'జై భీమవరం రాజులు' - ప్రభాస్ పంపిన భోజనం తిని కుంభకర్ణుడిలా పడుకున్న జగ్గూ భాయ్

భీమవరంలో షూటింగ్​లో జగపతి బాబు - భోజనం పంపిన ప్రభాస్

Jagapathi Babu Bhimavaram Rajula Food : రెబల్ స్టార్ ప్రభాస్ (Prabhas) పెట్టే ఫుడ్ గురించి కేవలం తెలుగు సినిమా ఇండస్ట్రీ మాత్రమే కాదు, పాన్ ఇండియా లెవల్​లో ప్రతి ఒక్కరూ కథలు కథలుగా చెప్పుకుంటూనే ఉంటారు. ఇప్పటికే చాలామంది నటీనటులు ప్రభాస్ పెట్టే ఫుడ్ గురించి చెప్పారు. ఇప్పుడు ఆ లిస్ట్​లో జగపతి బాబు కూడా చేరిపోయారు. తాజాగా ఆయన సామాజిక మాధ్యమం 'ఎక్స్'లో ఓ వీడియో షేర్ చేశారు. అందులో చాలా రకాల ఐటమ్స్ ఉన్నాయి. వాటిని బకాసురుడిలా తిని, కుంభకర్ణుడిలా పడుకున్నానంటూ జగ్గూ భాయ్ (Jagapathi Babu) తెలిపారు.

ప్రభాస్ పెట్టే ఫుడ్​తో ఈ బాబు బలి: దీనికి 'వివాహ భోజనంబు వింతైన వంటకంబు, వియ్యాలవారి విందు ఓ హో హో నాకే ముందు' అంటూ ఆ భోజనానికి సెట్ అయ్యేలా ఓ పాటను సైతం యాడ్ చేశారు. అంతే కాకుండా మరికొన్ని కామెంట్స్ కూడా ప్రభాస్ గురించి రాసుకొచ్చారు. ఇది ప్రభాస్ ప్రమేయం లేకుండా జరిగిందని, దీని గురించి ఎవ్వరూ చెప్పొద్దని అన్నారు. ఎందుకంటే ఎవరైనా సరే చెప్తే తను పెట్టే ఫుడ్​తో ఈ బాబు బలి అంటూ సరదాగా కామెంట్స్ చేశారు. అదీ బాహుబలి లెవల్ అంటూ కొనియాడారు. ఆ ఫుడ్​ని పందికొక్కులాగా తిని, ఆంబోతులాగా పడుకుంటున్నానంటూ ప్రభాస్ గురించి జగ్గూబాయ్ చెప్పుకొచ్చారు.

Vivaaha bojanambu..idhi prabhasa premayam Leykunda jarigindhi. evaru cheppaddhu. Chepthe ee Tanu petey food tho ee babu bali…
Adhee baahubali level.. pandikoku laaga thini ambothlaaga Padukuntunanu. pic.twitter.com/64TPjI46L1

— Jaggu Bhai (@IamJagguBhai) December 9, 2024

జై భీమవరం రాజులు: అంతే కాకుండా భీమవరం రాజులను సైతం జగపతి బాబు గుర్తు చేసుకున్నారు. భీమవరం రాజులు పెట్టిన ఫుడ్ తిన్నాక వారిని కొనియాడకుండా ఉంటారా చెప్పండి. జై భీమవరం, జై రాజులు, జై బాహుబలి, జై ప్రభాస్ అంటూ భీమవరం రాజులను ఆకాశానికి ఎత్తేశారు. ఇంతకీ జగ్గూ భాయ్ భీమవరం ఎందుకు వెళ్లారంటే, ఓ షూటింగ్ కోసం అని చెప్పారు. ప్రభాస్​తో కలిసి జగపతి బాబు చేసిన సలార్ సూపర్ హిట్ అయిన విషయం తెలిసిందే. సలార్ చిత్రంలో జగపతి బాబు రాజమన్నార్ పాత్రలో నటించారు.

అభిమానుల ఫన్నీ కామెంట్స్: ఇలాంటివి చూసినప్పుడే "ప్రభాస్ ఫ్రెండ్ లిస్టులో నేను ఎందుకు లేనా అని అనిపిస్తుంటుంది" అంటూ ఆయన అభిమానులు ఫన్నీగా కామెంట్స్ చేస్తున్నారు. "ఎవరైనా కొట్టి చంపేస్తారు, ఈయన ఏంటీ పెట్టి చంపేలా ఉన్నాడు" అంటూ మీమ్స్ క్రియేట్ చేసి సోషల్ మీడియాలో ఈ వీడియో తెగ వైరల్ చేస్తున్నారు.