పండుగ వేళ పస్తులేనా? సామాన్యులకు చుక్కలు చూపిస్తున్న నిత్యావసరాలు

భారీగా పెరిగిన ఉల్లి, టమాటా ధరలు

Common People Problems Due to Increased Vegetable Prices : పండుగ వేళ నిత్యావసరాలు, కూరగాయల ధరలు సామాన్యులకు చుక్కలు చూపిస్తున్నాయి. టమాటా, ఉల్లి కొనలేని పరిస్థితి. రైతు బజార్లలో రాయితీపై పంపిణీ కొంతమేర ఉపశమనం కల్గిస్తున్నా సామాన్యుల నెలవారీ బడ్జెట్‌ లెక్క తప్పుతోంది.

నెల క్రితం వర్షాలు, వరదల వల్ల అవస్థలు పడ్డ విజయవాడ వాసులు ఇప్పుడు పెరిగిన కూరగాయల ధరలతో సతమతమవుతున్నారు. పండుగ వేళ సంచి నిండా కూరగాయలుకొనే పరిస్థితి లేకుండా పోయింది. పటమట రైతుబజార్‌లో నెల క్రితం 40 రూపాయలున్న కిలో టమోటా ఇప్పుడు 65 రూపాయలకు ఎగబాకింది. ఉల్లిఘాటు కిలో 40 నుంచి 50 రూపాయలకు చేరింది. బహిరంగ మార్కెట్‌లో ఇంకొంచెం ఎక్కువే. ఇక దొండ, బీర, క్యారెట్‌ కిలో 40 పలుకుతుంటే క్యాప్సికం, బీన్స్, చిక్కుడు కిలో 60 రూపాయలకు విక్రయిస్తున్నారు. ధరాభారంతో కిలోకు బదులు అరకిలో, పావుకిలోతో సరిపెట్టుకుంటున్నారు సామాన్యులు.

రైతుబజార్‌లో టమోటా, ఉల్లి గడ్డలను ప్రభుత్వం రాయితీపై సరఫరా చేయడం కొంత ఉపశమనం కలిగిస్తోంది. రాయితీపై కిలో టమోటా 50, కర్నూలు ఉల్లి 32 రూపాయలకు అందిస్తున్నారు. ఐతే ఒక్కొక్కరికీ కిలో చొప్పునే విక్రయిస్తున్నారు. అది కూడా క్యూకట్టాల్సిన పరిస్థితి. రాయితీపై ఈ నెల 13 వరకే సరఫరా చేయనున్నారు. ధరలు పెరగడం వల్ల కొనుగోళ్లూ బాగా తగ్గాయని వ్యాపారులూ నిట్టూరుస్తున్నారు.

'ఇంతకు ముందు వంద రూపాయలకు నాలుగు రకాల కూరగాయలు తీసుకునేవాళ్లం. ఇప్పుడు ఐదు వందలవి తీసుకోవాల్సి వస్తుంది. మార్కెట్​లో టమోటాలు కిలో 65 రూపాయలన్నాయి. బయట రూ. 90 కి అమ్ముతున్నారు. ఏం కొనాలన్నా రేట్లు భయపెడుతున్నాయి. ధరలు పెరిగిపోవడంతో కిలో తీసుకునే పావు కిలో తీసుకుంటున్నాం.' - కొనుగోలుదారులు

'వర్షాల కారణంగా పంటలన్నీ దెబ్బతిన్నాయి. దీంతో పక్క రాష్ట్రాల వారు కూడా కూరగాయల కోసం మనల్నే ఆశ్రయిస్తున్నారు. పండుగ తరువాత ధరలు సాధారణ స్థితికి వచ్చే అవకాశం ఉంది.' - కరుణాకర్, ఎస్టేట్ అధికారి, పటమట రైతుబజార్

పండుగ వేళ డిమాండ్‌ ఎక్కువగా ఉండటం వల్లే ధరలు పెరిగాయని, పండుగ తర్వాత ధరలు దిగొస్తాయని మార్కెట్‌ అధికారులు అంచనా వేస్తున్నారు.