Kohli Nitish Reddy : ఐపీఎల్ 2024లో చాలా మంది యంగ్‌ ప్లేయర్లు సత్తా చాటారు. కొందరిని మాజీ క్రికెటర్లు భారత భవిష్యత్తుగా అభివర్ణించారు. మహ్మద్ కైఫ్‌ ఓ ప్లేయర్‌ను ఉద్దేశించి, ‘మీరు ఈ ఆటగాడి పేరు మళ్లీ వింటారు. భవిష్యత్తులో చాలా సార్లు వింటారు.’ అని చెప్పాడు. అంత గొప్ప ప్లేయర్‌ ఎవరా? అని ఆలోచిస్తున్నారా? ఎవరో కాదు మన తెలుగు కుర్రాడు నితీశ్ రెడ్డి.
గత ఐపీఎల్‌లో సన్రైజర్స్ హైదరాబాద్ తరఫున నితీశ్ అదరగొట్టాడు. అటు బ్యాటింగ్, ఇటు బౌలింగ్‌లో సత్తా చూపించాడు. ఈ ఆల్ రౌండర్‌ తన ప్రదర్శనతో అందరినీ ఆకట్టుకున్నాడు. తాజాగా జాతీయ జట్టులో కూడా చోటు దక్కింది. కానీ దురదృష్టవశాత్తు గాయంతో జింబాబ్వే సిరీస్‌కు దూరమయ్యాడు. ఇప్పుడు ఓ ప్రత్యేక ఇంటర్వ్యూలో నితీశ్ తన కెరీర్‌, ఇన్‌స్పిరేషన్‌, లక్ష్యం గురించి మాట్లాడాడు.
- ప్రామిసింగ్ టాలెంట్
ఫాస్ట్ బౌలింగ్ ఆల్ రౌండర్‌గా భారత్ ఎక్కువగా హార్దిక్ పాండ్యాపై ఆధారపడుతుంది. అలాంటి నికార్సైన మరో ఆల్ రౌండర్‌ లేని లోటు చాలా సంవత్సరాలు కనిపించింది. ఐపీఎల్ 2024లో ఈ లోటును తీర్చే ఆటగాడు దొరికాడు. 2023లోనే నితీశ్ సన్రైజర్స్ హైదరాబాద్ (SRH)లో చేరినా, పెద్దగా అవకాశాలు రాలేదు. కానీ 2024లో వచ్చిన ఛాన్స్‌ను అతడు సద్వినియోగం చేసుకున్నాడు. అభిమానులు, కామెంటేటర్లు, మాజీ క్రికెటర్లు అందరితో శభాష్‌ అనిపించుకున్నాడు.
- సంచలన ఇన్నింగ్స్‌తో గుర్తింపు
ఐపీఎల్ 2024లో నితీశ్ 303 పరుగులు చేశాడు. రాజస్థాన్ రాయల్స్‌తో జరిగిన గ్రూప్ స్టేజ్ మ్యాచ్‌లో నితీశ్ తన పవర్‌ హిట్టింగ్‌తో అందరి దృష్టిని ఆకర్షించాడు. 42 బంతుల్లో 8 సిక్సర్లతో ఏకంగా 76 పరుగులు చేశాడు. టోర్నీలో నమోదైన సంచలన ఇన్నింగ్స్‌లలో ఇది కూడా ఒకటిగా నిలిచింది. ఈ సీజన్‌లో మొత్తం 13 ఓవర్లు బౌలింగ్ చేసిన అతడు, 11.62 ఎకానమీ రేటుతో మూడు వికెట్లు తీశాడు.
- బ్యాటర్గా మొదలైన కెరీర్‌
నితీశ్ కెరీర్‌ ప్రారంభంలో ఒక స్పెషలిస్ట్ బ్యాటర్. కానీ అవకాశాలు పొందాలంటే బౌలింగ్ స్కిల్స్‌ కూడా అవసరమని గ్రహించాడు. దీనిపై నితీశ్ మాట్లాడుతూ, ‘ప్రస్తుతం చాలా మంది నన్ను గుర్తుపడుతున్నారు. నాకు చాలా ఆనందంగా ఉంది. నేను బ్యాటర్గా కెరీర్‌ ప్రారంభించాను. కానీ ఆల్ రౌండర్‌గా మారడానికి నా బౌలింగ్‌ను మెరుగుపర్చాలని నిర్ణయించుకున్నాను. ఇందులో బెన్ స్టోక్స్, హార్దిక్ పాండ్యా ఆదర్శం.’ అని చెప్పాడు.
ఆల్‌రౌండర్‌పై ఉండే ఒత్తిడిని ఆస్వాదిస్తున్నట్లు నితీశ్ పేర్కొన్నాడు. ‘ఆల్ రౌండర్‌గా ఉండటం చాలా కష్టం. మనం బ్యాటింగ్, బౌలింగ్, ఫీల్డింగ్‌లో రాణించాలి. ఒత్తిడి నాకు మెరుగైన ప్రదర్శన చేయడానికి సహాయపడుతుంది’ అని చెప్పాడు.
