డబ్బులు వెంటబెట్టుకుని ఆ రూట్​లో వెళ్తున్నారా? - అధికారులు పట్టుకుంటారు జాగ్రత్త!

మహారాష్ట్రలో ఈ నెల 20న అసెంబ్లీ ఎన్నికలు - తెలంగాణ, మహారాష్ట్ర సరిహద్దుల్లో చెక్‌ పోస్టులు - రూ.50 వేలకు మించి ఎక్కువ డబ్బు ఉంటే సీజ్ చేస్తున్న అధికారులు

Police Checking over Election Code in Maharashtra : ఎన్నికలు అనగానే హడావిడి మొదలవుతుంది. నాయకులు, కార్యకర్తలు ఆ జోష్‌లో మునిగి తేలుతారు. ఓటర్లను మభ్యపెట్టేందుకు మద్యం ప్రవాహం ఏరులై పారుతుంది. డబ్బులతో ఓటర్లను ప్రలోభాలకు గురి చేస్తుంటారు. మహారాష్ట్రలో ఈ నెల 20న అసెంబ్లీ ఎన్నికలు జరగనున్నాయి. ఈ నేపథ్యంలో మహారాష్ట్రలో ప్రచారం ఊపందుకుంది. అధికార యంత్రాంగం సైతం నియామవళి అమలుకు పకడ్బందీగా చర్యలు తీసుకుంది. సరిహద్దుల్లో చెక్‌పోస్టులను పెట్టి ముమ్మర తనిఖీలు చేస్తుంది. అయితే ఇందులో చాలా వరకు అమాయకులే ఇబ్బందులు ఎదుర్కొంటున్నారు.

మహారాష్ట్రతో పాటు తెలంగాణ సరిహద్దులోనూ మన అధికారులు చెక్‌పోస్టులు ఏర్పాటు చేసి ముమ్మరంగా తనిఖీలు చేస్తున్నారు. ఇటీవల కిన్వట్‌ నుంచి తెలంగాణ వైపు వస్తున్న వాహనాన్ని పోలీసులు తనిఖీ చేశారు. ఆ వాహనాన్ని పరిశీలించగా రూ.12 లక్షల నగదుతో పట్టుబడింది. తర్వాత ఆధారాలతో ఆ వ్యక్తి నగదు తిరిగి పొందాడు. మహారాష్ట్రకు చెందిన మేకల వ్యాపారులు నిజామాబాద్‌ జిల్లా నవీపేట్‌ మేకల సంతకు వస్తుండగా, మహారాష్ట్రలోని ధర్మాబాద్‌ తాలూకా మార్గంలో తనిఖీల్లో పలువురి దగ్గర రూ.13 లక్షలు పట్టుబడ్డాయి. రెండు రాష్ట్రాల మధ్య మేకల, పశువుల సంతకు చాలా మంది వెళ్తారు. దీంతో ఇక్కడి ప్రజలు ఇబ్బంది పడుతున్నారు.

పోలీసుల ముమ్మర తనిఖీలు (ETV Bharat)

నిర్మల్‌ జిల్లా మహారాష్ట్ర సరిహద్దుకు ఆనుకుని ఉంది. ముథోల్, నిర్మల్‌ నియోజకవర్గాల్లోని తానూరు, ముథోల్, బాసర, కుభీరు, కుంటాల, సారంగాపూర్‌ మండలాలు ఉన్నాయి. ప్రస్తుతం పంట ఉత్పత్తుల కాలం కొనసాగుతోంది. ఆ మండలాల్లోని రైతులు పంట ఉత్పత్తులను మహారాష్ట్రలోని నాందేడ్, ధర్మాబాద్, భోకర్, ఇస్లాపూర్, హిమయాత్‌నగర్, కిన్వట్‌ మార్కెట్లలో విక్రయించి నగదుతో పయనమవుతుంటారు.

కానీ మహారాష్ట్రలో ఎన్నికల నియమావళి అమలులో ఉన్నందున తెలంగాణ- మహారాష్ట్ర సరిహద్దులో తనిఖీలు చేపడుతున్నారు. అందుకే ప్రజలు ఆధారాలతో నగదును తీసుకెళ్లాలి. రూ.50 వేలకు మించి తీసుకొని వెళ్లొద్దు. నాందేడ్‌ నుంచి ఖానాపూర్‌, నిర్మల్, భైంసా, పట్టణాలకు చెందిన వారు పెళ్లిళ్ల వస్తువులు, బంగారం, సామగ్రి కొనుగోళ్లు చేస్తారు. ఏది చేసినా రసీదులు, నగదు రహితంతో చేపడితే ప్రయోజనకరం. అలా చేయలేకుంటే ఎన్నికలు ముగిసే వరకు వేచి చూడటం ఉత్తమమని పలువురు వాయిదాలు వేసుకుంటున్నారు. ఏ మాత్రం అజాగ్రత్తగా వహించినా పట్టుబడటం ఖాయం.