అధిక వడ్డీ ఆశ చూపి రూ. 20 కోట్ల మోసం - బాధితులంతా బంధువులే - 20 Crore Rupees Investment Fraud

Investment Fraud in NagarKurnool : ఓ వ్యక్తి అధిక వడ్డీ ఆశ చూపి 200 మంది నుంచి సుమారు రూ. 20 కోట్లతో ఉడాయించిన ఘటన నాగర్ కర్నూలు జిల్లాలో జరిగింది. బాధితులు ఇచ్చిన ఫిర్యాదు మేరకు పోలీసులు కేసు నమోదు చేశారు. మోసపోయిన బాధితులంతా వడ్డీ వ్యాపారి బంధువులే కావడం గమనార్హం.

20 Crore Rupees Investment Fraud in NagarKurnool : అధిక వడ్డీ ఆశ చూపి అమాయకుల నెత్తిపై కుచ్చుటోపి పెట్టి పరారైన ప్రబుద్ధుడి బాగోతం నాగర్ కర్నూలు జిల్లా తెలకపల్లి మండలంలో వెలుగు చూసింది. ఒకటి కాదు రెండు కాదు ఏకంగా సుమారు రూ. 20 కోట్లు వసూలు చేసుకుని గుట్టుగా జారుకున్న మోసగాడిపై బాధితులు సోమవారం నాగర్ కర్నూల్ జిల్లా ఎస్పీకి ఫిర్యాదు చేశారు. బాధితులు తెలిపిన వివరాల ప్రకారం జిల్లాలోని తెలకపల్లి మండలం నడిగడ్డకు చెందిన జహిర్ చోటేమియా అనే వ్యక్తి వడ్డీ వ్యాపారం చేస్తున్నాడు.

జహిర్ చోటేమియా తన సమీప బంధువులతో నాగర్ కర్నూల్, తెలకపల్లి, నడిగడ్డ, తూడుకుర్తి గ్రామాలకు చెందిన సుమారు 200 మంది నుంచి రూ. 20 కోట్ల మేర అధికవడ్డీ కింద డబ్బులు చాకచక్యంగా వసూలు చేసుకున్నాడు. బాధితులు మొదట రూ. 2 నుంచి 5 లక్షల వరకు అతని దగ్గర భద్రపరచుకొని వడ్డీతో సహా తీసుకెళ్లేవారు. ఇలా అందరినీ నమ్మించడంతో ఒక్కొక్కరు రూ. 5 లక్షలు నుంచి 10 లక్షల వరకు అతని దగ్గర దాచుకున్నారు. ఈ విధంగా సుమారు రూ.20 కోట్ల మేర డబ్బులు వసూలు చేసిన జహిర్ చోటేమియా, కొన్నిరోజులు మిత్తితో పాటు కొంత అసలు కూడా ఇచ్చాడు.

నాగర్ కర్నూల్ జిల్లా ఎస్పీకి విన్నపం : అయితే గత ఆరు నెలల నుంచి అసలు కాదు కదా మిత్తి డబ్బులు కూడా ఇవ్వకుండా తప్పించుకొని తిరుగుతున్నాడు. దీంతో బాధితులు ఈ విషయంపై పెద్ద మనుషుల సమక్షంలో కూడా పలు పర్యాయాలు కూర్చొని పంచాయతీ పెట్టారు. ఒకరిద్దరి బాధితులకు పెద్ద మనుషులతో మాట్లాడి కొంత డబ్బులు చెల్లించి సెటిల్మెంట్ చేసుకోగా ఆ తర్వాత ముఖం చాటేశాడు. దీంతో వ్యాపారి జహిర్ చోటేమియా డబ్బులు చెల్లించకుండా తప్పించుకొని తిరుగుతున్నాడని బాధితులు ఆందోళనకు గురయ్యారు.

సోమవారం సుమారు 30 మంది బాధితులు నాగర్ కర్నూల్ జిల్లా ఎస్పీని కలిసి తమ పరిస్థితి విన్నవించుకున్నారు. తమకు న్యాయం చేయాలంటూ పోలీసులకు ఫిర్యాదు చేశారు. జహిర్ చోటేమియా నుంచి తమకు తమ డబ్బులు ఇప్పించాలని బాధితులు ఫిర్యాదులో పేర్కొన్నారు. కాయకష్టం చేసి దాచుకున్న డబ్బులు అధిక వడ్డీకి ఆశపడి అతనికి ఇచ్చామని, తమ డబ్బులు తమకు ఇప్పించాలని పోలీసులకు మొరపెట్టుకున్నారు.

'మా అన్న కుమారుడు జహిర్ చోటేమియా బిజినెస్​ చేస్తున్న అని మమ్మల్ని నమ్మించాడు. తన దగ్గర పెట్టుబడి పెడితే లాభాలు వస్తాయని చెప్పాడు. దీంతో మేం సరే అని ఆయనకు డబ్బులు ఇచ్చాం. అతనికి డబ్బులు ఇచ్చిన వాళ్లు అందరూ బంధువులే. మా డబ్బులు ఇస్తానంటూ మమ్మల్ని మోసం చేశాడు'-బాధితులు