ముస్లింల సంక్షేమాన్ని వైసీపీ ప్రభుత్వం పూర్తిగా విస్మరించింది: శాసన మండలి మాజీ ఛైర్మన్ షరీఫ్

TDP Minorities Meet in Parchur: ముస్లింల సంక్షేమాన్ని వైసీపీ ప్రభుత్వం పూర్తిగా విస్మరించిందని శాసన మండలి మాజీ ఛైర్మన్ షేక్ షరీఫ్ ధ్వజమెత్తారు. బాపట్ల జిల్లా పర్చూరులో నిర్వహించిన తెలుగుదేశం పార్టీ మైనార్టీ ఆత్మీయ సదస్సులో షరీఫ్, ఎమ్మెల్యే ఏలూరి సాంబశివరావు పాల్గొన్నారు. జగన్ ఇచ్చిన హామీలను మర్చిపోయి ముస్లింలను దగా చేశారని ఆగ్రహం వ్యక్తం చేశారు. టీడీపీ హయాంలో చంద్రబాబు ముస్లింల అభ్యున్నతికి అహర్నిశలు శ్రమించారని ఏలూరి గుర్తుచేశారు.

TDP Minorities Meet in Parchur: రాష్ట్రంలోని ముస్లింల సంక్షేమాన్ని వైసీపీ ప్రభుత్వం పూర్తిగా విస్మరించిందని, సీఎం జగన్ కనుసన్నల్లోనే ముస్లింలపై దాడులు పెరిగాయని శాసన మండలి మాజీ ఛైర్మన్ షేక్ షరీఫ్ తీవ్ర ఆగ్రహం వ్యక్తం చేశారు. బాపట్ల జిల్లా పర్చూరులో టీడీపీ ముస్లిం మైనార్టీ ఆత్మీయ సదస్సు నిర్వహించారు. ఈ సందర్భంగా షరీఫ్ మాట్లాడుతూ ముస్లిం ఓట్లతో అధికారంలోకి వచ్చిన వైసీపీ వారికి తీవ్ర అన్యాయం చేసిందని మండిపడ్డారు.

వైసీపీ పాలనలో దాడులు, దౌర్జన్యాలు పెరిగాయని, ఓట్ల కోసం ఇప్పుడు ముస్లింలు తమ సోదరులంటూ ముఖ్యమంత్రి జగన్ ముసలి కన్నీరు కారుస్తున్నారని ఎద్దేవా చేశారు. తమ అభ్యున్నతిని విస్మరించి మొండిచేయి చూపారని, టీడీపీ హయాంలో అమలు చేసిన అభివృద్ధి, సంక్షేమ పథకాలన్నీ ఆపివేశారని అన్నారు. జగన్ అధికారంలోకి వచ్చాక ఇచ్చిన హామీలన్నీ మర్చిపోయి దగా చేశారని మండిపడ్డారు. రాష్ట్రంలో 100 మందికిపైగా తమ వర్గీయులపై దాడులు, హత్యలు జరిగాయని, ఇందుకు వైసీపీ నాయకుల వేధింపులే కారణమని ఆరోపించారు.

సీఎం జగన్ తప్పుడు వ్యాఖ్యలతో టీడీపీకి ముస్లింలను దూరం చేసేందుకు ప్రయత్నిస్తున్నారని అన్నారు. ముస్లింల కోసం టీడీపీ అనేక పథకాలను అమలు చేసిందని గుర్తు చేశారు. ముస్లింల కోసం ఇస్లామిక్ బ్యాంక్ పెడతానన్న జగన్ మోహన్ రెడ్డి, తీరా గెలిచిన తరువాత అయిదేళ్లుగా దాని గురించే పట్టించుకోవడం లేదని మండిపడ్డారు. జగన్ హామీలు ఏవీ అమలుకు నోచుకోలేదని పేర్కొన్నారు.

టీడీపీ బాపట్ల జిల్లా అధ్యక్షుడు, ఎమ్మెల్యే ఏలూరి సాంబశివరావు మాట్లాడుతూ తెలుగుదేశం పార్టీ హయాంలో చంద్రబాబు ముస్లింల అభ్యున్నతికి అహర్షిశలు శ్రమించారని, అనేక రకాలుగా అభివృద్ధి ఫలాలు అందించారని గుర్తుచేశారు. 300కు పైగా షాదీఖానాలను అత్యాధునిక హంగులతో నిర్మించారన్న ఏలూరి సాంబశివరావు, రాష్ట్రాభివృద్ధి టీడీపీతోనే సాధ్యమన్నారు.

జగన్ మోహన్ రెడ్డిని ఇంటికి పంపించడం ఖాయమని, మళ్లీ టీడీపీ - జనసేన ప్రజాప్రభుత్వం ఏర్పడుతుందని ఏలూరి తెలిపారు. 2024 ఎన్నికల్లో వైసీపీ ఘోరంగా ఓడిపోతుందని జోస్యం చెప్పారు. నియోజకవర్గలో తన దృష్టికి వచ్చిన ప్రతి సమస్యని పరిష్కరించాని అన్నారు. వైసీపీ ప్రభుత్వం ముస్లింలకు ఇచ్చిన హామీలను మరిచారని, మైనార్టీలను దగా చేశారని విమర్శించారు. అతిథులకు ముస్లిం నేతలు ఘన స్వాగతం పలికారు. తెలుగుదేశం పార్టీ నేతలు జమాలుద్దీన్, షేక్ షంషుద్దీన్, టీడీపీ కార్యకర్తలు పాల్గొన్నారు.

"ముస్లింల కోసం టీడీపీ అనేక పథకాలను అమలు చేసింది. ముస్లింల కోసం ఇస్లామిక్ బ్యాంక్ పెడతానన్న జగన్ మోహన్ రెడ్డి, తీరా గెలిచిన తరువాత అయిదేళ్లుగా దాని గురించే పట్టించుకోవడం లేదు. జగన్ హామీలు ఏవీ అమలుకు నోచుకోలేదని పేర్కొన్నారు. అవన్నీ అసత్యపై హామీలు". - షేక్ షరీఫ్, శాసన మండలి మాజీఛైర్మన్