జాబ్ చేస్తూ డిప్లొమా చదివేయొచ్చు - ఎక్కడ? - ఎలాగంటే?

ఉద్యోగం చేస్తూ చదువుకోవాలనుకునేవారికి సువర్ణావకాశం - రాత్రి పూట డిప్లొమా కోర్సులు ప్రారంభించిన ఏపీ ప్రభుత్వం - తరగతులు, కోర్సుల వివరాలు ఇవే

Night Diploma Courses in AP : మీరు పదో తరగతి, ఐటీఐతో మధ్యలోనే చదువు ఆపేసి ఉద్యోగంలో చేరారా? అయితే ఉద్యోగం చేస్తూనే డిప్లొమా చదవాలని అనుకుంటున్నారా? అయితే మీ కోసమే సాంకేతిక విద్యాశాఖ ఓ సువర్ణావకాశం కల్పించింది. ఓ వైపు ఉదయం ఉద్యోగం చేస్తూనే, మరోవైపు రాత్రి చదువుకునేందుకు అనుమతులు ఇచ్చింది. మామూలు రోజుల్లా రాత్రి 6 గంటల నుంచి 9 గంటల వరకు కోర్సులు బోధించగా, సెలవు దినమైన ఆదివారంలో పూర్తిస్థాయిలో తరగతులు నిర్వహిస్తారు. ఈ అవకాశం ఉద్యోగం చేస్తూ డిప్లొమా కోర్సు చదవాలనుకునేవారికి మంచి అవకాశంగా మారనుంది.

Night Polytechnic Courses in AP : ఈ అవకాశంతో డిప్లొమా తర్వాత ఇంజినీరింగ్​ చేసి ఉన్న ఉద్యోగంలోనే ఉన్నత హోదాకు వెళ్లేందుకు మంచి అవకాశం ఉంది. దీంతో పని అనుభవానికి విద్యార్హతలు తోడవ్వడంతో మీరు పని చేసే కంపెనీలో ఎదిగేందుకు అవకాశాలు ఎక్కువగా ఉండనున్నాయి. ఈ కాలేజీలు ఏపీ వ్యాప్తంగా 6 కాలేజీల్లో 9 బ్రాంచ్​లు అందుబాటులో ఉన్నాయి.

ఒక్కో కోర్సులో 30 సీట్లు చొప్పున 390 ఉన్నాయి. వీటికి అదనంగా ఈడబ్ల్యూఎస్​ కోటాలో 3 సీట్లు కేటాయిస్తే 429 సీట్లు అందుబాటులో ఉన్నాయి. నార్మల్​గా అయితే డిప్లమా 3 సంవత్సరాలు. కానీ ఈ విధానంలో రెండేళ్లు, రెండున్నరేళ్లలలో డిప్లొమా పూర్తి చేయవచ్చు. రాత్రి పూట డిప్లొమా కోర్సుల్లో చేరడానికి ఆఖరి తేదీ అక్టోబరు 26. ఆ రోజు సాయంత్రం 5 గంటలలోపు దరఖాస్తులు సమర్పించాలి.

అర్హతలు :

• ప్రభుత్వ, ప్రైవేటు పరిశ్రమల్లో పనిచేస్తున్నవారు
• పని ప్రాంతం లేదా నివాసం ఈ విద్యాసంస్థలకు 50 కిలోమీటర్ల దూరంలోపు ఉండాలి.
• కనీసం ఉద్యోగంలో ఏడాది పూర్తి సమయం, రెగ్యులర్​గా పని చేసిన అనుభవం ఉండాలి.
• అభ్యర్థులకు అప్లికేషన్​ చేసుకున్న పాలిటెక్నిక్​ కాలేజీ వద్దనే కౌన్సెలింగ్.
• అభ్యర్థులు నుంచి వచ్చిన దరఖాస్తులు ఆధారంగా సీట్లు కేటాయింపు.
• కౌన్సెలింగ్​ సమయంలో అభ్యర్థులు అర్హత సర్టిఫికేట్లు తీసుకురావాలి.
• ఈనెల 28న ఉదయం 10 గంటలకు చెల్లించాల్సిన ఫీజు, సర్టిఫికేట్లతో నేరుగా ఆయా పాలిటెక్నిక్​ కళాశాలకు హాజరు కావాలి.

రాత్రి పూట డిప్లమా కోర్సుల వివరాలు :

• మెకానికల్​ - రెండేళ్లు కోర్సు
• ఎలక్ట్రానిక్స్​-కమ్యూనికేషన్​ - రెండేళ్లు కోర్సు
• కంప్యూటర్​ - రెండేళ్లు కోర్సు
• ఎలక్ట్రికల్​-ఎలక్ట్రానిక్స్​ - రెండేళ్లు కోర్సు
• సివిల్​ ఇంజినీరింగ్​ - రెండేళ్లు కోర్సు
• కెమికల్​(ఆయిల్​ టెక్నాలజీ) - రెండున్నరేళ్లు కోర్సు
• కెమికల్​(పెట్రోకెమికల్​) - రెండున్నరేళ్లు కోర్సు
• కెమికల్​ ఇంజినీరింగ్​ - రెండున్నరేళ్లు కోర్సు