అవినాష్​రెడ్డి పీఏ రాఘవరెడ్డి ఎక్కడ? - జల్లెడ పడుతున్న పులివెందుల పోలీసులు

కడప ఎంపీ వైఎస్‌ అవినాష్‌రెడ్డి పీఏ రాఘవరెడ్డి కోసం గాలింపు

Police Focus on YS Avinash Reddy PA : వైఎస్ఆర్ జిల్లా పులివెందుల పోలీస్ స్టేషన్​లో నమోదైన అట్రాసిటీ కేసులో అనుమానితుల కోసం పోలీసులు గాలిస్తున్నారు. ఈ క్రమంలోనే కడప ఎంపీ వైఎస్​ అవినాష్ ​రెడ్డి పీఏ రాఘవరెడ్డి కోసం గాలింపు చేపట్టారు. ఈ నెల 8న వైఎస్సార్సీపీ సామాజిక మాధ్యమ కార్యకర్త వర్రా రవీందర్​రెడ్డితోపాటు సజ్జల భార్గవ్​రెడ్డి, అర్జున్​రెడ్డిపై అట్రాసిటీ కేసులు నమోదైన విషయం తెలిసిందే.

ఇప్పటికే ఈ కేసులో పులివెందుల పోలీసులు వర్రా రవీందర్‌రెడ్డిని అరెస్ట్ చేశారు. వైఎస్ షర్మిల, వైఎస్ సునీత, వైఎస్​ విజయమ్మపైన వర్రా రవీందర్​రెడ్డి అసభ్యకరమైన పోస్టులు పెట్టిన విషయం తెలిసిందే. అతను ఇచ్చిన వాంగ్మూలంలో వైఎస్ అవినాష్​ రెడ్డి పీఏ రాఘవరెడ్డిని పేరును ప్రస్తావించాడు. అవినాష్​ రెడ్డి పీఏ ఇచ్చిన కంటెంట్​ని తాను సామాజిక మాధ్యమాల్లో పోస్ట్ చేశానని వర్రా పోలీసులకు తెలిపాడు. ఈ మేరకు రాఘవరెడ్డి కోసం పులివెందుల, లింగాల మండలాల్లో గాలిస్తున్నారు. అతడి స్వగ్రామం అంబకపల్లెలో పోలీసులు నిఘా పెట్టారు.