Honey Trap Cases Increased in Vizag : యువకులకు కాల్ చేస్తారు. తీయగా మాట్లాడతారు! పరిచయం పెంచుకుంటారు. ఫొటోలు పంచుకుంటారు. 'ప్రేమ' పేరుతో దగ్గరవుతారు. ఆపై జంటగా వ్యవహరిస్తారు!! అంతే, ఇక ఆ యువతుల వలపు వలలో యువకులు చిక్కినట్లే!! జంటగా ఉన్న చిత్రాలతో బెదిరింపులకు దిగుతారు! అడిగినంత ఇవ్వకపోతే రౌడీ ముఠాలతో దాడి చేయిస్తారు. ఇలాంటి ‘హనీ ట్రాప్‌’ కేసులు తెలుగు రాష్ట్రాల్లో తరచూ వెలుగు చూస్తుండగా, ఇటీవల ఆంధ్రప్రదేశ్లోని విశాఖలో ఎక్కువగా వెలుగులోకి వస్తున్నాయి.
ఏపీలో జరిగే సైబర్ మోసాల్లో బాధితులు ఎక్కువ మంది విశాఖ నగర వాసులే ఉంటున్నారు. వైజాగ్ కేంద్రంగా సైబర్ నేరగాళ్లు మోసాలకు తెగబడటం, ఇతర దేశాల్లోని ముఠాలతో కలిసి ఇక్కడే సెంటర్లు ఏర్పాటు చేయడం కలవరపెడుతోంది. నెల రోజుల వ్యవధిలో వెలుగులోకి వచ్చిన అనేక మోసాల తీరు తెలిసి నగరవాసులు ఉలిక్కిపడుతున్నారు.
హనీట్రాప్‌ కేసు ఆమెతో సరి : వైజాగ్లోని మురళీనగర్‌ కేంద్రంగా జాయ్‌ జమీయా అనే యువతి హనీట్రాప్‌ (ప్రేమ పేరుతో వలలో వేసుకోవడం)కు తెర లేపింది. జమీయా బాధితులు ఇటీవల ఒక్కొక్కరిగా బయటకు వస్తున్నారు. ఓ ఎన్‌ఆర్‌ఐ కంప్లైంట్తో ఈ నెల 4న భీమిలి స్టేషన్‌ పోలీసులు యువతిని అదుపులోకి తీసుకుని విచారించారు. 5న కోర్టుకు హాజరుపర్చి రిమాండ్‌కు తరలించారు. 9వ తేదీన భీమునిపట్నం ఠాణాకు జ్యుడీషియల్‌ కస్టడీకి తీసుకుని ఏసీపీ అప్పలరాజు విచారణ చేశారు. ఈ క్రమంలో బాధితులు ముందుకొచ్చి కంచరపాలెం, విమానాశ్రయం స్టేషన్లలోనూ జెమీయాపై కేసులు పెట్టారు. ఉమ్మడి తెలుగు రాష్ట్రాల్లో ఈమె బాధితులున్నారు. ఎలా ప్రేమ వలలో వేసుకోవాలి? మత్తు ఎలా ప్రయోగించాలి? వీడియోలు తీసి ఎలా బ్లాక్‌మెయిల్‌ చేయాలి? అనే అంశంపై ఓ ముఠా టైనింగ్ ఇచ్చినట్లు పోలీసులు గుర్తించారు. ఆ ముఠాను అదుపులోకి తీసుకోలేదు.
ఓ అటవీశాఖ అధికారి హడావుడి : ఈ ముఠాలో ఓ అటవీశాఖ అధికారి హస్తం ఉన్నట్లు సమాచారం. హనీట్రాప్‌ చేస్తున్న జెమీయా అకౌంట్ నుంచి ఆ అధికారి అకౌంట్కు నగదు లావాదేవీలు జరిగినట్లు గుర్తించి, సదరు అధికారిని పిలిపించి గోప్యంగా విచారణ చేస్తున్నట్లు తెలుస్తోంది. విచిత్రమేమంటే ఆమెను అరెస్టు చేసిన టైంలో ఆ అధికారి పోలీసులకు ఫోన్‌ చేసి హడావుడి చేసినట్లు తెలుస్తోంది. ‘జెమీయా నాకు రిలేటివ్ అవుతుంది. ఏవిధంగా కేసు పెడతారు? ఎలా అరెస్టు చేస్తారంటూ పోలీసులనే హెచ్చరించడంతో అనుమానం వచ్చి ఆయన బ్యాంకు అకౌంట్లు, లావాదేవీలు, ఫోన్‌ కాల్స్‌పై దృష్టి పెట్టినట్లు చర్చ జరుగుతోంది.
సిటీలోనే ఉంటూ..
✵ సెప్టెంబర్‌ 28న దిల్లీలో నమోదైన కేసులో భాగంగా ఎండాడ, మురళీనగర్‌లో ఉంటూ కాల్ సెంటర్లు నిర్వహిస్తున్న తొమ్మిది మందిని దర్యాప్తు సంస్థ సీబీఐ అరెస్టు చేసింది. నిరుద్యోగులే లక్ష్యంగా వీరు సైబర్ మోసాలకు పాల్పడుతున్నట్లు ప్రాథమికంగా గుర్తించారు.
✵ చైనా, తైవాన్‌లోని సైబర్ నేరగాళ్లకు సహకరిస్తూ వైజాగ్ కేంద్రంగా కాస్మెటిక్స్‌ సేల్స్ పేరుతో బెట్టింగ్‌ యాప్‌లు, టాస్క్‌ గేమ్‌లు, ఫెడెక్స్‌ పార్శిల్స్ నిర్వహిస్తున్న ఏడుగురితో కూడిన ముఠాను 17న అరెస్టు చేశారు. అహ్మదాబాద్‌ నిఘా డిపార్ట్మెంట్ నుంచి విశాఖకు సమాచారం వచ్చింది. విశాలాక్షినగర్, ఏఎన్‌బీచ్‌ దగ్గరలోని ప్లాట్లు రెంట్కు తీసుకుని సైబర్ మోసాలకు పాల్పడుతూ, బ్యాంకు అకౌంట్లు సేకరించి సొమ్ము కాజేసి చైనా, తైవాన్‌కు నగదు ట్రాన్స్ఫర్ చేస్తున్నట్లు గుర్తించారు.
✵ ఏపీకి చెందిన నిరుద్యోగ యువతే లక్ష్యంగా ఫేక్ ఐడీలతో బ్యాంకు ఖాతాలు తెరిచి వారి నుంచి డబ్బులు కాజేస్తున్న నలుగురు ముఠా సభ్యులను శుక్రవారం అరెస్టు చేశారు. 17 రాష్ట్రాల్లో 50 సైబర్ నేరాల కంప్లైంట్లు అందగా, రూ.40 కోట్ల లావాదేవీలు ఈ ముఠా జరిపినట్లు గుర్తించారు.
పరిచయం ప్రేమగా మారింది - ఆ ప్రేమ పెళ్లి దాకా వచ్చింది! - ఆ ఒక్క డెసిషన్తో?
