CV ANAND APOLOGY TO NATIONAL MEDIA : సంధ్య థియేటర్‌ వద్ద అసలేం జరిగిందో వివరిస్తూ హైదరాబాద్ సీపీ సీవీ ఆనంద్ ప్రెస్‌మీట్‌ పెట్టిన విషయం తెలిసిందే. థియేటర్‌లో ఆరోజు ఏం జరిగిందో వివరిస్తూ కొన్ని వీడియోలను విడుదల చేశారు. ఈక్రమంలో మీడియా సీవీ ఆనంద్ని కొన్ని విషయాలపై ప్రశ్నించగా, నేషనల్ మీడియా ఈ ఘటనకు మద్దతు ఇస్తుందంటూ సంచలన కామెంట్స్ చేశారు. దీంతో అక్కడ ఉన్న కొందరు విలేకరులు ఈ ఆరోపణలను తప్పుపట్టారు.
హైదరాబాద్ సీపీ సీవీ ఆనంద్ నేషనల్ మీడియాకి క్షమాపణలు చెప్పారు. నేషనల్ మీడియాను ఉద్దేశించి తాను చేసిన కామెంట్స్ వెనక్కి తీసుకుంటున్నట్లు సోషల్ మీడియాలో పోస్ట్‌ పెట్టారు. సంధ్య థియేటర్‌ ఘటనపై నేషనల్ మీడియా ప్రశ్నలు అడిగినప్పుడు తాను సహనాన్ని కోల్పోయినట్లు పేర్కొన్నారు. ఈ ఘటనపై విచారణ జరుగుతోందని, ప్రెస్‌మీట్‌లో రెచ్చగొట్టే ప్రశ్నలు వేయడంతో తాను కాస్త సహనాన్ని కోల్పోయానని అన్నారు. పరిస్థితులు ఎలా ఉన్నా సంయమనం పాటించాల్సి ఉంటుందని, అయితే తాను చేసింది పొరబాటుగా భావిస్తున్నానని తెలిపారు. నేషనల్ మీడియాపై తన కామెంట్స్ వెనక్కి తీసుకుంటున్నాని, క్షమాపణలు కోరుతున్నానని అన్నారు.
సంధ్య థియేటర్‌ ఘటన - లైవ్ వీడియో విడుదల చేసిన పోలీసులు
I apologise for losing my cool when asked continuous provoking questions on ongoing investigations and making unnecessary general remarks about national media . I feel bad that I got provoked and it was wrong and should have kept calm .I withdraw my remarks wholeheartedly 🙏🏻
— CV Anand IPS (@CVAnandIPS) December 22, 2024
మరోవైపు సంధ్య థియేటర్‌ ఘటనపై ఇన్వెస్టిగేషన్ కొనసాగుతోందని, న్యాయపరమైన సలహాలు తీసుకుని ముందుకెళ్తామని హైదరాబాద్ సీపీ సీవీ ఆనంద్ పేర్కొన్నారు. డిసెంబరు 4వ తేదీన సంధ్య థియేటర్‌ వద్ద జరిగిన ఘటనపై మీడియా అడిగిన ప్రశ్నలకు ఆనంద్ సమాధానమిచ్చారు. ఘటనకు సంబంధించిన సీసీ ఫుటేజ్‌ను ఇప్పటికే విడుదల చేశారు.
ఇక ఈ ఘటనపై తాజాగా సినీ నటి, కాంగ్రెస్‌ నాయకురాలు విజయశాంతి సైతం స్పందించారు. ఇలాంటి ఘటన జరగడం దురదృష్టకరమని అన్నారు. దీనిపై తెలంగాణ సీఎం రేవంత్‌పై కేంద్రమంత్రులు ఆరోపణలు చేయడాన్ని తప్పుబట్టారు. ఈ ఘటనను తమకు అనుకూలంగా మార్చుకునేందుకు బీజేపీ నేతలు యత్నిస్తున్నారని విజయశాంతి అన్నారు. సినిమా ఇండస్ట్రీకి అన్ని ప్రాంతాల ప్రజల ఆదరణ కావాలని, ఇలాంటి ఘటనలు జరగకుండా సమస్యను పరిష్కరించుకునేందుకు ప్రయత్నం చేయాలని సూచించారు.
అలాంటి వారికి దూరంగా ఉండండి: అభిమానులకు అల్లు అర్జున్‌ విజ్ఞప్తి
