బలమైన వ్యవస్థగా 'హైడ్రా' ఉండాలి - అందుకు నిధులు కేటాయింపు? - రివ్యూలో సీఎం రేవంత్ రెడ్డి - CM Revanth on HYDRA Procedures

CM Revanth Reddy on HYDRA : హైదరాబాద్ అభివృద్ధి, ఆస్తుల పరిరక్షణలో హైడ్రా చాలా బలమైన వ్యవస్థగా ఉండాలని ముఖ్యమంత్రి రేవంత్ రెడ్డి ఆదేశించారు. నగరంలోని 2వేల చ.కి.మీ పరిధిలో హైడ్రా విధులు నిర్వహించాలని సూచించారు. హైదరాబాద్​లోని సచివాలయంలో హైడ్రాపై జరిగిన సమీక్షలో కీలక ఆదేశాలు జారీచేశారు.

CM Revanth Reddy Review of HYDRA Procedures : హైదరాబాద్​ సిటీ విస్తరణకు అనుగుణంగా ప్రజలకు విస్తృత సేవలను అందించేలా హైదరాబాద్​ డిజాస్టర్​ రెస్పాన్స్​ అండ్​ అసెట్స్​ మానిటరింగ్​ ప్రొటెక్షన్​(హైడ్రా) రూపుదిద్దుకోవాలని సీఎం రేవంత్​ రెడ్డి అన్నారు. జాతీయ విపత్తుల నిర్వహణ చట్టానికి అనుగుణంగా ఈ కొత్త వ్యవస్థను ఏర్పాటు చేయాలని నిర్ణయించుకున్నారు. హైడ్రా వ్యవస్థాగత నిర్మాణం, విధి విధానాలపై మరింత అధ్యయనం చేసి కసరత్తు చేయాలని ముఖ్యమంత్రి సూచించారు. హైడ్రా ఏర్పాటు, సంబంధిత విధివిధానాలపై ముఖ్యమంత్రి రేవంత్​ రెడ్డి సచివాలయంలో సమీక్ష నిర్వహించారు.

జీహెచ్​ఎంసీతో పాటు హెచ్​ఎండీఏ, వాటర్​ బోర్డు, విజిలెన్స్​, ట్రాఫిక్​, విద్యుత్​, పోలీసు విభాగాలను సమన్వయం చేసుకొని మరింత సమర్థంగా హైడ్రా పని చేసేలా ఉండాలని అధికారులకు ముఖ్యమంత్రి పలు సూచనలు చేశారు. ఇప్పుడున్న ఎన్​ఫోర్స్​మెంట్​ విజిలెన్స్​ అండ్​ డిజాస్టర్​ మేనేజ్​మెంట్​ విభాగాన్ని అందుకు అనుగుణంగా పునర్​ వ్యవస్థీకరించాలని ఆదేశించారు.

కొత్త విభాగంలో ఏయే స్థాయి అధికారులుండాలి, ఎంతమంది సిబ్బంది ఉండాలి ఏయే విభాగాలపై వీరిని డిప్యూటేషన్​పై తీసుకోవాలి అనే అంశాలపై స్పష్టమైన ప్రతిపాదనలు సిద్ధం చేయాలని సీఎం ఆదేశించారు. జీహెచ్​ఎంసీతో పాటు ఓఆర్​ఆర్​ వరకు 2వేల కిలోమీటర్ల పరిధిలో హైడ్రా పని చేయాల్సి ఉంటుందని, పని విభజనకు వీలుగా సిటీలో ఇప్పుడున్న జోన్ల తరహాలో భౌగోళిక పరిధిని నిర్దేశించైలని సీఎం సూచించారు.

హైడ్రాకు ప్రత్యేక నిధులు కేటాయించాలి? : అవసరమైతే హైడ్రా(Hyderabad Disaster Response and Assets Monitoring and Protection)కు ప్రత్యేక నిధులు కేటాయించే అంశాన్ని పరిశీలించాలని సీఎం చెప్పారు. ఈ అసెంబ్లీ సమావేశాల్లో ముసాయిదా తయారు చేయాలని స్పష్టం చేశారు. విపత్తుల నిర్వహణతో పాటు ప్రభుత్వ ఆస్తుల పరిరక్షణ, చెరువులు, నాలాల కబ్జాలకు అడ్డుకట్ట వేయటం, ఆక్రమణలను తొలగించటం, అక్రమ నిర్మాణాలు, నిబంధనలను పాటించని ఫ్లెక్సీలు, హోర్డింగ్లు, ప్రకటనల తొలగింపు, ట్రాఫిక్​ నిర్వహణ, తాగునీరు, విద్యుత్​ సరఫరాలో హైడ్రా కీలకంగా వ్యవహరించేలా విధులు అప్పగించాలని సీఎం అధికారులను ఆదేశించారు.

CM Revanth to Allocate Funds to Hydra : హెచ్​ఎండీఏ, వాటర్​ వర్క్​లు, డిజాస్టర్​ మేనేజ్​మెంట్​, మున్సిపల్​ విభాగాల మధ్య ఎప్పటికప్పుడు సమన్వయం ఉండాలని అధికారులను సీఎం రేవంత్​ రెడ్డి అప్రమత్తం చేశారు. జీహెచ్​ఎంసీ పరిధిలో ఉన్న అనధికారిక హోర్డింగ్స్​, ఫ్లెక్సీలు తొలగింపు, అపరాధ రుసుము వసూలు బాధ్యతను హైడ్రాకు బదలాయించాలని అన్నారు. నాలాలు, చెరువులు, ప్రభుత్వ స్థలాల ఆక్రమణల విషయంలో నిబంధనలు కఠినంగా ఉండేలా అధ్యయనం చేయాలని సూచించారు. ఈ సమావేశంలో రాష్ట్ర ప్రభుత్వ ప్రధాన కార్యదర్శి శాంతి కుమారి, మున్సిపల్ అడ్మినిస్ట్రేషన్ ముఖ్య కార్యదర్శి దానకిషోర్, జీహెచ్ఎంసీ కమిషనర్ అమ్రాపాలీ, జీహెచ్ఎంసీ ఈవీడీఎం కమిషనర్ రంగనాథ్, సీఎంవో ముఖ్య కార్యదర్శి శేషాద్రి, సీఎం ప్రత్యేక కార్యదర్శి అజిత్ రెడ్డి పాల్గొన్నారు.