నారా లోకేశ్ చొరవ - కువైట్‌లో తెలుగు కార్మికుడిని కాపాడిన ఇండియన్‌ ఎంబసీ - త్వరలో రాష్ట్రానికి - Indian Embassy Saved Telugu Worker

Indian Embassy Saved Telugu Worker Siva in Kuwait: కువైట్​లో దుర్భర జీవితం గడుపుతున్న శివను ఇండియన్ ఎంబసీ కాపాడిందని ,త్వరలోనే శివ రాష్ట్రానికి వస్తున్నాడని మంత్రి నారా లోకేశ్ సంతోషం వ్యక్తం చేశారు. కువైట్​లో తన కష్టాలపై తెలుగు కార్మికుడు శివ కన్నీళ్లు పెట్టుకుంటూ ఎక్స్​లో పెట్టిన వీడియోపై మంత్రి స్పందించిన విషయం తెలిసిందే.

Indian Embassy Saved Telugu Worker Siva in Kuwait : కువైట్‌లో దుర్భర జీవితం గడుపుతున్న తెలుగు వ్యక్తి శివకు విద్యా, ఐటీ శాఖ మంత్రి నారా లోకేశ్ సాయం అందించారు. కువైట్‌లో తానుపడుతున్న కష్టాలను తెలుపుతూ శివ ఎక్స్‌లో పెట్టారు. తనకు సాయం చేయకపోతే చావే దిక్కంటూ శివ కన్నీటి పర్యంతమయ్యారు. ఈ వీడియోపై స్పందించిన మంత్రి లోకేశ్‌ శివకు సాయం చేయాల్సిందిగా టీడీపీ ఎన్‌ఆర్‌ఐ బృందానికి బాధ్యత అప్పగించారు. వారు ఇండియన్ ఎంబసీతో సంప్రదింపులు జరిపారు. కేంద్ర ప్రభుత్వ సహకారంతో త్వరలోనే శివను ఏపీకి తీసుకొస్తామని మంత్రి నారా లోకేశ్ తెలిపారు. తక్షణం స్పందించిన మంత్రి లోకేశ్‌కు శివ కృతజ్ఞతలు తెలిపారు.

కూలి చేస్తే గానీ పూట గడవని కుటుంబం : చిత్తూరు జిల్లా కల్లూరుకు చెందిన శివ 18 ఏళ్ల కిందట చింతపర్తికి వచ్చి శంకరమ్మను పెళ్లి చేసుకుని, ఇక్కడే అద్దె ఇంట్లో నివాసం ఉంటున్నాడు. ఇతనికి ఇద్దరు కుమార్తెలు ఉన్నారు. చిన్న కుమార్తె స్థానిక ప్రభుత్వ పాఠశాలలో ఆరో తరగతి చదువుతోంది. శివ భార్య శంకరమ్మ, పెద్ద కుమార్తె ప్రతి రోజు వ్యవసాయ పనులకు కూలీలుగా వెళుతున్నారు. కూలి చేస్తే గానీ పూట గడవని కుటుంబం వీరిది.

ఎడారిలో ఒంటరి : ఇలాంటి కుటుంబ నేపథ్యంలో కుమార్తెలను చదివించడానికి, పెళ్లి చేసేందుకు రాయచోటికి చెందిన ఓ ఏజెంట్ ద్వారా ఇటీవల శివ కువైట్​కి వెళ్లారు. అయితే అక్కడ అతను చెప్పిన పని కాకుండా మరొక కష్టమైన పని చేపిస్తూ ఎడారిలో ఇబ్బందులు పడుతుండడంతో, సెల్ఫీ వీడియోను విడుదల చేశారు. అక్కడి ఎడారిలో జన సంచారం లేని ప్రాంతంలో కోళ్లు, గొర్రెలు, పావురాలు, బాతుల్ని మేపే పనిలో ఆయన్ను పెట్టారు.

Siva is safely lodged at the Indian embassy in Kuwait. He will be brought back to Andhra Pradesh soon. pic.twitter.com/qT4poqNHJj

— Lokesh Nara (@naralokesh) July 15, 2024

ఆత్మహత్యే శరణ్యం : ఎడారిలో గొర్రెలు మేకలు, కుక్కలు, కోళ్లు, బాతులు, పావురాలకు కాపలాగా పెట్టినట్లు అందులో పేర్కొన్నాడు. చుట్టుపక్కల కనుచూపు మేరలో ఎవరూ లేరన్నారు. మొత్తం పని అంతా తానొక్కడితోనే చేపిస్తున్నారని, నిద్రాహారాలు లేక తీవ్ర ఇబ్బందులు ఎదుర్కొంటున్నట్లు ఆవేదన వ్యక్తం చేశాడు. ఎడారిలో విష సర్పాలు అధికంగా ఉన్నాయని, చనిపోయినా ఎవరు పట్టించుకునే వారు లేరని కన్నీటి పర్యంతమయ్యాడు. దయచేసి ఎవరైనా సాయం చేసి ఈ ఎడారి నుంచి తనను స్వదేశానికి తీసుకెళ్లాలని వీడియోలో పేర్కొన్నాడు. లేకపోతే తనకు ఆత్మహత్యే శరణ్యమని అన్నాడు. తన బిడ్డలు గుర్తొస్తున్నారని, దయచేసి ఎవరైనా సహాయం చేయాలని వేడుకున్నాడు.