YSRCP Leader Raped in Woman : న్యూడ్ వీడియోలు, ఫొటోలు ఇంటర్నెట్లో పెడతానంటూ వైఎస్సార్సీపీ నాయకుడు తనను బెదిరించి రెండేళ్లుగా అత్యాచారానికి పాల్పడుతున్నాడని గుంటూరుకు చెందిన ఓ గృహిణి వాపోయింది. అంతేకాక తన భర్తపై పలుమార్లు హత్యాయత్నం చేయించాడని ఆవేదన వ్యక్తం చేసింది. ఈ మేరకు బాధితురాలు సోమవారం జిల్లా పోలీసు కార్యాలయంలో ఏఎస్పీ సుప్రజకు ఫిర్యాదు చేశారు. స్పందించిన ఏఎస్పీ నిందితుడిని వెంటనే అరెస్ట్ చేసి చట్టపరమైన చర్యలు తీసుకోవాలని ఆదేశాలిచ్చారు.
ఇందుకు సంబంధించి బాధితురాలు విలేకరులకు వివరాలు వెల్లడించారు. ‘గుంటూరులో భార్యాభర్తలం తినుబండారాల తయారీ వ్యాపారం చేస్తున్నాం. వెంగళాయపాలేనికి చెందిన వైఎస్సార్సీపీ నేత దేవరకొండ నాగేశ్వరరావు అలియాస్‌ ఓంకార్‌ పలుమార్లు మా దుకాణానికి వచ్చాడు. ఆ తర్వాత షాప్లో దొంగతనం జరిగింది. అది తెలుసుకొని నా భర్తలేని సమయంలో దుకాణం వద్దకు వచ్చి తాను వైఎస్సార్సీపీలో తిరుగుతుంటానని మద్దాలి గిరి, అప్పిరెడ్డి బాగా తెలుసని చెప్పాడు. తన పలుకుబడితో చోరీ చేసినవారిని పట్టుకుంటానంటూ నా సెల్ఫోన్ నంబర్‌ తీసుకున్నాడు. అలా పరిచయం పెంచుకున్నాడు. ఓ రోజు దుకాణం లోపలకు వచ్చి నాపై అత్యాచారానికి పాల్పడ్డాడు. అప్పడు నాకు తెలియకుండా ఫొటోలు, వీడియోలు తీశాడు. వాటిని అడ్డుపెట్టుకొని తరచూ బెదిరించి అత్యాచారం చేశాడు.
రోజూ వాట్సాప్‌కాల్‌ చేసి నగ్నంగా చూపించమని బెదిరించేవాడు. దొంగలను పట్టుకోవటానికి డబ్బులు ఖర్చవుతాయని చెప్పి రోజూ రూ.4000 చొప్పున బలవంతంగా తీసుకువెళ్లేవాడు. ఇలా రెండు సంవత్సరాలుగా అత్యాచారం చేస్తూ డబ్బులు తీసుకుంటున్నాడు. వ్యాపారం సరిగాలేక అప్పులు పెరిగిపోయాయి. దీంతో అతనికి డబ్బులు ఇవ్వలేనని చెప్పా. డబ్బులివ్వలేదని గత నెల 23న నాపై విచక్షణారహితంగా దాడి చేశాడు. ఆ గాయాలను చూసి నా భర్త అడిగితే జరిగిన సంగతి చెప్పాను. వెంటనే పోలీస్ స్టేషన్‌కు తీసుకువెళ్లి ఫిర్యాదు చేయించారు. అది మనసులో ఉంచుకొని నన్ను, భర్తను, కుటుంబ సభ్యులను చంపేస్తానంటూ బెదిరింపులకు గురి చేస్తున్నాడు’ అని ఆమె వివరించారు.
అడ్డు తొలగించుకోవడానికి యత్నం : 'ఉదయం పది గంటలకు నా భార్య దుకాణం వద్దకు రాగానే నేను మార్కెటింగ్‌కు, తినుబండారాలు తయారీ సామగ్రి కొనుగోలు పనులపై బయటకు వెళ్లేవాణ్ని. సంవత్సరం కిందట విజయవాడకు సరకులు తెచ్చుకోవటానికి స్కూటీపై వెళ్తుంటే పెదకాకాని వద్ద గుర్తుతెలియని వాహనంతో ఢీకొట్టించాడు. చావుబతుకుల్లో ఉన్న నన్ను స్థానికులు 108లో ఆసుపత్రికి తరలించారు. కొద్ది నెలల కిందట లాలాపేట నుంచి ద్విచక్రవాహనంపై వస్తుంటే గుర్తుతెలియని వ్యక్తులతో నా తలపై ఇనుపరాడ్లతో దాడిచేయించాడు.
కొద్ది రోజుల కిందట నల్లపాడురోడ్డులోని ఇంటికి వెళ్తున్నాను. ఈ వెనుక నుంచి ఇద్దరు వ్యక్తులు వచ్చి ఇంజక్షన్‌చేసి వెళ్లారు. ఆసుపత్రికి వెళ్తే ప్రమాదకరమైన ఇంజక్షన్‌ చేశారని చెప్పారు. ఇకనుంచి జాగ్రత్తగా ఉండాలని వైద్యులు సూచించారు. ఇటీవల నా భార్యపై దేవరకొండ నాగేశ్వరరావు దాడి చేసిన తర్వాత ఈ విషయాలన్నీ వెలుగులోకివచ్చాయి. నా అడ్డు తొలగించుకోవటానికి హత్యాయత్నం చేసినట్లు తెలిసింది. అతడిపై పోలీసులకు ఫిర్యాదు చేశామని, మమ్మల్ని చంపేసి జైలుకు వెళ్లినా రాజకీయపెద్దలు అండ ఉందని, వాళ్లు బయటకు తీసుకువస్తారంటూ బెదిరిస్తున్నాడు.' అని బాధితురాలి భర్త వాపోయాడు.
మేనమామ కాదు మానవ మృగం - తొమ్మిదో తరగతి బాలికపై అత్యాచారం
ప్రాణాలతో ఉందో? లేదో? తెలియకుండానే అత్యాచారం - ఆపై కాల్వలో పడేసిన యువకులు
