మీ పిల్లలను తరుచూ వ్యాధులు వేధిస్తున్నాయా - రాకుండా ఉండాలంటే పోషకాహారం తప్పనిసరి - Tips to Growth Children Physically

Tips to Growth Children Physically : ఎదిగే చిన్నారులకు సరైన సమయానికి పోషకాహారం అందితేనే రోగనిరోధక శక్తి పెరిగి వారు ఆరోగ్యంగా ఉంటారు. అయితే పిల్లలకు పోషకాలున్న ఆహార పదార్థాలు పెట్టాలని డాక్టర్లు సూచిస్తున్నారు. తద్వారా వారి శారీరక ఎదుగుదలతో పాటు మానసిక వికాసానికి దోహదం చేస్తుందని తెలిపారు. మరి వేటిలో పోషకాలు ఎక్కువ ఉంటాయో తెలుసా?

Children Health and Food Tips : పిల్లల విషయంలో తల్లిదండ్రులు ప్రత్యేకమైన శ్రద్ధ తీసుకుంటారు. ఆరోగ్యం, ఆహార అలవాట్లు అన్ని విషయాల్లోనూ జాగ్రత్తలు తీసుకుంటారు. అయితే పిల్లల ఎదుగుదలలో ఆహారం ముఖ్య పాత్ర వహిస్తుంది. చిన్నారులు ఆరోగ్యంగా, దృఢంగా ఎదగడానికి ప్రతిరోజూ తగినంత పోషకాహారం అవసరం అవుతుంది. చిన్నపిల్లల విషయంలో ఇది ఎక్కువ అవసరం. ఎందుకంటే 6 నెలల వయస్సులో పెరుగుదల వేగంగా ఉంటుంది. ఈ సమయంలో ఎక్కువ శక్తి, పోషకాలు అవసరం అవుతాయి.

పప్పులన్నీ కలిపి పొడిలా చేసి : బియ్యం, పప్పుతో కలిపి వండితే చాలా రుచిగా ఉంటుంది. దీంతో పిల్లలు తినడానికి ఇష్టపడతారు. పప్పులు, ధాన్యాల్లో ప్రొటీన్‌ పుష్కలంగా ఉంటుంది. ఇది బరువు పెరిగేందుకు సహాయపడుతుంది. ఇందులో ఉండే విటమిన్స్, మినరల్స్, కార్బోహైడ్రేట్‌ ఆరోగ్యకరంగా ఉండేలా ఉపయోగపడుతాయి. రోజూ కొద్దిగా వీటిని ఉడికించి పిల్లలకు ఉగ్గులా చేసి తినిపించాలి. అంగన్‌వాడీ కేంద్రాల్లో ఇచ్చే బాలామృతం, బాలామృతం ప్లస్‌ను చిన్నారులకు తప్పకుండా అందించాలి. అవగాహన లేక కొందరు తల్లిదండ్రులు వీటిని ఇవ్వట్లేదు.

అరటి పండ్లు,సేపు పండ్లు : పిల్లలకు రోజూ అరటిపండును తినిపించాలి. పిల్లల్లో మలబద్ధక సమస్యను తగ్గించడంలో అరటిపండు బాగా పనిచేస్తుంది. దీనిలో ఐరన్, మెగ్నీషియం, పొటాషియం వంటి మినరల్స్‌ ఉంటాయి. సీజనల్‌గా లభించే పండ్లను తప్పనిసరి తినిపించాలి. రోజుకు ఒక తాజా పళ్లరసాలు పిల్లలకు తాగిపించడం వల్ల పోషకాహార లోపం అధిగమించడానికి వీలు కలుగుతుంది. వీటిలో ఉండే యాంటీఆక్సిడెంట్లు, ఫైటోన్యూట్రియంట్స్‌ ఎదిగే పిల్లల మానసిక వికాసానికి ఎంతగానో దోహదపడతాయి. యాపిల్​ పండ్లను ఉడికించి పెడితే పిల్లలకు కావాల్సిన పోషకాలు అందుతాయి.

పిల్లలకు రోగనిరోధకశక్తి పెరిగేలా : కూరగాయలు, పండ్లతో తయారుచేసిన సూప్‌లను పిల్లలకు తాగించాలి. వీటిలోని పోషకాలు వారి రోగనిరోధక శక్తిని పెంచుతాయి. పెరుగు కూడా పిల్లలకు చక్కటి ప్రొబయోటిక్‌గా ఉపయోగపడుతుంది. ప్రోటీన్లు అధికంగా ఉంటాయి. ఇవి పిల్లల జీర్ణక్రియ మెరుగవ్వడానికి సహాయపడుతుంది. అంతే కాకుండా ఎముకలను, దంతాలను బలంగా మారుస్తుంది.

"పిల్లలకు రోగనిరోధకశక్తి తగ్గితే అనేక రోగాలు దరి చేరుతాయి. తరచూ జలుబు, జ్వరం వంటి సమస్యలు వెలుగుచూస్తాయి. ఈ సమస్యను అధిగమించేందుకు పిల్లలకు పోషకాలున్న ఆహార పదార్థాలు పెట్టాలి. సీజనల్‌ పళ్లను తప్పనిసరిగా తినిపించాలి." _డా.శ్రీనివాస్, పిల్లల వైద్య నిపుణుడు-కామారెడ్డి జిల్లా ఆసుపత్రి