Man in Nizamabad Living Without Eating Rice since 50 years : సాధారణంగా అందరూ మార్నింగ్ టిఫిన్, ఆఫ్టర్నూన్ లంచ్, ఈవెనింగ్ స్నాక్స్, నైట్ మళ్లీ డిన్నర్ అంటూ తింటుంటాం. భారతీయుల ఆహారంలో అయితే అన్నం, రోటీ చాలా ముఖ్యమైనవి. ఇటీవల మారుతున్న జీవనశైలితో జంక్ ఫుడ్ వినియోగం కూడా చాలా పెరిగింది. మూడు పూటలు తింటేనే బలంగా, ఆరోగ్యంగా ఉంటామని అన్నం తింటారు కొందరు. మరికొందరు ఉదయం అల్పాహారం చేసి, మధ్యాహ్నం అన్నం, రాత్రికి రోటీ లేదా చపాతీ తింటారు. ఇలా రకరకాలుగా ఫుడ్ డైట్ ప్లాన్ చేసుకుంటూ కనీసం ఒక్కపూట అయినా అన్నం తింటారు. ఓ విశ్రాంత ఉపాధ్యాయుడు మాత్రం 50 ఏళ్లుగా అన్నం లేకుండా కేవలం పండ్లు, పాలు, నీళ్లతోనే కడుపు నింపుకుంటున్నారు అంటే నమ్ముతారా? కానీ ఇది నిజమేనండి.
నిజామాబాద్‌ జిల్లా జక్రాన్‌పల్లి మండలం కొలిప్యాక్‌ గ్రామానికి చెందిన రిటైర్డ్ టీచర్ లొక్కిడి గంగారాం (72) 50 ఏళ్లుగా ఇవేవీ ఎరగకుండానే జీవిస్తున్నారు. 1971లో అజీర్తి సమస్య వల్ల అన్నం మానేశారు. దీంతో అప్పటి నుంచి నీళ్లు, పళ్లు, పాలు, అప్పుడప్పుడు పల్లీలతోనే కడుపు నింపుకొంటున్నారు. 1972లో ప్రభుత్వ ఉపాధ్యాయుడిగా ఉద్యోగం పొందిన ఆయన, 2004లో ప్రధానోపాధ్యాయుడిగా పదవీ విరమణ పొందారు. తరువాత నిజామాబాద్‌ జిల్లా జక్రాన్‌పల్లిలోని మనోహరాబాద్‌ గ్రామ శివారులో ఓ ఎకరం స్థలం కొని పాండురంగ ఆశ్రమాన్ని ఏర్పాటు చేశారు.
ఇప్పటివరకు ఎలాంటి సమస్య తలెత్తలేదు : గంగారాం కుమారుడు ఓ ప్రమాదంలో చనిపోగా, భార్య పచ్చలనడ్కుడ గ్రామంలో ఉంటున్నారు. దీంతో లొక్కిడి గంగారాం ఒక్కరే ఆశ్రమంలో ఉంటూ ఆధ్యాత్మిక చింతనలో కాలం గడుపుతున్నారు. అన్నం తినకపోవడం వల్ల తనకు ఎలాంటి సమస్యలు ఇప్పటివరకు తలెత్తలేదని, పూర్తిగా ఆరోగ్యంగా ఉన్నానని చెప్పారు. ప్రస్తుతం ఇది సోషల్ మీడియాలోనూ వైరల్గా మారింది. 50 ఏళ్లుగా అన్నం లేకుండా కేవలం పండ్లు, పాలు ఆరగిస్తూ ఎలా ఉంటున్నారంటూ నెటిజన్లు కామెంట్లు చేస్తున్నారు. పండ్లు తింటూ ఆరోగ్యంగా కూడా ఉండొచ్చు కానీ, ఎప్పటికీ అన్నం లేకుండా ఉండలేమేమోనని మరికొందరు అభిప్రాయపడుతున్నారు.
10 నిమిషాల్లో భోజనం కంప్లీట్ చేసేస్తున్నారా? - ఆ ఆరోగ్య సమస్యలు తప్పవంటున్న నిపుణులు!
