అస్వస్థతకు గురై ఆస్పత్రిలో చికిత్స పొందుతున్న విద్యార్థులకు పురుగుల అల్పాహారం

పాఠశాలలో భోజనం వికటించి ఆస్పత్రిలో చికిత్స పొందుతున్న విద్యార్థులకు మళ్లీ పురుగులు ఉన్న అల్పాహారం - ఆందోళనలో తల్లిదండ్రులు

Students Parents Protest over Poor quality Food in Hospital : వసతి గృహాల్లోని విద్యార్థులు ఆందోళన చేసే పరిస్థితి తీసుకువచ్చే వారిపై కఠిన చర్యలు చేపట్టాలని సీఎం రేవంత్‌రెడ్డి హెచ్చరికలు చేసినా పరిస్థితిలో మార్పురావడం లేదు. నారాయణపేట మాగనూర్‌ ప్రభుత్వ పాఠశాలలో భోజనం వికటించి ఆస్పత్రిలో చికిత్స పొందుతున్న విద్యార్థులకు పెట్టిన అల్పాహారంలో పురుగులు రావడంతో తల్లితండ్రులు ఆందోళనకు గురయ్యారు. చికిత్స అందిస్తారని ఆస్పత్రికి వస్తే ప్రాణాలు పోయే పరిస్థితికి తీసుకువచ్చారంటా ఆవేదన వ్యక్తం చేశారు. పాఠశాలలలో ఘటనకు బాధ్యత వహిస్తూ ఇద్దరిపై వేటువేయడాన్ని నిరసిస్తూ విద్యార్థులు ఆందోళనకు దిగడంతో ఉన్నతాధికారులు వెనక్కి తగ్గారు.

నారాయణపేట జిల్లా మాగనూర్ ప్రభుత్వ పాఠశాలలో మధ్యాహ్న భోజనం వికటించి విద్యార్థులు అస్వస్థతకు గురైన ఘటనపై పూర్తివివరాలు సేకరించాలన్న సీఎం రేవంత్‌రెడ్డి ఆదేశాలతో యంత్రాంగంలో కదలిక వచ్చింది. పాఠశాలను తనిఖీ చేసిన జిల్లా కలెక్టర్ సిక్తా పట్నానాయక్, విద్యార్థులు, సిబ్బందిని కలిసి ఘటనపై వివరాలు సేకరించారు. అనంతరం పాఠశాలలోని వంట సామాగ్రి, బియ్యం, సరుకులు తనిఖీ చేసి సిబ్బందికి పలు సూచనలు చేశారు. పాఠశాలలోని ఏజెన్సీని తొలగించి కొత్తవారిని నియమించినట్లు తెలిపారు. సరుకుల నమూనా తీసుకొని ఆహార తనిఖీ శాఖకు నివేదించినట్లు కలెక్టర్‌ చెప్పారు. ఇక నుంచి ప్రతి బడిలో ఆహారాన్ని ముందుగా పరిశీలించి విద్యార్థులకు అందజేస్తామని అన్నారు.

అల్పాహారంలోనూ పురుగులు : మధ్యాహ్న భోజనం వికటించి మహబూబ్‌నగర్ జిల్లా జనరల్ ఆసుపత్రిలో చికిత్స పొందుతున్న విద్యార్థులకు అందించిన అల్పాహారంలోనూ పురుగులు రావడంతో పిల్లల తల్లిదండ్రులకు మళ్లీ ఆందోళనకు గురిచేసింది. అస్వస్థతతో చికిత్స కోసం వస్తే నాణ్యమైన భోజనం అందించకుండా ఇక్కడా పురుగుల అన్నం పెట్టారని విద్యార్థులతో పాటు వారి తల్లిదండ్రులు వాపోయారు. అల్పాహారంలో పురుగులు ఉన్నాయని ముందుగా ఓ విద్యార్థి గమనించి విధుల్లోని సిబ్బందికి చెప్పగా మిగతా విద్యార్థులు తినకుండా జాగ్రత్తలు పడినట్టు పేర్కొన్నారు.

'ఫుడ్​ పాయిజన్​ వల్ల చాలామంది వాంతులు చేసుకున్నారు. ఆసుపత్రిలో అల్పాహారంలో పురుగులు ఉన్నాయి. మళ్లీ వేరే అల్పాహారం తీసుకొచ్చి ఇచ్చారు. స్కూల్​లో అన్నంలో పురుగులు, మళ్లీ ఆసుపత్రిలో కూడా పురుగులు ఉన్న అల్పాహారం పెట్టారు'- విద్యార్థులు

ఈ ఘటనపై స్పందించిన కేటీఆర్,​ విద్యార్థులకు సరైన ఆహారం అందించలేరు గానీ మహిళలను కోటీశ్వరులను చేస్తారట అంటూ ​ఎద్దేవా చేశారు. రోజుకో గురుకుల పాఠశాలలో ఆహారం వికటించి విద్యార్థులు అస్వస్థతకు గురవుతున్నా సర్కారు మొద్దునిద్ర పోతోందంటూ ఎక్స్‌ వేదికగా విమర్శించారు. ప్రభుత్వ ఆసుపత్రిలో చికిత్స పొందుతున్న విద్యార్థులని మాజీ ఎమ్మెల్యే చిట్టెం రామ్మోహన్‌రెడ్డితో కలిసి మాజీమంత్రి శ్రీనివాస్‌గౌడ్‌ పరామర్శించారు. గురుకులాల్లో విద్యార్థులు అస్వస్థతకు గురవుతున్నా ప్రభుత్వం పట్టించుకోవడం లేదని విమర్శించారు. ఉదయం కలెక్టర్‌ పరిశీలించిన తర్వాత, మధ్యాహ్నం పాఠశాలలో పెట్టిన భోజనంలో మరోమారు పురుగులు రావడంతో విద్యార్థులు ధర్నాకు దిగారు. అధికారులు సర్దిచెప్పగా విరమించారు.

విద్యార్థుల ఆందోళన : బయట నుంచి అరటి పళ్లు తెప్పించి చిన్నారులకి అందించారు. మధ్యాహ్న భోజనంలో వాడిన బియ్యం ముక్కిపోవడంతో వెనక్కి పంపించినట్లు అధికారులు తెలిపారు. ఘటనకు బాధ్యతగా మాగనుర్ మండల విద్యాధికారి మురళీధర్ రెడ్డి, ఇన్‌ఛార్జీ హెడ్‌మాస్టర్‌గా వ్యవహరిస్తున్న ప్రధానోపాధ్యాయుడు బాపురెడ్డిపై ఉన్నతాధికారులు వేటు వేశారు. అధికారులపై వేటు వేయడాన్ని నిరసిస్తూ జాతీయ రహదారిపై విద్యార్థులు ఆందోళనకు దిగారు. సస్పెన్షన్ ఎత్తివేసి తిరిగి విధుల్లోకి తీసుకోవాలని డిమాండ్‌ చేశారు. విద్యార్థుల వద్దకు వెళ్లిన జిల్లా విద్యాశాఖ వారితో చర్చలు జరిపారు సస్పెన్షన్ ఎత్తివేసి విధుల్లోకి తీసుకుంటామన్న హామీతో వారు ఆందోళన విరమించారు.