Heavy Rain Effect In Bhadradri Kothagudem: భద్రాద్రి కొత్తగూడెం జిల్లా వ్యాప్తంగా గత రెండు రోజులుగా భారీ వర్షం కురుస్తోంది. మంగళవారం రాత్రి నుంచి అతి భారీ వర్షాలు కురవడంతో పలు ప్రాంతాలు జలమయమయ్యాయి. భద్రాచలంలోని రామాలయం పడమర మెట్లవద్దకు వర్షపు నీరు చేరింది. ఆ ప్రాంతంలో సుమారు 35 దుకాణాలకు వరద చేరడంతో సామగ్రి మొత్తం వర్షపు నీటిలో తడిసిపోయింది.
హరినాధ బాబా ఆలయం వద్ద కుంగిన కల్యాణ మండపం: భద్రాచలంలోని హరినాధబాబా ఆలయం వద్ద కొండపై కల్యాణమండపం కుంగిపోయింది. మండపం కింద కొండను తవ్వడం వల్ల కుంగిపోయినట్లు సమాచారం. భారీ వర్షాల వల్ల కల్యాణ మండపం కిందకు పడే అవకాశం ఉందని అధికారులు తెలిపారు. 1938లో హరినాధబాబా ఆలయం నిర్మించినట్లు వెల్లడించారు. ఈ ఘటనపై మంత్రి తుమ్మల ఆరా తీశారు.
ఆ ప్రాంతానికి వెళ్లి పర్యవేక్షించాలని జిల్లా కలెక్టర్కు ఆదేశించారు. దీంతో హరినాధ ఆలయం కల్యాణ మండపాన్ని కలెక్టర్ ఇతర అధికారులు పరిశీలించారు. కొండ కింద ఉన్న ఇళ్లు, దుకాణాల్లోని ప్రజలను ఖాళీ చేయిస్తున్నారు. మరోవైపు రామాలయం వద్ద అన్నదాన సత్రంలోకి వర్షపు నీరు చేరింది. దీంతో భక్తులకు ఇబ్బందులు తలెత్తాయి. పడమరమెట్ల వద్ద వర్షపు నీరు వల్ల నిలిచి ప్రయాణాలకు అంతరాయం కలిగింది.
Minister Thummala Fires On Officials: రామాలయం అన్నదాన సత్రం, విస్టా కాంప్లెక్స్‌లో వరద చేరడంపై మంత్రి తుమ్మల నీటిపారుదలశాఖ అధికారులపై ఆగ్రహం వ్యక్తం చేశారు. వరద చేరిన వెంటనే మోటర్లు ఎందుకు ఆన్ చేయలేదని ప్రశ్నించారు. తక్షణమే దిద్దుబాటు చర్యలు చేపట్టాలని అధికారులను మంత్రి ఆదేశించారు. స్థానికులకు ఇబ్బంది లేకుండా చర్యలు చేపట్టాలని అధికారులకు సూచించారు. జిల్లాలో భారీ వర్షాల దృష్ట్యా అధికారులు అప్రమత్తంగా ఉండాలని ఆదేశాలు జారీచేశారు. వరద కరకట్ట స్లూయిజ్ లాకులు ఎత్తి ఖాళీ చేయాలని మంత్రి సూచించారు. ఆలయ పరిసరాల్లోకి వరద చేరడంతో భక్తులు తీవ్ర ఇబ్బందులు ఎదుర్కొంటున్నామని తెలిపారు.
పలు ప్రాంతాల్లో వర్షం - లోతట్టు ప్రాంతాలు జలమయం - Rain in Andhra Pradesh 2024
