Student Died Due to Electric Shock at Hostel in Telangana : ఆ యువకుడు పదో తరగతి పాసయ్యాడు. ఇంటర్ చదువుల కోసమని చెప్పి కుమారుడిని తల్లిదండ్రులు కార్పొరేట్ కళాశాలలో జాయిన్ చేశారు. కేవలం నాలుగు రోజుల్లోనే తాను అక్కడ ఉండలేనంటూ అమ్మానాన్నల వద్ద బోరుమన్నాడు. అయితే మరో రెండు రోజులు చూడాలని, అప్పటికీ కాలేజీ నచ్చకపోతే తామే వచ్చి తీసుకెళ్తామని చెప్పారు. అప్పటి వరకు ఆగని ఆ విద్యార్థి, ఎలాగైనా ఇంటికి వెళ్లిపోవాలని హాస్టల్ ప్రహరీ గోడ దూకే క్రమంలో విద్యుత్ తీగలు తగిలి విద్యుదాఘాతానికి గురై అక్కడికక్కడే ప్రాణాలు విడిచాడు. ఈ హృదయ విదారక ఘటన తెలంగాణలోని హయత్నగర్ పోలీస్స్టేషన్ పరిధిలో చోటుచేసుకుంది.
Hyderabad Inter Student Died : వివరాల్లోకి వెళ్తే ఏపీలోని గుంటూరు జిల్లా తెనాలికి చెందిన కర్రీ విజయ్కుమార్, చాముండేశ్వరి దంపతులు హైదరాబాద్ నగరానికి వచ్చి ఈస్ట్ మారేడుపల్లిలోని టీచర్స్ కాలనీలో నివాసం ఉంటున్నారు. వీరికి ఒక అమ్మాయి, అబ్బాయి ఉన్నారు. కుమారుడు గిరీష్కుమార్ అరవంత్ పదో తరగతి పూర్తి కావడంతో ఈ నెల 12న హయత్నగర్ సమీపంలోని కోహెడ నారాయణ రెసిడెన్షియల్ జూనియర్ కళాశాలలో ఇంటర్ ప్రథమ సంవత్సరం ఎంపీసీలో చేర్పించారు.
ఈ నెల 16న ఆదివారం గిరీష్కుమార్ అమ్మానాన్న, అక్క కలిసి హాస్టల్కు వెళ్లాడు. తాను ఇక్కడ ఉండలేకపోతున్నానని వారితో చెప్పాడు. దీంతో ఆ తల్లిదండ్రులు మరో రెండు రోజులు చూడాలని, నచ్చకపోతే తీసుకెళ్తామని చెప్పి వెళ్లిపోయారు. ఈ క్రమంలో హాస్టల్లో ఉండడం ఇష్టం లేని గిరీష్ కుమార్, ఈ నెల 19న బుధవారం అర్ధరాత్రి తర్వాత 1:52 గంటల సమయంలో హాస్టల్ భవనం ఐదో అంతస్తు నుంచి కిందకు దిగాడు. అక్కడ కళాశాల ప్రాంగణం చుట్టూ ప్రహరీ ఉంది. దానిపై ఫెన్సింగ్ ఉంది.
గోడ ఎక్కే క్రమంలో విద్యుత్ తీగలు తగిలి షాక్ : కళాశాల ప్రాంగణంలోని గేటుకు ఎడమవైపున ట్రాన్స్ఫార్మర్ పక్కన ఉన్న ప్రహరీ ఎక్కి కిందకు దిగేందుకు గిరీష్కుమార్ ప్రయత్నించాడు. ఈ క్రమంలో పైన ఉన్న విద్యుత్ తీగలు తగిలి, కరెంట్ షాక్కు గురయ్యాడు. అక్కడే కిందపడి అక్కడికక్కడే ప్రాణాలు కోల్పోయాడు. ఈ నేపథ్యంలో గిరీష్ కనిపించడం లేదంటూ విద్యార్థి తల్లిదండ్రులకు జూన్ 20న హాస్టల్ సిబ్బంది ఫోన్ చేసి చెప్పారు. దీంతో వారు కళాశాలకు చేరుకుని అన్ని చోట్లా ఆరా తీసినా ప్రయోజనం లేదు.
చివరికి బాలుడి తల్లి హయత్నగర్ పోలీస్ స్టేషన్లో ఫిర్యాదు చేయడంతో పోలీసులు హాస్టల్కు చేరుకున్నారు. అక్కడ ఉన్న సీసీ ఫుటేజీని పరిశీలించగా, గిరీష్ హాస్టల్ నుంచి కిందకు దిగుతున్న దృశ్యాలు అందులో రికార్డయ్యాయి. అర్ధరాత్రి కళాశాల ప్రాంగణం ప్రహరీ వెంబడి గాలిస్తుండగా విద్యార్థి మృతదేహం చెట్ల పొదల్లో కనిపించింది. దీంతో తల్లిదండ్రులు కన్నీరు మున్నీరుగా విలపించారు. కళాశాల యాజమాన్యం నిర్లక్ష్యం వల్లే తమ కుమారుడు చనిపోయారని ఆరోపించారు.
ప్రకాశం జిల్లాలో దారుణం - విద్యుత్ షాక్కు గురై ఉద్యోగి మృతి
పారిశుధ్య విధుల్లో బాలుడు, విద్యుత్ ట్రాన్స్ఫార్మర్ షాక్ కొట్టి మృతి
