వైఎస్ అవినాష్ రెడ్డి పీఏ పరార్! - 'వర్రా' కేసులో రాఘవరెడ్డి ఇంటికెళ్లిన పోలీసులు

వర్రా రవీందర్ రెడ్డితో అవినాష్ పీఏ ఛాటింగ్ చేసినట్లు గుర్తించిన పోలీసులు - ఇంటికి వెళ్లేసరికి అజ్ఞాతంలోకి !

Police on MP Avinash Reddy PA House : కడప ఎంపీ వైఎస్ అవినాష్ రెడ్డి PA రాఘవరెడ్డిని అదుపులోకి తీసుకునేందుకు పులివెందుల పోలీసులు ఆయన ఇంటికి వెళ్లారు. పులివెందుల అర్బన్ ఎస్ఐ జీవన రంగనాథ ఆధ్వర్యంలో పోలీసు బృందాలు రాఘవరెడ్డి ఇంటికి వెళ్లాయి. వైఎస్సార్సీపీ సామాజిక కార్యకర్త వర్రా రవీందర్ రెడ్డి తప్పించుకున్న సమయంలో అతనితో రాఘవరెడ్డి ఛాటింగ్ చేసినట్లు పోలీసులు గుర్తించారు. ఈ అంశంపై రాఘవరెడ్డిని ఆదుపులోకి తీసుకొని విచారించాలని పోలీసులు ఆయన ఇంటికి వెళ్లారు. విషయం తెలుసుకున్న రాఘవరెడ్డి అజ్ఞాతంలోకి వెళ్లిపోయినట్లు సమాచారం. ఆయన ఇంటి లోపల సోదాలు చేసి కుటుంబ సభ్యులతో పోలీసులు మాట్లాడారు. రాఘవరెడ్డి కుటుంబ సభ్యుల వెంట లాయర్ ఓబులరెడ్డి కూడా అక్కడికి చేరుకున్నారు. రాఘవరెడ్డి ఇంటికి వచ్చిన వెంటనే తమకు సమాచారం అందించాలని పోలీసులు ఆదేశించి వెనుదిరిగారు.

సోషల్‌ మీడియా సైకో : పులివెందులకు చెందిన వైఎస్సార్సీపీ సామాజిక మాధ్యమ కార్యకర్త, సోషల్‌ మీడియా సైకోగా పేరొందిన వర్రా రవీందర్‌రెడ్డి కోసం వైఎస్సార్‌ జిల్లా పోలీసుల గాలింపు చర్యలు కొనసాగుతోంది. 4 ప్రత్యేక బృందాలుగా ఏర్పడి వర్రా రవీందర్​ రెడ్డి ఆచూకీ కోసం యత్నిస్తున్నాయి. చంద్రబాబు, లోకేశ్, పవన్ కల్యాణ్, అనితతో పాటు షర్మిల, సునీత, విజయమ్మలపై గత ఐదేళ్లుగా అసభ్యకరమైన పోస్టులు పెడుతున్న రవీందర్ రెడ్డిని వైఎస్సార్సీపీ ప్రభుత్వం వెనకేసుకొచ్చింది. కూటమి ప్రభుత్వం వచ్చాక అతనిపై చర్యలకు ఉపక్రమించింది. రెండు రోజుల కిందట అతన్ని అదుపులోకి తీసుకొని మరో కేసులో అప్పగించే క్రమంలో పోలీసుల నిర్లక్ష్యంతో అతను తప్పించుకుని పారిపోయాడు.

4 ప్రత్యేక బృందాల గాలింపు : పరారైన రవీందర్ రెడ్డిని పట్టుకోవాలని ప్రభుత్వం నుంచి ఆదేశాలు రావడంతో అతనికోసం పోలీసులు గాలింపు చర్యలు ముమ్మరం చేశారు. ఈ ఘటనలో జిల్లా ఎస్పీ హర్షవర్ధన్ రాజు, సీఐ తేజ మూర్తి పైన వేటు పడింది. కొత్తగా వచ్చిన ఎస్పీ విద్యాసాగర్ 4 ప్రత్యేక బృందాలు ఏర్పాటు చేసి రవీందర్ రెడ్డిని పట్టుకోవడానికి శతవిధాలా ప్రయత్నం చేస్తున్నారు. కడప, పులివెందుల, కమలాపురంతోపాటు హైదరాబాద్, బెంగళూరుకు కూడా వెళ్లి పోలీసులు గాలిస్తున్నాయి. వైఎస్సార్సీపీ ఎంపీ అవినాష్‌రెడ్డికి ప్రధాన అనుచరుడిగా ఉన్న వర్రా రవీందర్‌రెడ్డిపై కడప, రాజంపేట, మంగళగిరి పోలీస్‌స్టేషన్లలో కేసులు నమోదయ్యాయి.