కుటుంబ పోషణ భారమైంది - క్షమించి డ్యూటీలోకి తీసుకోండి

తమను విధుల్లోకి తీసుకోవాలని కోరిన డిస్మిస్​, సస్పెండెడ్ అయిన ​ఆర్టీసీ ఉద్యోగులు - చిన్న చిన్న తప్పులకు పెద్ద శిక్ష భరించలేకపోతున్నామని ఆవేదన

TGSRTC Suspended Employees Request to CM and RTC MD: తప్పు చేశాం సార్ క్షమించండి. మా కుటుంబం దీనావస్థలో ఉంది. ఆర్థిక ఇబ్బందులు వెంటాడుతున్నాయి. తిరిగి ఉద్యోగంలోకి తీసుకోండి అంటూ టీజీఎస్​ ఆర్టీసీలో సస్పెండ్, తొలగించబడిన ఉద్యోగులు సీఎం రేవంత్ రెడ్డి, ఆర్టీసీ ఎండీ సజ్జనార్​లను వేడుకుంటున్నారు. తెలియకుండా తప్పులు జరిగాయంటూ కన్నీళ్లు పెట్టుకుంటున్నారు.

చిన్న చిన్న కారణాలతో తమను ఉద్యోగం నుంచి తప్పించారని ఆవేదన వ్యక్తం చేస్తున్నారు. ఉద్యోగం పోయిన తరువాత కుటుంబ పోషణ భారమైందని దీన స్థితిలో ఉన్నామని బాధితులు కన్నీరు మున్నీరవుతున్నారు. తమను తిరిగి ఉద్యోగాల్లో చేర్చుకుని తమ కుటుంబాలకు అండగా నిలవాలని ఆర్టీసీ ఉద్యోగులు కోరుతున్నారు.

బస్సు నడిపేవారు లారీ ఎక్కుతూ: తొలగించబడిన ఆర్టీసీ ఉద్యోగులు అధికారులు, కార్యాలయాల చుట్టూ తిరుగుతున్నారు. తిరిగి తమకు ఉద్యోగం కల్పించాలని అధికారులను వేడుకుంటున్నారు. ఏదో తప్పు జరిగిపోయిందని పాశ్చత్తాప పడుతున్నామని, మళ్లీ విధుల్లోకి తీసుకోవాలని వేడుకుంటున్నారు. ఇందుకోసం ఆయా డిపోలు, బస్‌ భవన్‌తో పాటు ఆర్టీసీ ఎండీ కార్యాలయం చుట్టూ తిరుగుతూ వేడుకుంటున్నారు. తమ కుటుంబాలు ఆర్థికంగా బాగోలేవని, బస్సు నడిపే తన భర్త లారీ నడుపుతున్నారని ఓ డ్రైవర్ భార్య వాపోయారు.

తానను ఉద్యోగం నుంచి తొలగించారని ఇప్పుడు ఒంటరిగా జీవిస్తున్నానని ఓ కండక్టర్ కన్నీళ్లు పెట్టుకున్నారు. ఉద్యోగం పోవడం వల్ల అనారోగ్యానికి గురై తన భార్య మంచాన పడిందని ఓ డ్రైవర్ వాపోయారు. ఒక్క అవకాశం ఇస్తే తిరిగి తాము ఉద్యోగం చేసుకుంటామని ఉద్యోగులు యాజమాన్యానికి విజ్ఞప్తి చేస్తున్నారు. గత ఆరేళ్లగా రాష్ట్రంలో దాదాపు 500 మంది వివిధ కారణాలతో ఉద్యోగాలు కోల్పోయారు. విధుల నుంచి సస్పెండ్ చేయడం, శాశ్వతంగా తొలగించడం జరిగింది. మద్యం తాగి వాహనం నడపడం, ప్రమాదాలకు కారణం కావడం వంటి కారణాలతో సస్పెండ్‌ లేదా తొలగించబడ్డారు. అయితే పొరపాటునో లేదంటే ఏమరుపాటునో తప్పు జరిగిందని కావాలని చేయలేదని బాధితులు కన్నీళ్ల పర్యంతం అవుతున్నారు.

సీఎం రేవంత్​ రెడ్డి, ఆర్టీసీ ఎండీ​లకు విజ్ఞప్తి: ఉద్యోగాలు కోల్పోయిన, సస్పెండైన బాధిత కుటుంబాలు దీనస్థితిలో ఉన్నామంటూ వేడుకుంటున్నారు. ఒక్కసారి అవకాశం ఇస్తే తప్పును సరిదిద్దుకుంటామని కోరుతున్నారు. ఆర్టీసీలో పనిచేస్తూ తొలగించబడిన ఉద్యోగులు సీఎం రేవంత్ రెడ్డి, ఆర్టీసీ ఎండీ సజ్జనార్​లను వేడుకుంటున్నారు.