ఉచిత గ్యాస్​ సిలిండర్​కు వేళాయే - శ్రీకాకుళంలో సీఎం, ఏలూరులో డిప్యూటీ సీఎం

ఉత్తరాంధ్ర పర్యటనకు బయల్దేరిన ముఖ్యమంత్రి చంద్రబాబు - నేడు శ్రీకాకుళం జిల్లా ఈదుపురంలో ఉచిత గ్యాస్‌ సిలిండర్ల పథకానికి శ్రీకారం

CM Chandrababu Will Start Free Gas Cylinder Scheme : సూపర్ సిక్స్ హామీల్లో ఒకటైన ఉచిత గ్యాస్ సిలిండర్ల పథకాన్ని దీపావళి పండుగ కానుకగా ఏపీ ప్రభుత్వం అమలు చేసిన విషయం తెలిసిందే. 29వ తేదీ నుంచి ప్రభుత్వం ఈ పథకం కింద గ్యాస్ బుక్ చేసుకునే అవకాశాన్ని లబ్ధిదారులకు కల్పించింది. నేడు శ్రీకాకుళం జిల్లా ఈదుపురం గ్రామంలో దీపం-2 పథకం ముఖ్యమంత్రి నారా చంద్రబాబు నాయడు లాంఛనంగా ప్రారంభించబోతున్నారు. అర్హులైన లబ్ధిదారులకు ఉచితంగా గ్యాస్ సిలిండర్లను సీఎం పంపిణీ చేయనున్నారు.

ఈ మేరకు ఉండవల్లి నుంచి ముఖ్యమంత్రి చంద్రబాబు ఉత్తరాంధ్ర పర్యటనకు బయలుదేరారు. శుక్రవారం, శనివారం ఉత్తరాంధ్ర జిల్లాల్లో సీఎం పర్యటన జరుగనుంది. నేటి నుంచి దీపం 2 పథకం ప్రారంభంకానుంది. శ్రీకాకుళం జిల్లా ఇచ్చాపురం నియోజకవర్గంలో ఈదుపురం గ్రామంలో ముఖ్యమంత్రి చంద్రబాబు లాంఛనంగా ప్రారంభించనున్నారు. ఉచిత గ్యాస్ సిలిండర్​లను లబ్ధిదారులకు అందించనున్నారు. ఎన్టీఆర్ భరోసా ఫించన్​ను లబ్ధిదారులకు సీఎం అందించనున్నారు. ప్రజల నుంచి వినతులు తీసుకుని, రైతులతో ముఖాముఖి నిర్వహించనున్నారు. జిల్లా అధికారులు, మంత్రులతో సీఎం సమీక్షించనున్నారు. రాత్రికి శ్రీకాకుళంలోనే ముఖ్యమంత్రి చంద్రబాబు బస చేయనున్నారు.

ఏలూరు జిల్లా పర్యటనలో ఉప ముఖ్యమంత్రి: మరోవైపు ఏలూరు జిల్లా ఐఎస్ జగన్నాధపురంలో ఉచిత సిలిండర్లను లబ్ధిదారులకు ఉపముఖ్యమంత్రి పవన్ కల్యాణ్​ అందించనున్నారు. రాష్ట్రవ్యాప్తంగా మంత్రులు, ఎమ్మెల్యేలు ఈ పథకాన్ని ప్రారంభించనున్నారు. సూపర్ సిక్స్ హామీలను నెరవేర్చే దిశగా కూటమి ప్రభుత్వం అడుగులు వేస్తోంది. దీపం 2 పథకానికి సంవత్సరానికి 2 వేల 684 కోట్లు ఖర్చు పెట్టనుంది. మొదటి విడతగా 894 కోట్లను పెట్రోలియం సంస్థలకు ముఖ్యమంత్రి చంద్రబాబు అందజేశారు. ప్రతి నాలుగు నెలలకి ఒక ఉచిత సిలిండర్ చొప్పున సంవత్సరానికి మూడు సిలిండర్ల అందజేయనున్నారు. తెల్ల రేషన్ కార్డు ఉన్న వారందరూ దీపం 2 పథకానికి అర్హులేనని తెలిపారు.

48 గంటల్లో సొమ్ము ఖాతాలో జమ : మొదటి సిలిండర్ మార్చి 31 వరకూ ఎప్పుడైనా తీసుకునే వెసులుబాటు కల్పించారు. అక్టోబర్ 29 నుంచీ బుకింగ్స్ ప్రారంభమయ్యాయి. ఇప్పటివరకూ 5 లక్షల దాకా బుకింగ్స్ అయ్యాయి. గ్యాస్ సిలెండర్ అందించిన దగ్గర నుంచి 48 గంటల్లోపు లబ్ధిదారుల ఖాతాల్లోకి నగదు జమ చేయనున్నారు. ఎవ్వరికైనా పథకం అందకపోతే 1967 టోల్ ఫ్రీ నెంబర్ కు ఫోన్ చేసి ఫిర్యాదు చెయ్యెచ్చని తెలిపారు. పట్టణాల్లో గ్యాస్ సిలెండర్ 24 గంటల్లో, పల్లెల్లో అయితే 48 గంటల్లోనే అందించే ఏర్పాట్లు చేశారు. ప్రభుత్వం దగ్గర ఉన్న సమాచారం ప్రకారం 1 కోటి 40 లక్షల మంది ఉచిత గ్యాస్ పథకం లబ్ధిదారులు ఉన్నారు. మొదటి సిలిండర్ ను మార్చి 31 లోపు, రెండోది జులై 31, మూడోది నవంబరు 30లోపు తీసుకోవచ్చని తెలిపారు.

నవంబర్‌, డిసెంబర్‌, జనవరి, ఫిబ్రవరి, మార్చి నెలలకు మొదటి సిలిండర్‌ బుకింగ్స్‌ ప్రారంభమయ్యాయి. రెండో విడతలో ఏప్రిల్ 1 నుంచి జులై 30 వరకూ, మూడో విడతలో ఆగస్టు 1 నుంచి నవంబర్ 31 వరకూ, నాలుగో విడత 2025 డిసెంబర్ 1 నుంచి 2026 మార్చి 31 వరకూ బుకింగ్ చేసుకునే సౌకర్యం ప్రభుత్వం కల్పించింది.