- కోహ్లీ ఆదర్శం
21 ఏళ్ల నితీశ్ రెడ్డి, భారత స్టార్ క్రికెటర్‌ విరాట్ కోహ్లీని ఆరాధిస్తూ పెరిగాడు. ఐపీఎల్ 2024లో విరాట్ కోహ్లితో ఉన్న ఓ చిన్న జ్ఞాపకాన్ని షేర్‌ చేసుకున్నాడు. ‘నేను విరాట్ భాయ్‌తో పెద్దగా మాట్లాడలేదు. ఐపీఎల్‌లో మొదటి సంవత్సరం నేను అతనితో ఆడినప్పుడు, నాకు అప్పుడు బ్యాటింగ్ అవకాశం రాలేదు. బౌలింగ్ చేసే అవకాశం మాత్రమే వచ్చింది. 2024లో నేను బాగా రాణిస్తున్నప్పుడు, ఆర్సీబీతో మ్యాచ్‌ జరిగింది. నువ్వు బాగా ఆడుతావని కోహ్లీ నాకు చెప్పాలని మనసులో ఉండేది. ఆ మ్యాచ్‌లో 270 పరుగులు చేశాం. కానీ నాకు బ్యాటింగ్ ఛాన్స్‌ రాలేదు. మ్యాచ్‌ అయ్యాక షేక్‌ హ్యాండ్‌ ఇస్తున్నప్పుడు, కోహ్లీ నన్ను గుర్తుపట్టాడు. హాయ్ నితీశ్, ఎలా ఉన్నావు? అని అడిగాడు. టోర్నమెంట్‌లో అతను నా పేరును గుర్తుంచుకుంటాడని నేను ఊహించలేదు. నిజంగా విరాట్ భాయ్ నా ఆటను చూడటం, గుర్తు పట్టడం నన్ను చాలా మోటివేట్‌ చేసింది.’ అని తెలిపాడు.
- పాట్ కమ్మిన్స్ సపోర్ట్‌
కమ్మిన్స్ గురించి చెబుతూ, ‘కమిన్స్ ప్రశాంతంగా, కంపోజ్డ్‌గా ఉంటాడు. ఎప్పుడూ కూల్‌గా ఉంటాడు, స్ట్రాటజీల గురించి చాలా ఆలోచిస్తాడు. అది చాలా ఇన్‌స్పైరింగ్‌గా ఉంటుంది.’ అని పేర్కొన్నాడు.
- ఐపీఎల్ 2024 హార్ట్‌బ్రేకింగ్ ఫైనల్
తన పుట్టిన రోజు నాడే, ఐపీఎల్ 2024 ఫైనల్ జరిగిందని నితీశ్ పేర్కొన్నాడు. ‘అది నా మొదటి ఫైనల్. మేం ఓడిపోయాం. నేను చాలా నిరాశకు గురయ్యాను. కానీ ఈ సీజన్‌ను నేను ఎప్పటకీ గుర్తుంచుకుంటాను’ అన్నాడు.
- కొత్త ఆరంభాలు
ఐపీఎల్ 2024 ఫైనల్ ఓడిపోయినా, నితీశ్ రెడ్డి కెరీర్‌కు కీలక మలుపు అయింది. అతను ఇప్పుడు పూమా కంపెనీతో అసోసియేట్‌ అయ్యాడు. విరాట్ కోహ్లీ, మహ్మద్ షమీ తర్వాత ఈ అవకాశం అందుకున్నాడు. ‘పూమాతో భాగస్వామి కావడం చాలా మంచి అనుభూతి. ఈ కుటుంబంలో భాగమైనందుకు సంతోషంగా ఉంది’ అన్నాడు.
చివరి నిమిషంలో గాయం కారణంగా జింబాబ్వే సిరీస్‌కి దూరమైనా, నితీశ్ రెడ్డి మాత్రం ఆశాజనకంగానే ఉన్నాడు. ‘భారత్‌కు ప్రాతినిధ్యం వహించడం ప్రతి క్రికెటర్‌ లక్ష్యం. నేను ఫిట్‌నెస్‌ను తిరిగి పొందడం. తదుపరి అవకాశాన్ని చేజిక్కించుకోవడంపై దృష్టి పెట్టాను.’ అన్నాడు.
ఇక టీమ్ఇండియా టార్గెట్‌ అదే - ఇప్పటికే రెండు సార్లు మిస్‌! - ICC World Test Championship
రోహిత్కు ముంబయి ఇండియన్స్ కెప్టెన్సీ తిరిగి ఇచ్చేస్తారా? - Rohith Sharma Nita Ambani
