త్రీడి టెక్నాలజితో ఏనుగుల కట్టడి - విద్యార్థిని అభినందించిన ఎమ్మెల్యే

త్రీడీ సాంకేతికతతో ఏనుగులను కట్టడి చేయొచ్చంటున్న ఇంజనీరింగ్ విద్యార్థిని రజిని - లేజర్‌ టెక్నాలజీతో పరికరాన్ని తయారు చేసినట్లు వెల్లడి

MLA Appreciation For Engineering Student In Chittoor District: త్రీడీ సాంకేతికతను వినియోగించి ఏనుగులను కట్టడి చేయొచ్చని ఓ ఇంజినీరింగ్‌ విద్యార్థిని రూపొందించిన ప్రాజెక్టు అందరి ప్రశంసలను చూరగొంది. పలమనేరు పురపాలిక పరిధిలోని గొబ్బిళ్లకోటూరుకు చెందిన రజిని వేము ఇన్‌స్టిట్యూట్‌ ఆఫ్‌ టెక్నాలజీలో ట్రిపుల్‌ ఈ చదువుతోంది. అయితే ఏనుగులు ఎక్కువగా భయపడే అంశాలు (తేనెటీగలు, నిప్పు, పులి, సింహం) సమగ్రంగా అధ్యయనం చేసి మరీ ఈ పరికరాన్ని తయారు చేసినట్లు ఆమె వెల్లడించింది.

లేజర్‌ టెక్నాలజీతో త్రీడీ బొమ్మలను ప్రదర్శించి వాటిని దారి మళ్లించవచ్చని రజిని వివరించారు. పొలాల్లో సైతం కెమెరా అమర్చి చరవాణి ద్వారా ఆపరేట్‌ చేయవచ్చన్నారు. తక్కువ ఖర్చుతో తయారు చేసిన ఈ పరికరం ద్వారా ఏనుగులను దూరంగా తరమొచ్చని విద్యార్థిని పేర్కొన్నారు. ఆమె గురువారం ఎమ్మెల్యే అమరనాథరెడ్డిని కలిసి తన ప్రాజెక్టు నమూనాను చూపారు. ప్రాజెక్టు విషయాన్ని ఎమ్మెల్యేకు వివరించింది. విద్యార్థిని వినూత్న సృజనకు ఫిదా అయిన ఎమ్మెల్యే ఆమెను అభినందించారు.