'పిల్లలకు గంజాయి ఇచ్చి చోరీలు' - రక్షించాలంటూ తల్లిదండ్రుల విజ్ఞప్తి

గంజాయి ముఠా అక్రమాలకు బలవుతున్న మైనర్లు - చోరీలు చేయాలని వేధింపులు - పోలీసులను ఆశ్రయించిన తల్లిదండ్రులు

Ganja Gang Thefts With Minors in Narasaraopet: పిల్లలకు గంజాయి అలవాటు చేసి చోరీలు చేయిస్తున్న ముఠా వ్యవహారం పల్నాడు జిల్లా నరసరావుపేటలో వెలుగు చూసింది. ఈ ముఠా నుంచి రక్షించాలంటూ ఆ పిల్లల తల్లిదండ్రులు పోలీసులను ఆశ్రయించారు. అసలేం జరిగిందంటే

నరసరావుపేటలోని వరవకట్టకు చెందిన షారుక్‌, ఫరూక్​లు మైనర్లకు డ్రగ్స్​, గంజాయి అలవాటు చేస్తున్నారు. పిల్లలు దానికి బానిసలుగా మారిన తర్వాత సెల్​ఫోన్​ దొంగతనాలు చేయిస్తున్నారు. అంతేకాకుండా గంజాయి రవాణా సైతం చేయిస్తున్నారు. ఇలా చేసిన క్రమంలో రెండు నెలల క్రితం ఓ బాలుడు పోలీసులకు పట్టుబడ్డాడు. ఈ కేసులో జువైనల్​ హోంలో శిక్ష అనుభవించి ఇటీవలే విడుదలయ్యాడు.

బాలుడు బయటకు వచ్చిన తర్వాత షారుక్​, ఫరూక్​లు మళ్లీ రంగంలోకి దిగారు. మళ్లీ దొంగతనాలు చేయాలంటూ బాలుడి వెంట పడుతున్నారు. వారి వేధింపులతో విసిగిపోయిన బాలుడి తల్లిదండ్రులు పోలీసులను ఆశ్రయించారు. చోరీలు చేయకపోతే చంపేస్తామని బెదిరిస్తున్నారని వారు వాపోయారు. ఏమీ తెలియని పిల్లలను టార్గెట్​ చేసి అసాంఘిక కార్యకలాపాలకు పాల్పడుతున్నారని, వారి చెర నుంచి తమ పిల్లలను కాపాడి తగిన చర్యలు తీసుకోవాలని బాధిత తల్లిదండ్రులు వేడుకుంటున్నారు.