Telangana Phone Tapping Case Updates : ఫోన్ ట్యాపింగ్ కేసు దర్యాప్తు కోనసాగుతుందని హైదరాబాద్ సీపీ కొత్త కోట శ్రీనివాస్రెడ్డి వెల్లడించారు. త్వరలో ఈ కేసుకు సంబంధించిన అన్నీ వివరాలను మీడియాకు వెల్లడిస్తామన్నారు. న్యాయస్థానం అనుమతిస్తే ఎస్ఐబీ మాజీ చీఫ్ ప్రభాకర్ రావుకు రెడ్ కార్నర్ నోటీస్ ఇవ్వడానికి సిద్ధంగా ఉన్నామని తెలిపారు. నిందితులు ఆధారాలను ధ్వంసం చేసినా దర్యాప్తు బృందం వాటిని సేకరించారన్నారు. ఈ కేసులో ఎవరి ప్రమేయం ఉన్న చట్టపరమైన చర్యలు తీసుకుంటామని సీపీ వెల్లడించారు.
Phone Tapping with WhatsApp groups : మరోవైపు ఈ కేసు దర్యాప్తులో పలు కొత్త విషయాలు బయటకు వచ్చాయి. గత అసెంబ్లీ ఎన్నికల్లో ప్రధానంగా కేఎంఆర్ వాట్సప్ గ్రూప్ పేరిట కామారెడ్డి నియోజకవర్గంలో బీఆర్ఎస్ ప్రత్యర్థులు కాంగ్రెస్‌ అభ్యర్థి రేవంత్‌ రెడ్డి, బీజేపీ అభ్యర్థి వెంకట రమణారెడ్డిపై నిరంతరం నిఘా ఉంచారని దర్యాప్తులో తేల్చారు. ఎస్ఐబీ మాజీ డీఎస్సీ ప్రణీత్‌ రావు నేతృత్వంలో ప్రత్యేకంగా కేఎంఆర్ పేరిట వాట్సప్ గ్రూప్ క్రియేట్ చేసి ఎప్పటికప్పుడు రేవంత్‌ రెడ్డి, వెంకటరమణారెడ్డి ప్రధాన అనుచరుల కదలికలను పరిశీలిస్తూ గ్రూపులో చర్చించుకునే వారని దర్యాప్తులో గుర్తించారు.
అంతేకాకుండా పోల్-2023 పేరిట వాట్సప్ గ్రూప్ ఏర్పాటు చేసి రాష్ట్రవ్యాప్తంగా ప్రత్యర్థి పార్టీలకు సంబంధించిన నేతల కదలికలపై అదనపు ఎస్పీ తిరుపతన్న నేతృత్వంలో నిఘా ఉంచారని నిర్ధారించారు. ఈ కేసులో ఇప్పటికే నలుగురిని అరెస్ట్ చేయగా, మరో ఇద్దరిని నిందితుల జాబితాలో చేర్చారు. ఎస్ఐబీ మాజీ ఓఎస్డీ ప్రభాకర్ రావును ఏ1-గా, ఓ మీడియా సంస్థ అధినేత శ్రవణ్‌రావును ఏ6-గా చేరుస్తూ నాంపల్లి కోర్టులో మెమో దాఖలు చేశారు.
ఈ కేసులో ప్రభాకర్‌రావు, శ్రవణ్‌ పరారీలో ఉన్నట్లు న్యాయస్థానానికి దర్యాప్తు బృందం వెల్లడించింది. ఇప్పటివరకు నిందితుల వాంగ్మూలాల్లో వీరిద్దరి ప్రస్తావన వచ్చినా, సాంకేతిక కారణాలతో పేర్లను చేర్చలేదు. కానీ వీరు పరారీలో ఉన్న నిందితులుగా చూపడం చర్చనీయాంశంగా మారింది.
'ఫోన్ ట్యాపింగ్ కేసును పునాది నుంచి తీసుకొస్తున్నాం. ఈ కేసు కోర్టులో ప్రాసెస్ జరుగుతోంది. రెడ్ కార్నర్ నోటీసులతో పరారీలో ఉన్న నిందితులను రప్పిస్తాం. ఆధారాలను ధ్వంసం చేయాలని నిందితులు ఎంత కష్టపడినా మేం వాటిని సేకరించాం. ఈ కేసులో ఎవరు ఉన్నా వారిపై చట్టపరమైన చర్యలు చేపడతాం'- కొత్త కోట శ్రీనివాస్రెడ్డి, హైదరాబాద్ సీపీ
