Road Accidents in Andhra Pradesh Today : ఏపీలోని తిరుపతి, కృష్ణా జిల్లాల్లో జరిగిన రెండు రోడ్డు ప్రమాదాల్లో ఎనిమిది మంది దుర్మరణం పాలయ్యారు. తిరుపతి జిల్లా చంద్రగిరి మండలం ఎం.కొంగరవారిపల్లి వద్ద పూతలపట్టు-నాయుడుపేట జాతీయ రహదారిపై కారు డివైడర్‌ను ఢీ కొట్టింది. ఈ ప్రమాదంలో నలుగురు మృతి చెందారు. కృష్ణా జిల్లా బాపులపాడు మండలంలో లారీని కారు ఢీకొని మరో నలుగురు దుర్మరణం పాలయ్యారు. అనకాపల్లి జిల్లా న్యాయంపూడి వద్ద గుర్తుతెలియని వాహనం ఢీకొని వ్యక్తి మృతి చెందాడు.
Car Accident In Tirupati : తిరుపతి జిల్లాలో జరిగిన ఘోర రోడ్డు ప్రమాదంలో నలుగురు దుర్మరణం పాలయ్యారు. నెల్లూరు నుంచి వేలూరుకు వెళ్తున్న కారు తిరుపతి జిల్లా చంద్రగిరి మండలం కొంగరవారిపల్లి పూతలపట్టు, నాయుడుపేట జాతీయ రహదారిపై డివైడర్‌ను ఢీకొట్టింది. ఈ ప్రమాదంలో నలుగురు మృతి చెందగా ఇద్దరు తీవ్రంగా గాయపడ్డారు. సమాచారం అందుకున్న పోలీసులు ఘటనాస్థలికి చేరుకుని విచారణ చేస్తున్నారు. పూతలపట్టు-నాయుడుపేట హైవేపై మరో ప్రమాదం జరిగింది. తిరుపతి జిల్లా చంద్రగిరి మండలం సి.మల్లవరం వద్ద డివైడర్‌ను ఢీకొని రోడ్డుపైకి కారు దూసుకెళ్లింది. నిప్పురవ్వలు చెలరేగి కారుకు మంటలు అంటుకోగా అందులో ఉన్న ఇద్దరు అప్పటికే స్వల్పగాయాలతో బయటపడ్డారు.
Road Accident In Krishna : మరో ఘటనలో కృష్ణా జిల్లా బాపులపాడు మండలం కోడూరుపాడు హెచ్‌పీ పెట్రోల్ బంక్ సమీపంలో లారీని కారు ఢీకొట్టింది. ఈ ప్రమాదంలో నలుగురు అక్కడిక్కడే మృతి చెందారు. ఒకరు తీవ్రంగా గాయపడ్డారు. కాకినాడ జిల్లా జగ్గంపేట మండలం రామవరం వద్ద కారు ప్రైవేటు ట్రావెల్స్‌ బస్సు ఢీకొని ఇద్దరు మరణించారు. మృతులు విశ్రాంత జడ్జి వి.మోహన్కుమార్, శ్రీనుగా పోలీసులు గుర్తించారు. మోహన్కుమార్ ఏపీ రెరా ఎడ్జ్యూడికేటింగ్ అధికారిగా ప్రస్తుతం కొనసాగుతున్నారు.
