన్‌రిజర్వ్​డ్ ప్రయాణికులతో పోలిస్తే 52 శాతం ఎక్కువ అని రైల్వే శాఖ వెల్లడించింది.

Special Trains During Election Time : దక్షిణ మధ్య రైల్వే ఎన్నికల సమయంలో భారీ రద్దీని దృష్టిలో ఉంచుకొని రెండు తెలుగు రాష్ట్రాల మధ్య మే 9 నుంచి మే 15 వరకు అదనంగా 60 పైచిలుకు ప్రత్యేక రైళ్లను నడిపించారు. ఈ ప్రత్యేక రైళ్లు 100 శాతం కంటే ఎక్కువ ఆక్యుపెన్సీని నమోదు చేశాయి. జంటనగరాల నుంచి కాకినాడ, విశాఖపట్నం, నర్సాపూర్, నాగర్ సోల్, మచిలీపట్నం తదితర ప్రాంతాలకు ప్రత్యేక రైళ్లు నడిపించారు.

SCR Special Trains Revenue : జంట నగరాల నుంచి ఖుర్దా రోడ్, బెర్హంపూర్, బెంగళూరు, సంబల్​పూర్​, దానాపూర్, గోరఖ్ పూర్, అగర్తలా, రక్సాల్, ఉదయపూర్, కటక్, సంత్రాగచ్చి, కొల్లాం, జైపూర్, రాజ్ కోట్ తదితర ప్రాంతాలకు కూడా ప్రత్యేక రైళ్లు నడిపించారు. ఈ సమయంలో వెయిటింగ్​ లిస్ట్​లో ఉన్న ప్రయాణీకుల అదనపు రద్దీకి అనుగుణంగా ఏసీ-3 టైర్, స్లీపర్ క్లాస్, జనరల్ సెకండ్ క్లాస్ కోచ్​లతో కూడిన 41 అదనపు కోచ్‌లు, 40 రోజువారీ రైళ్లను అటాచ్ చేశారు.

TSRTC Earn 25 Crore During Election : ఎన్నికల సమయంలో టీఎస్​ఆర్టీసి సుమారు 3,500 పైచిలుకు బస్సులను రెండు తెలుగు రాష్ట్రాలకు నడిపించింది. తెలంగాణ రాష్ట్రానికి 1,500 పైచిలుకు బస్సులు, ఆంధ్రపదేశ్​కు సుమారు 1000కి పైగా బస్సులను నడిపించింది. జేబీఎస్​, ఎంబీబీఎస్​ వంటి ప్రధాన బస్టాండ్​లతో పాటు ఎల్బీనగర్, ఉప్పల్, కూకట్ పల్లి, మియాపూర్, ఆరాంఘర్ తదితర ప్రాంతాల నుంచి ప్రత్యేక బస్సులను నడిపించారు. ఆర్టీసీకి 23 గంటల్లోనే భారీ ఎత్తున ఆదాయం సమకూరింది.

ఆర్టీసీకి రూ.25 కోట్లు ఆదాయం : ఈ నెల 13వ తేదీన టీఎస్​ఆర్టీసీ బస్సుల్లో 54 లక్షల మంది ప్రయాణించారు. తద్వారా సంస్థకి రూ.24.22 కోట్ల ఆదాయం సమకూరింది. 14వ తేదీన ఓటేసిన వారు 54 లక్షల మంది ప్రయాణించారు. టికెట్ కొనుగోలు చేసిన వారి ద్వారా ఆదాయం రూ.15 కోట్లు సమకూరినట్లు అధికారులు పేర్కొన్నారు. ఇందులో ఆర్టీసి మహిళలకు మహాలక్ష్మి ఉచిత ప్రయాణంతో రూ.9 కోట్ల ఆదాయం సమకూరినట్లు తెలుస్తోంది. ఈ మొత్తాన్ని ప్రభుత్వం ఆర్టీసీకి రియంబర్స్​మెంట్ ద్వారా చెల్లించాల్సి ఉంది.