Group 2 candidates Appeal To APPSC : వచ్చే ఏడాది జనవరి 5న నిర్వహించబోయే ఏపీపీఎస్సీ గ్రూప్-2 మెయిన్స్ పరీక్షను వాయిదా వేయాలని పలువురు అభ్యర్థులు ఆంధ్రప్రదేశ్ పబ్లిక్ సర్వీస్ కమిషన్ను కోరుతున్నారు. సిలబస్ మార్పులు, పూర్తిస్థాయిలో సన్నద్ధత కోసం మరికొంత సమయం ఇవ్వాలని విజ్ఞప్తి చేస్తున్నారు. రాష్ట్రంలోని నిరుద్యోగుల అభ్యర్థన, ఆందోళన దృష్ట్యా ఏపీపీఎస్సీ సానుకూల నిర్ణయం తీసుకోవాలని పలువురు ప్రజాప్రతినిధులు సైతం కోరారు. గ్రూప్-2 ప్రధాన పరీక్ష గడువు పెంపుపై సానుకూలంగా స్పందించిన ఏపీపీఎస్సీ, డీఎస్సీ తేదీల ప్రకటనల ఆధారంగా గ్రూప్-2 మెయిన్స్ పరీక్ష తేదీలపై నిర్ణయం తీసుకోనుంది.
APPSC Groups Mains Exam Issue : సర్కారు కొలువు సాధించాలన్న లక్షలాది మంది నిరుద్యోగుల జీవిత లక్ష్యాన్ని గత వైఎస్సార్సీపీ ప్రభుత్వం నీరుగార్చింది. ఖాళీ పోస్టులన్నీ భర్తీ చేస్తామని చెప్పి అధికారపీఠమెక్కిన వైఎస్ జగన్ కీలకమైన గ్రూప్-1, గ్రూప్ 2 ఉద్యోగాల నియామకాలను పక్కన పెట్టారు. లక్షల మంది నిరుద్యోగులు రోడ్డెక్కి ఆందోళనలకు దిగడం వల్ల గతేడాది డిసెంబర్ 7న హడావుడిగా 897 ఉద్యోగాల భర్తీకి మాత్రమే ఏపీపీఎస్సీ గ్రూప్-2 నోటిఫికేషన్ జారీ చేసింది.
సిలబస్‌లో మార్పులు చేసి గ్రూప్స్ అభ్యర్థులు పరీక్షకు సన్నద్ధమయ్యే సమయం ఇవ్వకుండా ఆగమేఘాలపై నియామక ప్రక్రియ చేపట్టింది. గ్రూప్-2కు 4లక్షల 83వేల 535 మంది అభ్యర్థులు అప్లికేషన్లు పెట్టుకోగా ఈ ఏడాది ఫిబ్రవరిలో నిర్వహించిన ప్రిలిమ్స్ పరీక్షకు 4 లక్షల 4 వేల 37మంది హాజరయ్యారు. వారిలో 92వేల 250మంది మాత్రమే ప్రధాన పరీక్షకు అర్హత సాధించారు.
మరోసారి వాయిదా వేయాలని కోరుతున్నాం : "ఈ ఏడాది జూలై 28న మెయిన్స్( ప్రధాన) పరీక్షలు జరగాల్సి ఉండగా అభ్యర్థుల విజ్ఞప్తితో కూటమి సర్కారు వాయిదా వేసింది. గౌతమ్‌ సవాంగ్‌ రాజీనామా చేయడంతో ఆంధ్రప్రదేశ్ పబ్లిక్ సర్వీస్ కమిషన్ ఛైర్ పర్సన్‌గా ఇటీవల రిటైర్డ్ ఐపీఎస్ అధికారిణి ఎ.ఆర్.అనురాధ బాధ్యతలు చేపట్టారు. పెండింగ్‌లో ఉన్న ఖాళీల భర్తీకి కార్యాచరణ రూపొందించి వచ్చే ఏడాది జనవరి 5న గ్రూప్-2 మెయిన్స్ నిర్వహించాలని ఈ మేరకు నిర్ణయించారు. సన్నద్ధతకు 60 రోజుల వ్యవధి మాత్రమే ఉండటం వల్ల అభ్యర్థులు ఆందోళన చెందుతున్నారు. మరోసారి వాయిదా వేయాలని ప్రభుత్వాన్ని కోరుతున్నాం" అని గ్రూప్-2 మెయిన్స్ అభ్యర్థులు తెలిపారు.
గ్రూప్-2 వాయిదా వేసే ఛాన్స్ : గ్రూప్స్ అభ్యర్థుల వినతి మేరకు గ్రూప్-2 ప్రధాన పరీక్షను వాయిదా వేయాలని ప్రజా ప్రతినిధులు సైతం పబ్లిక్ సర్వీస్ కమిషన్ ఛైర్పర్సన్ అనురాధను కలసి వేర్వేరుగా విజ్ఞాపన పత్రాలిచ్చారు. మరో 30 రోజులు గడువు పెంచి ఫిబ్రవరిలో మెయిన్స్ పరీక్షను నిర్వహించాలని కోరారు.
నిరుద్యోగ అభ్యర్థులు, ప్రజాప్రతినిధుల నుంచి పెద్దఎత్తున విజ్ఞప్తులు వస్తున్నందున పరీక్ష తేదీ మార్చే అంశంపై ఆంధ్రప్రదేశ్ పబ్లిక్ సర్వీస్ కమిషన్ సానుకూల ధోరణితో సమాలోచనలు చేస్తున్నట్లుగా తెలిసింది. నిరుద్యోగులకు అనుకూలంగా నిర్ణయాలు తీసుకోవాలన్న సర్కారు ఆదేశాల మేరకు గ్రూప్-2 మెయిన్స్ పరీక్షను మరోసారి వాయిదా వేసే అవకాశాలే ఎక్కువగా ఉన్నాయని ఏపీపీఎస్సీ వర్గాలు చెబుతున్నాయి.
