Intermediate Practical Exams : ఇంటర్మీడియట్‌ ప్రాక్టికల్ పరీక్షలు ఈసారి సీసీ కెమెరాల పర్యవేక్షణలో నిర్వహించాలని తెలంగాణ ఇంటర్‌బోర్డు నిర్ణయించింది. ఇప్పటివరకు విద్యార్థులకు వచ్చిన మార్కులను బోర్డు పోర్టల్‌లో నమోదు చేసే ప్రక్రియ మాత్రమే సీసీ కెమెరా నిఘా నీడలో జరిగేది. ఈ సారి ఇంటర్ ప్రాక్టికల్స్ నిర్వహించే సుమారు 900 ల్యాబుల్లోనూ సీసీ కెమెరాలను ఏర్పాటు చేస్తామని ఇంటర్‌బోర్డు సెక్రటరీ కృష్ణ ఆదిత్య స్పష్టంచేశారు. అంతేకాకుండా ఇంటర్ పరీక్షల నిర్వహణలో పలు కొత్త సంస్కరణలు అమలు పరుచనున్నారు.
2024 ఫిబ్రవరి 3 నుంచి 22వ తేదీ వరకు ప్రాక్టికల్ పరీక్షలు, మార్చి 5 నుంచి ఫైనల్ రాత పరీక్షలు జరగనున్నాయి. చాలా ప్రైవేటు, కార్పొరేటు కళాశాలల్లో యాజమాన్యం ప్రాక్టికల్స్ జరపడం లేదు. అయినా ఎక్కువ శాతం మంది విద్యార్థులకు అధిక మార్కులు వస్తున్నాయి. అధికారులను ఆయా యాజమాన్యాలు లంచాలిచ్చి మచ్చిక చేసుకుంటున్నాయనే ఆరోపణలున్నాయి. అయితే ముందుగా సమాచారం ఇచ్చి అప్రమత్తం చేయకుండా సీసీ కెమెరాల నీడలో ప్రాక్టికల్స్ నిర్వహిస్తే విద్యార్థులు గందరగోళానికి గురయ్యే ప్రమాదం ఉందని పలువురు అధ్యాపకులు భావిస్తున్నారు.
లీకైతే వెంటనే గుర్తించేలా క్యూఆర్ కోడ్ : ఈసారి కొత్తగా ప్రశ్నపత్రాలపై క్యూఆర్ కోడ్‌తోపాటు సీరియల్‌ నంబరును ఇంటర్ విద్యాశాఖ బోర్డు ముద్రించనుంది. ఒకవేళ ఏదైనా పరీక్ష కేంద్రం నుంచి ప్రశ్నపత్రం లీకైతే ఆ సీరియల్‌ నంబరు ఆధారంగా వెంటనే ఎక్కడ లీకైందో గుర్తించేలా ఈ ఏర్పాటు చేశారు. క్యూఆర్ కోడ్‌లో సైతం వివరాలు పొందుపరచనున్నారు. హాల్‌టికెట్లను గతంలో పరీక్ష వారం నుంచి పది రోజులు ఉందనగా విడుదల చేసేవారు. కానీ ఈ సారి మాత్రం నాలుగు వారాల ముందే జారీ చేయనున్నారు.
అంటే ఫిబ్రవరి మొదటి వారంలోనే హాల్టికెట్ను పొందొచ్చు. హాల్‌టికెట్లు జారీ కాగానే విద్యార్థుల మొబైల్‌ నంబర్లకు మెసెజ్ అందుతుంది. ఈసారి మరింత కొత్తగా విద్యార్థుల నుంచి రెండు ఫోన్ నంబర్లు తీసుకొని రెండింటికీ మెసేజ్‌లు పంపనున్నారు. ఏదైనా సమస్య వస్తే విద్యార్థులు ఫోన్లు చేసి వారి సమస్యలను నివృత్తి చేసుకోవడానికి వీలుగా హాల్‌టికెట్లపై హైదరాబాద్‌ ఇంటర్‌బోర్డు కార్యాలయంలో ఉండే పరీక్షల కంట్రోలర్‌తోపాటు ఆయా జిల్లాల ఇంటర్ విద్యాధికారు(డీఐఈఓ)ల మొబైల్‌ నంబర్ల కూడా ముద్రించనున్నారు.
మరికొన్ని మార్పులు :
- ప్రతి పరీక్ష కేంద్రంలో 4 నుంచి 8 సీసీ కెమెరాలు ఏర్పాటు చేయనున్నారు. కాకపోతే అవి ఎక్జామ్ హాల్లో ఉండవు. ప్రశ్నపత్రాలు తెరిచే గది, కారిడార్, చుట్టుపక్కల ప్రాంతాలను పరిశీలించడానికి ఉంటాయి.
- క్వశ్చన్ పేపర్స్ తడవకుండా ఈసారి బండిళ్లను లోడెన్సిటీ పాలీఇథలిన్‌(ఎల్‌డీపీఈ) బ్యాగుల్లో పంపించనున్నారు. ఒకవేళ వాటిని మధ్యలో విప్పి తెరచి చూస్తే మళ్లీ అతకించాలన్నా అతకవు. దీంతో పేపర్ లీకైనట్లు గుర్తించవచ్చు.
- ఇప్పటివరకు ప్రశ్నపత్రాల బండిళ్లను ఉమ్మడి జిల్లా కేంద్రాల్లోని స్ట్రాంగ్‌రూమ్‌లకు పంపేవారు. అక్కడి నుంచి పరీక్షలకు 5 రోజుల ముందు ఆయా పోలీసుస్టేషన్లకు తరలించేవారు. ఈ సారి మాత్రం అన్ని జిల్లా(33) కేంద్రాలకు పంపనున్నారు.
