హార్డ్​ డిస్క్​లు ధ్వంసం చేసి మూసీ నదిలో పడేసి - ఫోన్​ ట్యాపింగ్​ కేసులో మరో ట్విస్ట్​! - Telangana Phone Tapping Case Update

Telangana Phone Tapping Case Update : రాష్ట్రవ్యాప్తంగా ఫోన్​ ట్యాపింగ్​ కేసు సంచలనంగా మారితోంది. నిందితుల రిమాండ్​ రిపోర్టులో కీలక విషయాలు బయటపడుతున్నాయి. హార్డ్​ డిస్క్​లను ధ్వంసం చేసి మూసీ నదిలో పడేసినట్లు పోలీసులు వెల్లడించారు. అలాగే రాధాకిషన్​రావు కస్టడీ పిటిషన్​పై బుధవారం నాంపల్లి కోర్టు తీర్పును వెలువరించనుంది.

Telangana Phone Tapping Case Update : సార్వత్రిక ఎన్నికల నేపథ్యంలో రాష్ట్రవ్యాప్తంగా సంచలనం సృష్టిస్తున్న ఫోన్​ ట్యాపింగ్​ కేసు రోజుకో కొత్త మలుపు తిరుగుతోంది. ప్రధాన నిందితుడు ప్రణీత్​రావును విచారిస్తున్న పోలీసులకు కీలక వివరాలు లభ్యమయ్యాయి. హార్డ్​ డిస్క్​లను డిసెంబరు 4న మూసీలో పడేసినట్లు ప్రణీత్​రావు వెల్లడించారు. అలాగే భుజంగరావు, తిరుపతన్న రిమాండ్​ నివేదికలో నేరాన్ని అంగీకరించినట్లు పోలీసులు రిమాండ్​ రిపోర్టులో పేర్కొన్నారు. ఇంకా రిమాండ్​ రిపోర్టులో అనేక విషయాలను పోలీసులు పొందుపరిచారు.

డిసెంబరు 4వ తేదీన మూసీ నదిలో హార్డ్​డిస్కులను పడేసినట్లు ప్రణీత్​ రావు ఇచ్చిన సమాచారంతో నాగోలు వద్ద మూసీలో హార్డ్​ డిస్క్​ శకలాలను పోలీసులు సేకరించారు. మూసీ వద్ద 5 హార్డ్​ డిస్క్​ కేసులు, 9 హార్డ్​డిస్క్​ ముక్కలను స్వాధీనం చేసుకున్నారు. అలాగే మూసీలోనే 6 మెటల్​ హార్డ్​ డిస్క్​ ముక్కలను స్వాధీనం చేసుకున్నట్లు పోలీసులు వెల్లడించారు. ఎస్​ఐబీ(SIB) కార్యాలయంలోనూ పోలీసులు పలు ఆధారాలు సేకరించారు. ఎస్​ఐబీ కార్యాలయంలో 12 కంప్యూటర్లు, 7 సీపీయూలు, ప్రణీత్​రావు బృందం వాడిన ల్యాప్​టాప్​, మానిటర్లను స్వాధీనం చేసుకున్నారు.

అలాగే ఎస్​ఐబీ కార్యాలయం ఆవరణలో పాక్షికంగా కాలిన డాక్యుమెంట్లను పోలీసులు స్వాధీనం చేసుకున్నారు. ఈ కార్యాలయం సీపీ ఫుటేజీ, లాగ్​బుక్​ ప్రతులను సేకరించారు. ఎస్​ఐబీ కానిస్టేబుల్​ నరేశ్​ వాంగ్మూలం పోలీసులు నమోదు చేసుకున్నారు. విపక్ష అభ్యర్థుల డబ్బుల పంపిణీపై నిఘా పెట్టినట్లు తెలిపారు. ప్రైవేటు వ్యక్తులపై అక్రమంగా భుజంగరావు, తిరుపతన్న నిఘా పెట్టినట్లు వెల్లడించారు.

Radha Krishnarao on Phone Tapping Case : అంతకు ముందు టాస్క్​ఫోర్స్​ మాజీ డీసీపీ రాధాకిషన్​రావు కస్టడీ పిటిషన్(Radhakishan Rao Custody Petition)​పై నాంపల్లి కోర్టులో విచారణ జరిగింది. ఈ పిటిషన్​పై నాంపల్లి కోర్టు బుధవారం తీర్పును వెలువరించనుంది. ఫోన్​ ట్యాపింగ్​ కేసులో అదనపు ఎస్పీలు భుజంగరావు, తిరుపతన్నకు ఐదు రోజుల పోలీసు కస్టడీ ముగిసింది. వీరికి ఈ నెల 6 వరకు రిమాండ్​ను నాంపల్లి కోర్టు విధించింది. దీంతో ఇద్దరు నిందితులనూ చంచల్​గూడ జైలుకు పోలీసులు తరలించారు. వీరిద్దరినీ ఐదు రోజులు విచారించిన పోలీసులు వారి నుంచి కేసుకు సంబంధించిన వివరాలను రాబట్టినట్లు సమాచారం. ఉన్నతాధికారులు చెప్పినట్లే చేశామని వారిద్దరూ పోలీసుల కస్టడీలో వెల్లడించినట్లు తెలుస్తోంది.