అచ్యుతాపురం సెజ్‌లో ప్రమాదం - కెమికల్ ఫ్యాక్టరీలో రియాక్టర్ పేలి కార్మికుడు మృతి - Expode in Atchutapuram SEZ

Expode in Atchutapuram SEZ: అనకాపల్లి జిల్లా అచ్యుతాపురం సెజ్‌లోని వసంత కెమికల్ ఫ్యాక్టరీలో ఘోర ప్రమాదం చోటు చేసుకుంది. రియాక్టర్ పేలటంతో ఓ కార్మికుడికి తీవ్ర గాయాలవ్వగా ఆస్పత్రిలో చికిత్స పొందుతూ మృతి చెందాడు.

Expode in Atchutapuram SEZ: అనకాపల్లి జిల్లా రాంబిల్లి మండలం అచ్యుతాపురం సెజ్‌లో ఘోర ప్రమాదం చోటు చేసుకుంది. వసంత కెమికల్ ఫ్యాక్టరీలో రియాక్టర్ పేలటంతో ఓ కార్మికుడికి తీవ్ర గాయాలపాలై ఆస్పత్రిలో చికిత్స పొందుతూ మృతి చెందాడు. ఈ ప్రమాదంపై సమాచారం అందిన వెంటనే సీఐ నరసింగరావు ఘటనా స్థలానికి చేరుకుని చర్యలు చేపట్టారు. మృతుడిని ఒడిశాకు చెందిన ప్రదీప్‌రౌత్‌(44)గా గుర్తించారు.

ప్రమాదం జరిగే సమయానికి ప్రదీప్ రౌత్ శుభ్రం చేసే పనిలో నిమగ్నమై ఉన్నాడు. రియాక్టర్ పక్కనే ఉండడంతో ప్రమాదంలో మృత్యువాత పడ్డాడు. కార్మికుడి మృతిపై కుటుంబ సభ్యులకు కంపెనీ యాజమాన్యం సమాచారం అందించింది. ఈ ఘటనకు గల కారణాలు ఇంకా తెలియరాలేదు. ప్రమాదానికి గల కారణాలపై పోలీసు అధికారులు విచారణ చేస్తున్నారు. వసంతా కెమికల్ పరిశ్రమలోకి ఎవరినీ అనుమతించడం లేదు. పేలుడు విషయాన్ని రహస్యంగా దాచి పెట్టారు. ఈ ప్రమాదంపై హోంమంత్రి అనిత స్పందించారు. ప్రమాదానికి గల కారణాలపై కలెక్టర్​కు ఫోన్​ చేసి ఆమె ఆరా తీశారు.

ప్రమాదంపై సమాచారం అందిన వెంటనే ఎలమంచిలి ఎమ్మెల్యే సుందరపు విజయ్ కుమార్ హుటాహుటిన సంఘటన స్థలానికి చేరుకున్నారు. కంపెనీ ప్రతినిధులతో మాట్లాడారు. ప్రమాదానికి గల కారణాలు అడిగి తెలుసుకున్నారు. భవిష్యత్తులో ఇలాంటి ప్రమాదాలు జరగకుండా కట్టుదిట్టమైన రక్షణ చర్యలు చేపట్టాలని ఎమ్మెల్యే కంపెనీ ప్రతినిధులకు సూచించారు. బాధిత కుటుంబానికి తక్షణం న్యాయం జరిగేలా చూడాలని డిమాండ్ చేశారు. ఎమ్మెల్యే విజయ్ కుమార్ ఆదేశాల మేరకు మృతుడి కుటుంబ సభ్యులకు రూ.35 లక్షల పరిహారాన్ని కంపెనీ యాజమాన్యం ప్రకటించింది. బాధిత కుటుంబాన్ని అన్ని విధాలా ఆదుకుంటామని హామీ ఇచ్చింది.

పరిశ్రమల్లో వరుస ప్రమాదాలు జరుగుతుండటం దురదృష్టకరమని కార్మిక శాఖ మంత్రి వాసంశెట్టి సుభాష్ ఆవేదన వ్యక్తం చేశారు. గత ప్రభుత్వం సేఫ్టీ ఆడిట్​ను థర్డ్ పార్టీకి అప్పగించటం వల్ల తనిఖీ వ్యవస్థ నిర్వీర్యం అయిందని ధ్వజమెత్తారు. సేఫ్టీ ఆడిట్​లో ఇకపై ప్రభుత్వ నిఘా ఉంటుందని స్పష్టం చేశారు. బూడిద దోపిడీ కోసం పెద్దిరెడ్డి జెన్కోలో పెద్ద ఎత్తున అవినీతిని ప్రోత్సహించారని ఆక్షేపించారు. ఇసుక దోపిడీపై వైఎస్సార్సీపీ నేతలు దెయ్యాలు వేదాలు వల్లించినట్లు మాట్లాడుతున్నారని మండిపడ్డారు. ఇసుక మాఫియాతో దాదాపు 30 లక్షల భవన నిర్మాణ కార్మికుల పొట్ట కొట్టారని ఆగ్రహం వ్యక్తం చేశారు. అన్ని రంగాలను ఆదుకునేలా తెలుగుదేశం ప్రభుత్వం తీసుకొచ్చిన ఉచిత ఇసుక విధానంపై వైఎస్సార్సీపీ విమర్శలు సిగ్గుచేటని దుయ్యబట్టారు.