'బాత్​రూం పక్కనే పనివాళ్ల గదులు - అదే అనుమానం కలిగిస్తోంది' - సీఎంఆర్​ ఘటనపై ఏసీపీ

వసతి గృహంలోని బాత్రూంలో దృశ్యాలను చిత్రీకరించారని ఇంజినీరింగ్ విద్యార్థినులు ధర్నా - పలు అనుమాలు వ్యక్తం చేస్తున్న పోలీసులు - స్పందించిన మహిళా కమిషన్ - విచారణకు ఆదేశం

CMR College Students Protest Over Secret Filming in Hostel : మేడ్చల్‌ జిల్లా కండ్లకోయలోని సీఎంఆర్‌ ఇంజినీరింగ్‌ కళాశాల వసతి గృహంలో విద్యార్ధినుల ఆందోళన నేపథ్యంలో పోలీసులు దర్యాప్తు ప్రారంభించారు. విద్యార్థినుల వసతి గృహంలో కొందరు సెల్‌ఫోన్‌లతో వీడియోలు చిత్రీకరిస్తున్నారని నిన్న రాత్రి విద్యార్థినులు ఆందోళనకు దిగారు. పోలీసులు ఇప్పటివరకు ఐదుగురు అనుమానితులను అదుపులోకి తీసుకున్నారు. వారి సెల్‌ఫోన్‌లను స్వాధీనం చేసుకున్నారు. వీడియోలు చిత్రీకరిస్తున్న సమయంలో కిటీకీలపై కొన్ని చేతి ముద్రలు ఉండడాన్ని గమనించిన విద్యార్థినులు ఈ విషయాన్ని పోలీసుల దృష్టికి తీసుకువెళ్లారు.

బాత్​రూం పక్కనే పనివాళ్ల గది : ఈ విషయంపై మాట్లాడిన మేడ్చల్​ ఏసీపీ శ్రీనివాస్ రెడ్డి ఐదుగురు అనుమానితులను అదుపులోకి తీసుకుని విచారిస్తున్నామన్నారు. పోలీసులు విద్యార్థినుల వసతి గృహాలను పరిశీలించిన వారు కొన్ని గదులు సిబ్బందికి అనుసంధానం చేసి ఉన్నాయని తెలిపారు. అలా ఉండడం వల్ల వీడియోలు తీయడానికి ఆస్కారం ఉందన్నారు. బాత్​రూమ్​ల వెంటిలేటర్లు ఇతర గదులకు అనుసంధానం చేసి ఉన్నాయన్నారు. అనుమానితుల నుంచి స్వాధీనం చేసుకున్న ఫోన్లలో వీడియోలు తీశారా, డిలీట్​ చేశారా లేదా అన్నదానికి కోసం ప్రత్యేక సాఫ్ట్​వేర్​ ద్వారా తెలుసుకుంటున్నామని తెలిపారు. ఒకవేళ రుజువైతే నిందితులపై కఠిన చర్యలు తీసుకుంటామని ఏసీపీ స్పష్టం చేశారు.

"ఫోన్లలో డిలీటెడ్ వీడియోలు ఉన్నా అనుమానితులపై చర్యలు తీసుకుంటాం. ఈ ఘటనలో మేనేజ్​మెంట్​ నిర్లక్ష్యం ఉంది. మహిళల గదుల వెనక పనివాళ్లకు రూమ్​లు పెట్టడం జరిగింది. అనుమానానికి ఆస్కారం ఉంది. ఇప్పటికైతే ఎలాంటి వీడియోలు లభించలేదు. గదుల వెంటిలెటర్స్​ పనివాళ్లకు యాక్సెస్​ ఉంది. స్వాధీనం చేసుకున్న ఫోన్లలో చెక్​ చేయగా ఎందులో ఎలాంటి వీడియోలు లేవు." - శ్రీనివాస్ రెడ్డి, మేడ్చల్​ ఏసీపీ

భద్రతకు భరోసా ఎక్కడ : విషయం తెలుసుకున్న ఎఐఎస్‌ఎఫ్‌, ఎబీవీపీ విద్యార్ధి సంఘాలతో పాటు విద్యార్థినులు తల్లిదండ్రులు కళాశాల వద్దకు చేరుకుని ఆందోళన నిర్వహించారు. విద్యార్థినులకు వసతి గృహంలో భద్రత లేకుండా పోయిందని విద్యార్థి సంఘాల నేతలు ఆరోపించారు. దీంతో పోలీసులు కళాశాల వద్ద భారీగా మోహరించారు. పిల్లల చదువుల కోసం కష్టపడి ఇక్కడ చదివిస్తుంటే వారి భద్రతకు భరోసా లేకుండాపోతోందని తల్లిదండ్రులు ఆందోళన వ్యక్తం చేశారు.

విచారణ కోరిన మహిళా కమిషన్ : తాజాగా ఈ ఘటనపై మహిళా కమిషన్‌ విచారణకు ఆదేశించింది. సీఎంఆర్ కళాశాల హాస్టల్​ను మహిళా కమిషన్​ సభ్యురాలు పద్మజా రమణ పరిశీలించారు. విద్యార్థినుల వసతి గృహం బాత్‌రూంలో వీడియోల రికార్డు విషయాన్ని కమిషన్‌ సుమోటోగా స్వీకరించింది. సత్వరమే విచారణ జరిపి నివేదిక సమర్పించాలని సైబరాబాద్‌ సీపీ అవినాష్‌ మహంతిని కమిషన్‌ ఆదేశించింది.