PM Kisan 17th Installment Release Date: ప్రధాని నరేంద్ర మోదీ రైతులకు శుభవార్త అందించారు. దేశ ప్రధానిగా వరుసగా మూడోసారి బాధ్యతలు స్వీకరించిన మోదీ.. పీఎం కిసాన్ సమ్మాన్ నిధి యోజన లబ్ధిదారులకు నిధుల విడుదలకు ఆమోదం తెలిపారు. తొలి సంతకం ఈ దస్త్రాలపైనే చేశారు. దీంతో ఈ పథకం కింద మొత్తం 9.3 కోట్ల రైతులకు లబ్ధి చేకూరనుంది. మరి ఆ డబ్బులు ఎప్పుడు పడతాయి? స్టేటస్ ఎలా చెక్ చేసుకోవాలో చూద్దాం..
రైతులకు ఆర్థిక భరోసా కల్పించేందుకు కేంద్ర ప్రభుత్వం "ప్రధానమంత్రి కిసాన్ సమ్మాన్ నిధి" అనే పథకాన్ని తీసుకొచ్చింది. 2019 ఫిబ్రవరిలో ఈ పథకాన్ని అమలులోకి తీసుకొచ్చింది. ఈ స్కీమ్ ద్వారా రైతులకు పంట సాయంగా ఎకరానికి ఏటా 6 వేల రూపాయలు అందిస్తోంది. ఈ 6 వేల రూపాయలను సంవత్సరానికి మూడు విడతలుగా నేరుగా రైతుల అకౌంట్స్లో జమ చేస్తూ వస్తోంది. ఏప్రిల్- జులై తొలి విడతగా, ఆగస్టు- నవంబర్ రెండో విడతగా, డిసెంబర్-మార్చి మూడో విడతగా.. 2 వేల చొప్పున కేంద్రం ఈ ఆర్థిక సాయం అందిస్తోంది. కేంద్ర ప్రభుత్వం ఇప్పుటి వరకు పీఎం కిసాన్ పథకం ద్వారా 16 సార్లు నిధులు రిలీజ్ చేసింది. ఇప్పుడు 17వ విడత నిధులు విడుదల కావాల్సి ఉంది. మూడో సారి ప్రధానిగా బాధ్యతలు స్వీకరించిన మోదీ..పీఎం కిసాన్ ఫైల్స్పైనే సంతకం పెట్టడంతో అతి త్వరలోనే డబ్బులు అకౌంట్లలో జమ కానున్నాయి.
ప్రధాని అయ్యాక మోదీ ఫస్ట్ సంతకం- వారందరి ఖాతాల్లోకి డబ్బులే డబ్బులు! - Modi First Signature
స్టేటస్ ఎలా చెక్ చేసుకోవాలంటే?
- పీఎం కిసాన్ బెనిఫీషియరీ స్టేటస్, ఇన్స్టాల్మెంట్ స్టేటస్ చెక్ చేసుకోవడానికి ఈ https://pmkisan.gov.in/ పోర్టల్ను ఓపెన్ చేయాలి.
- తర్వాత Know Your Status అనే ఆప్షన్పై క్లిక్ చేయాలి
- అనంతరం రిజిస్ట్రేషన్ నంబర్ను నమోదు చేసి, క్యాప్చా కోడ్ను ఫిల్ చేయాలి.
- ఆ తర్వాత Get Data అనే ఆప్షన్పై క్లిక్ చేస్తే స్క్రీన్పై మీ బెనిషియరీ స్టేటస్ కనిపిస్తుంది.
లబ్ధిదారుల జాబితాలో మీ పేరు ఉందో? లేదో? ఇలా చెక్ చేసుకోవాలి?
- ముందుగా మీరు www.pmkisan.gov.in వెబ్సైట్ ఓపెన్ చేయాలి.
- వెబ్సైట్లోని "Beneficiary List" ఆప్షన్పై క్లిక్ చేయాలి.
- మీ రాష్ట్రం, జిల్లా, మండలం, గ్రామం వివరాలను ఎంచుకోవాలి.
- లబ్ధిదారుల జాబితా కోసం ''Get Report" క్లిక్ చేయాలి. అంతే సింపుల్!
- మీ గ్రామంలోని లబ్ధిదారుల పేర్లు అక్కడ కనిపిస్తాయి. వాటిలో మీ పేరు ఉందో? లేదో? చూసుకోవాలి.
