Harish Rao Letter to Minister Uttam on Reservoirs : సిద్దిపేట జిల్లాలోని అన్నపూర్ణ రిజర్వాయర్, రంగనాయక సాగర్, మల్లన్న సాగర్, కొండ పోచమ్మ సాగర్ జలాశయాలు పూర్తిగా నీళ్లు లేక అడుగంటిపోయే పరిస్థితికి చేరుకున్నాయని మాజీ మంత్రి హరీశ్రావు తెలిపారు. ఈ మేరకు ఆయన నీటిపారుదల శాఖ మంత్రి ఉత్తమ్ కుమార్రెడ్డికి దీనిపై లేఖ రాశారు. గత సంవత్సరం ఇదే ఆగస్టు నెలలో ఆయా జలాశయాల్లో నీరు నిల్వ ఉందని, ఇప్పుడు చాలా తక్కువ నీరు ఉందని పేర్కొన్నారు. ఒకవైపు జలాశయాల్లో నీళ్లు లేక, మరోవైపు వర్షాలు కురవక రైతులు తీవ్ర ఆందోళనలో ఉన్నారని వ్యాఖ్యానించారు.
పంటలు వేయాలా వద్దా అనే అయోమయంతో రైతులు ఆవేదన చెందుతున్నారని హరీశ్రావు తెలిపారు. గత సంవత్సరంలో ఇదే సమయంతో పోలిస్తే జిల్లాల్లో పంటల సాగు విస్తీర్ణం కూడా తగ్గిపోయిందని వెల్లడించారు. రాజకీయాలు పక్కనపెట్టి మధ్యమానేరు నుంచి అన్నపూర్ణ, రంగనాయక సాగర్, మల్లన్న సాగర్, కొండ పోచమ్మ సాగర్లకు నీటిని పంపింగ్ చేసేలా అధికారులకు వెంటనే ఆదేశాలు జారీ చేయాలని సూచించారు. కాలువల ద్వారా నీటిని విడుదల చేసి ఆయకట్టుకు నీళ్లందించేలా చర్యలు తీసుకోవాలని, జిల్లా రైతాంగం పక్షాన కోరుతున్నానని పేర్కొన్నారు.
పీఏసీ ఛైర్మన్గా హరీశ్ రావు ! : మరోవైపు ప్రజా పద్దుల సంఘం ఛైర్మన్గా మాజీ మంత్రి, బీఆర్ఎస్ శాసనసభ్యుడు హరీశ్రావు ఎన్నికయ్యే అవకాశం కనిపిస్తోంది. 2024-25 ఆర్థిక సంవత్సరానికి సంబంధించి ప్రజా పద్దుల సంఘంతో పాటు అంచనాల కమిటీ, ప్రభుత్వ రంగ సంస్థల సమితి సభ్యుల ఎన్నిక కోసం నోటిఫికేషన్ జారీ చేశారు. మూడు కమిటీల్లో ఎమ్మెల్యేలు, ఎమ్మెల్సీలు ఉంటారు. బీఆర్ఎస్ నుంచి పీఏసీ సభ్యులుగా మాజీ మంత్రులు హరీశ్రావు, ప్రశాంత్ రెడ్డి, గంగుల కమలాకర్ పేర్లు ఇచ్చినట్లు తెలిసింది. కమిటీ ఏర్పాటు అనంతరం ఛైర్మన్ను ఎన్నుకుంటారు. ప్రజా పద్దుల సంఘం ఛైర్మన్ పదవి ప్రధాన ప్రతిపక్షానికి దక్కుతుంది. దీంతో పీఏసీ ఛైర్మన్గా హరీశ్రావును ఎన్నుకునే అవకాశాలు కనిపిస్తున్నాయి.
