అసలే వర్షాకాలం, ఆపై రంగుమారిన తాగునీరు- విజయనగర వాసులను వణికిస్తోన్న వ్యాధుల భయం - polluted water

People Suffering From Contaminated Drinking Water: త్రాగునీటి కలుషితంతో విజయనగరం ప్రజలు ఇబ్బందులు పడుతున్నారు. రంగుమారిన నీరు సరఫరా కావడంతో నగరవాసులను వ్యాధుల భయం వెంటాడుతోంది. గత పది రోజులుగా ఇదే పరిస్థితి కొనసాగుతుండటంతో నగరవాసులు ప్రైవేటు వాటర్ ప్లాంట్​కు క్యూ కట్టాల్సి వచ్చింది. కలుషిత నీటి సమస్యపై అధికారులు చర్యలు చేపట్టాలని నగరవాసులు కోరుతున్నారు.

People Suffering From Contaminated Drinking Water: విజయనగరం నగరపాలక సంస్థ పరిధిలో ప్రజలకు తాగునీటి కష్టాలు తప్పటం లేదు. వందేళ్ల నాటి రక్షిత పథకాలే ప్రజలకు దిక్కయాయి. నీటి సరఫరాలో శుద్ద జలం కరవైందని ప్రజలు వాపోతున్నారు. చిన్నపాటి వర్షం కురిసినా కుళాయిల ద్వారా రంగుమారిన నీరు సరఫరా కావడంతో ప్రజలను తీవ్ర ఆందోళనకు గురి చేస్తోంది. త్రాగునీటి కలుషితంతో నగర ప్రజలను వ్యాధుల భయం వెంటాడుతోంది. గత పది రోజులుగా ఇదే పరిస్థితి కొనసాగుతుండటంతో నగరవాసులు ప్రైవేటు వాటర్ ప్లాంట్​కు క్యూ కట్టాల్సి వచ్చింది.

విజయనగరంలో వర్షాకాలంలోనూ నీటి కష్టాలు తప్పట్లేదు. వందేళ్ల నాటి రాణి అప్పల కొండయాంబ పథకంపైనే ఇప్పటికీ ఆధారపడుతున్నారు. నగరంలో నిత్యం 42 ఎంఎల్​డీ నీటి సరఫరా జరగాల్సి ఉండగా కేవలం 26 ఎంఎల్​డీ మాత్రమే జరుగుతోంది. ముషిడిపల్లి పథకం నుంచి దాదాపు 29 డివిజన్లకు సరఫరా సాగుతోంది. మిగిలిన ప్రాంతాలకు నెల్లిమర్లలోని చంపావతి నది ఊటబావుల ద్వారా అందుతోంది. ఈ రెండు ప్రాంతాల్లోనూ నీటి లభ్యత తక్కువగా ఉండటంతో తరచూ అంతరాయం ఏర్పడుతోంది. ప్రధానంగా నగరంలోని పలు ప్రాంతాల ప్రజలు కలుషిత నీటితో అవస్థలు పడుతున్నారు.

నగరంలో 490 కిలోమీటర్ల పరిధిలో తాగునీటి పైపులైన్లు ఉన్నాయి. వీటి పరిధిలో 26,484 కుళాయిలున్నాయి. అమృత్ పథకం కింద 7,417, ఏపీఎండీసీ పథకంలో 4120 ఉన్నాయి. 200 రూపాయల కొళాయిలు 290, ఆరువేల రూపాయల కొళాయిలు 900 ఉన్నాయి. మిగిలినవి వివిధ పథకాల ద్వారా వేశారు. వీటికి సంబంధించిన సరఫరా లైన్లు 2 మీటర్ల నుంచి 50 మీటర్ల వరకు కొనసాగుతున్నాయి. ఇవన్నీ పురాతన వ్యవస్థ కారణంగా పైపులు తరచూ మరమ్మతులకు గురవుతున్నాయి. ఈ క్రమంలో బురద, రంగుమారిన నీరు పైపుల నుంచి వస్తోంది. ఈ క్రమంలో పుర ప్రజలు గత పది రోజుల నుంచి వాటర్ ప్లాంట్​లకు క్యూ కట్టారు.

ఈ సమస్య ప్రధానంగా ముషిడిపల్లి పథకం ద్వారా జరుగుతున్న సరఫరాలోనే వస్తోందని విజయనగరం నగరపాలక సంస్థ కమిషనర్ మల్లయ్య నాయుడు తెలిపారు. వర్షపు నీరు ఊట బావుల్లోకి ప్రవేశించటంతో సమస్య తలెత్తుతోందన్నారు. కానీ, ఎప్పటికప్పుడు నీటిని శుద్ధి చేసి సరఫరా చేస్తున్నామన్నారు. ప్రజలకు ఎలాంటి ఆరోగ్య సమస్యలు తలెత్తకుండా అన్ని చర్యలు తీసుకుంటున్నామని కమిషనర్ తెలిపారు.

అసలే వర్షాకాలం వ్యాధులు ప్రబలించే సమయం కావడంతో అతిసారం, మలేరియా రోగాలు ప్రబలే అవకాశం ఉందని ప్రజలు అంటున్నారు. చిన్నపాటి వర్షం కురిసినా కుళాయిల ద్వారా రంగుమారిన నీటి సరఫరా జరుగుతుండటంతో విజయనగరం ప్రజలను తీవ్ర ఆందోళనకు గురి చేస్తోంది. రంగుమారిన నీటితోపాటు, అపరిశుభ్రంగా నీరు వస్తుండటంతో నగర ప్రజలు భయాందోళనకు గురవుతున్నారు. ఈ సమస్యపై అధికారులు చర్యలు చేపట్టాలని నగరవాసులు కోరుతున్నారు.