మిణుకు మిణుకు జీవితాలు - రెచ్చిపోతున్న ముఠాలు - మారని తీరు - Unlit Street Lights In Visakha

Thousands Of Unlit Street Lights In Visakhapatnam : వైజాగ్​ నగరం కారు చీకట్లలో చిక్కుకుంది. ఏ కాలనీ చూసినా అంధకారంలో మగ్గుతున్నాయి. రోజుల తరబడి వీధి దీపాలు వెలగకపోవడంతో స్థానికులు తీవ్ర ఇబ్బందులు పడుతున్నారు. అధికారులు మాత్రం కాలనీల వైపు కన్నెత్తి చూడటం లేదని స్థానికులు ఆవేదన వ్యక్తం చేస్తున్నారు.

Thousands Of Unlit Street Lights In Visakhapatnam : జగన్​ ప్రభుత్వంలో సాగిన నిర్లక్ష్యం విశాఖవాసులకు నేటికీ శాపంగా మారింది. నగరంలో వీధి దీపాలు వెలగక ప్రజలు తీవ్ర ఇబ్బందులు పడుతున్నారు. దీంతో స్థానికుల నుంచి వ్యతిరేకత రావడంతో వార్డుల్లో తలెత్తుకోలేక కాంట్రాక్టర్లు మార్చాలంటూ కార్పొరేటర్లు పట్టుబడుతున్నారు.

చంద్రబాబు ముందుచూపు : హుద్‌హుద్‌ తుపాన్‌ (2014) సమయంలో విశాఖను పునఃనిర్మించే క్రమంలో నాటి సీఎం చంద్రబాబు ముందు చూపుతో ఆలోచించారు. విశాఖలో రూ.85 కోట్లతో 85 వేలకు పైగా ఎల్‌ఈడీ (LED) వీధి దీపాలను ఏర్పాటు చేశారు. ఏడేళ్ల పాటు ఈఈఎస్‌ఎల్‌కు(EESL) నిర్వహణ బాధ్యతలు అప్పగించారు. 2019లో అధికారంలోకి వచ్చిన వైఎస్సార్సీపీ ప్రభుత్వం బిల్లులు చెల్లించకపోవడంతో కాంట్రాక్టర్లు చేతులు ఎత్తేశారు. జీవీఎంసీ (GVMC) ఏడాదిన్నరపాటు కాంట్రాక్టర్లును నియమించలేదు. ఈ మధ్యనే ఓ సంస్థకు అప్పగించినా నిర్వహణ అంతంత మాత్రంగానే ఉంది.

మొదటి నోటీసు విషయం కమిషనర్‌కు తెలియదా? : కాంట్రాక్టర్లు నిర్వహణలో 95 శాతం వీధి దీపాలు ప్రతిరోజూ వెలగాలి. అలా జరగని పక్షంలో వీధిదీపం ఆరిపోయిన 24 గంటల తర్వాత ప్రతి రోజుకు రూ.50 చొప్పున అపరాధ రుసుం విధించాలి. ఈ క్రమంలో కాంట్రాక్టర్లు బిల్లులో కోత విధించాలి. కానీ అధికారులు కాంట్రాక్టర్లుపై చర్యలు తీసుకోలేదు. మరమ్మతుల నిమిత్తం 400 మంది కార్మికులను కాంట్రాక్టర్లు నియమించుకోవాలి. కేవలం 150 మందితో నడిపిస్తున్నారన్న ఆరోపణలు వెల్లువెత్తున్నాయి. కొందరు వైఎస్సార్సీపీ కార్పొరేటర్ల అండతోనే కాంట్రాక్టర్లుపై అధికారులు చర్యలు తీసుకోవడం లేదని తెలుస్తోంది.

విశాఖకు కొత్తగా వచ్చిన కమిషనర్‌ సంపత్‌కుమార్‌ ఐదుసార్లు నగరంలో పరిశీలించారు. చాలా చోట్ల వీధి దీపాలు వెలగడం లేదని ఆయన గుర్తించారు. ఈ విషయంపై సంబంధిత కాంట్రాక్టర్లుకు నోటీసు ఇచ్చినట్లు వెల్లడించారు. రెండు నెలల్లో పద్ధతి మార్చుకోకపోతే రెండో నోటీసు ఇస్తామని కమిషనర్​ కౌన్సిల్‌లో హెచ్చారించారు. విచిత్రమేమంటే కమిషనర్‌ రాకముందే అప్పటికే ఒక నోటీసు కాంట్రాక్టర్లు అందుకున్నారు. కొత్తగా వచ్చిన కమిషనర్​ సంపత్‌కుమార్‌ ఇచ్చిన దాంతో కలిపి రెండు నోటిస్​లు అయ్యాయి. గతంలో నోటీసు ఇచ్చిన విషయాన్ని కమిషనర్‌ సంపత్​కుమార్​ దృష్టికి అధికారులు తీసుకురాలేదు.

బాబోయ్‌ చోరీలు: నగరంలో వీధిదీపాలు వెలగని వార్డులు కొంత మంది నేరాగాళ్లుకు స్థావరంగా మారాయి. కొండవాలు ప్రాంతాల్లో కారుచీకట్లు కమ్మేయడంతో పార్కింగ్‌లో నిలిపి ఉంచిన ఆటోలు, ఇతర వాహనాల బ్యాటరీలను దొంగలు చోరీ చేస్తున్నారు. చీకటి రోడ్లపై గంజాయి బ్యాచ్‌లు తిష్టవేసి దారి దోపిడీలకు పాల్పడుతున్నారు. కొంత మంది ఆకతాయిలు యువతులు, మహిళల పట్ల అసభ్యకరంగా ప్రవర్తిస్తున్నారు. విశాఖ పోలీస్‌ కమిషనర్ శంకబ్రత బాగ్చి ఇప్పటికే హెచ్చరించినా పరిస్థితి పూర్తిగా గాడిన పడలేదు.

నగరంలో వీధిదీపాలు: 1.20 లక్షలు
వెలుగు తున్నవి: 68,000 మాత్రమే
ఏటా గుత్తేదారుకు చెల్లిస్తోంది: 7 కోట్లు రూపాయలు