Student Dies OF Food Poison in Telangana : పాఠశాలలో పాఠాలు నేర్చుకోవాల్సిన చిన్నారి విషాహారం వల్ల మృత్యువాత పడింది. బాగా చదువుకొని ఉన్నత స్థాయికి చేరుతుందన్న కన్నవారి ఆశలు ఆవిరయ్యాయి. అక్టోబర్‌ 30న తెలంగాణలోని వాంకిడి ఆశ్రమ పాఠశాలలో సహచర విద్యార్థులతో భోజనం చేసి శైలజ (16) అనే విద్యార్థిని 21 రోజుల పాటు ఆసుపత్రిలో చికిత్స పొందుతూ మృత్యువాత పడింది. కళ్ల ముందే కన్న కుమార్తె చనిపోవడంతో ఆ తల్లి పెట్టిన రోదన ఆకాశాన్నంటింది. విద్యార్థిని మృతికి ప్రభుత్వ నిర్లక్ష్యమే కారణం అంటూ విపక్ష నేతలు నిప్పులు చెరుగుతున్నారు.
Gurukul Student Sailaja Died at NIMS Hospital : హైదరాబాద్ నిమ్స్‌లో చికిత్స పొందుతూ తెలంగాణలోని కుమురం భీం జిల్లా వాంకిడి ఆశ్రమ పాఠశాల విద్యార్థిని శైలజ మృతి చెందింది. అక్టోబర్‌ 30న వాంకిడి ఆశ్రమ పాఠశాలలో తోటి విద్యార్థులతో భోజనం చేసిన శైలజ అస్వస్థతకు గురైంది. పలువురు చిన్నారులను సమీప ప్రభుత్వ ఆస్పత్రుల్లో చేర్పించి వైద్యం అందించారు. మిగతా వారు కోలుకున్నా శైలజ పరిస్థితి విషమించడంతో నిమ్స్‌కి తరలించారు. 21 రోజుల పాటు వెంటిలేటర్‌పై చికిత్స పొందుతూ విద్యార్థిని మృత్యువాత పడింది. మృతదేహానికి గాంధీ ఆసుపత్రిలో పోస్టుమార్టం పూర్తి చేశారు. గాంధీ ఆసుపత్రి వద్ద భారీ ఎత్తున బందోబస్తును ఏర్పాటు చేసి మృతదేహాన్ని స్వస్థలానికి తరలించారు. చిన్నారి మృతితో కుటుంబ సభ్యులు శోక సంద్రంలో మునిగిపోయారు. తన కుమార్తె పరిస్థితి మరొకరికి కలుగకుండా చూడాలని ఆ తల్లి పెట్టిన కన్నీరు అందరినీ కలిచివేసింది.
ఆ వంటకం తిని మహిళ మృతి - మరో 50 మంది ఆస్పత్రికి - నందినగర్లో దారుణం
విచారణ చేపట్టిన అధికారులు : బాలికలు అస్వస్థతకు గురై దాదాపు నెల రోజులు గడుస్తున్నా ఇప్పటి వరకూ అధికారులు కారణాలను వెల్లడించలేదు. ఈ ఘటన జరిగిన మరుసటి రోజు విచారణలో భాగంగా ఆహార పదార్థాల నమూనాలు సేకరించి అన్ని బాగున్నట్లు నివేదిక అందించారు. విద్యార్థినులు ఇంటి నుంచి తెచ్చుకున్న తినుబండారాల వల్లే అనారోగ్యానికి గురయ్యారంటూ అధికారులు చేతులు దులిపేసుకున్నారనే వాదనలూ వినిపించాయి. ఘటన జరిగిన రోజే విచారణ చేపడితే బాగుండేదని విద్యార్థినుల తల్లిదండ్రులు అంటున్నారు. కలుషితానికి గల కారణాలను అధికారులు ఇప్పటికీ పూర్తి స్థాయిలో చెప్పకపోవడంపై అనుమానాలు వ్యక్తం చేస్తున్నారు.
ప్రభుత్వంపై కేటీఆర్ విమర్శలు : వాంకిడి గురుకుల విద్యార్థిని మృతికి రేవంత్‌ రెడ్డి ప్రభుత్వమే కారణమని మాజీ మంత్రులు కేటీఆర్, హరీశ్‌రావు ఆగ్రహం వ్యక్తం చేశారు. పెద్ద చదువులు చదివేందుకు గురుకులాల్లో చేరిస్తే పేద గిరిజన బిడ్డను బలి తీసుకున్నారని నిప్పులు చెరిగారు. విద్యాశాఖ మంత్రి లేక విద్యార్థులకు తిప్పలు తప్పడం లేదని, ముఖ్యమంత్రికి పేదల పిల్లల బాధలు పట్టవంటూ కేటీఆర్ విమర్శలు గుప్పించారు.
రూ.50 లక్షల ఎక్స్‌గ్రేషియా ఇవ్వాలి : సహచర విద్యార్థులతో పాఠశాలలో పాఠాలు నేర్చుకోవాల్సిన చిన్నారి విషాహారంతో కన్నుమూయటం కలిచివేసిందని హరీశ్‌రావు ఆవేదన వ్యక్తం చేశారు. గురుకులంలో నాణ్యత లేని భోజనం పెట్టడం ఒక పాపమైతే అస్వస్థతకు గురైన విద్యార్థులకు సకాలంలో మెరుగైన చికిత్స అందించకపోవడం మరో పాపమంటూ ఆగ్రహం వ్యక్తం చేశారు. ఆ గిరిజన విద్యార్థిని కుటుంబానికి అండగా ఉంటూ రూ.50 లక్షల ఎక్స్‌గ్రేషియా ఇవ్వాలని ప్రభుత్వాన్ని ఆయన డిమాండ్ చేశారు.
