టీఎస్ ఈఏపీసెట్​గా మారిన ఎంసెట్, మే 9 నుంచి ప్రవేశపరీక్షలు

TS Eamcet Renamed as EAPCET : ఉన్నత విద్యా మండలి తెలంగాణ ఎంసెట్ పేరు మార్చింది. అలాగే ఉమ్మడి ప్రవేశ పరీక్షలకు నోటిఫికేషన్ విడుదల చేసింది. మే 9 నుంచి 11 వరకు ఇంజినీరింగ్, 12, 13 తేదీల్లో అగ్రికల్చర్, ఫార్మసీ ప్రవేశ పరీక్షలు జరగనున్నాయి.

TS Eamcet Renamed as EAPCET : రాష్ట్రంలో ఇంజినీరింగ్‌, అగ్రికల్చర్‌, ఫార్మసీ కోర్సుల్లో ప్రవేశాలకు నిర్వహించే టీఎస్ ఎంసెట్ పేరును మారుస్తూ ఉన్నత విద్యా మండలి నిర్ణయం తీసుకుంది. ఈ మేరకు టీఎస్ ఎంసెట్ పేరును టీఎస్ ఈఏపీసెట్‌గా మారుస్తూ ఉత్తర్వులు జారీ చేసింది. 2024-25 విద్యా సంవత్సరం నుంచి టీఎస్ ఇంజినీరింగ్, అగ్రికల్చర్ అండ్ మెడిసిన్ స్థానంలో టీఎస్ ఇంజినీరింగ్, అగ్రికల్చర్ అండ్ ఫార్మాసీగా మారుస్తున్నట్టు స్పష్టం చేసింది. ఈ నేపథ్యంలో తెలంగాణ ఉమ్మడి ప్రవేశ పరీక్షల నోటిఫికేషన్ విడుదల చేసిన ఉన్నత విద్యా మండలి అందులోనే పేరు మార్పును సైతం ప్రకటించింది.

TS Eamcet Renamed as EAPCET

టీఎస్ ఈఏపీసెట్​ను(TS EAPCET) మే 9 నుంచి 13వ తేదీ వరకు నిర్వహించనున్నట్టు ఉన్నత విద్యామండలి స్పష్టం చేసింది. మే 9 నుంచి 11 వరకు ఇంజినీరింగ్, 12, 13 తేదీల్లో అగ్రికల్చర్, ఫార్మసీ ప్రవేశాలకు పరీక్షలు నిర్వహిస్తామని తెలిపింది. జేఎన్​టీయూ హైదరాబాద్ ఆధ్వర్యంలో మొత్తం నాలుగు రోజుల పాటు టీఎస్ ఈఏపీసెట్ జరుగుతుందని పేర్కొంది. మే 6న ఈసెట్, మే 23న టీఎస్ ఎడ్​సెట్, జూన్ 3న లాసెట్, పీజీఎల్ సెట్​లు, జూన్ 4, 5 తేదీల్లో ఐసెట్ నిర్వహించనున్నట్టు తెలిపింది. ఎంటెక్, ఎంఫార్మ్ కోర్సుల్లో చేరే వారి కోసం జూన్ ఆరు నుంచి 8 వరకు పీజీ ఈసెట్, జూన్ 10 నుంచి 13 వరకు టీఎస్ పీఈసెట్ జరుగుతుందని స్పష్టం చేసింది.

Government about TS Eamcet : గత కొన్ని రోజుల నుంచి ఉన్నత విద్యామండలి ఎంసెట్​ పేరును మార్చాలని కసరత్తు చేసింది. 2017 నుంచి ఎంసెట్​లో మెడికల్​ సీట్ల భర్తీని తొలిగించగా ఎంబీబీఎస్​(MBBS), ఇతర వైద్య కోర్సులను నీట్​(NEET) ద్వారా భర్తీ చేస్తోంది. అయినప్పటకీ ఎంసెట్​ పేరులో మెడికల్​ పేరు అలాగే కొనసాగుతోందని, దాన్ని తొలగించే దిశగా ప్రభుత్వ స్థాయిలో చర్చ జరిగింది. ఈ మేరకు ఉన్నత విద్యామండలి మెడికల్​ పేరును తొలగిస్తూ ప్రభుత్వానికి ప్రతిపాదనలు పంపింది. ఎంసెట్​లో ఎం అక్షరాన్ని తొలగించి తాజాగా టీఎస్ ఈఏపీసెట్‌గా మార్చింది. టీఎస్​ ఎంసెట్​లో ఎం అంటే మెడికల్​ పేరు వస్తుందని, దానికి బదులుగా పీ అనే అక్షరాన్ని చేర్చారు. పీ అంటే ఫార్మసీ అని అర్థం. బీఫార్మసీ సీట్లను ఎంసెట్​ ద్వారానే భర్తీ చేస్తున్నందున పీ అక్షరంగా మార్చారు.

మరోవైపు పరీక్షలను పకడ్బందీగా నిర్వహించాలని, విద్యార్థులకు ఎలాంటి ఇబ్బందులు రాకుండా చూడాలని సీఎం రేవంత్​రెడ్డితో(CM Revanth Reddy)పాటు విద్యాశాఖ కార్యదర్శి బుర్రా వెంకటేశం అధికారులను ఆదేశించినట్లు సమాచారం. ఇదికాగా ఈసారి పీజీ ఇంజినీరింగ్​ సెట్​లో పరీక్ష విధానాన్ని మార్చాలని నిపుణుల కమిటీ రాష్ట్ర ఉన్నత విద్యామండలికి సిఫార్సు చేసిన విషయం తెలిసిందే.