Harmanpreet Kaur Captaincy : దుబాయ్ వేదికగా జరుగుతున్న ఐసీసీ మహిళల టీ20 ప్రపంచకప్ 2024లో భారత జట్టు సెమీ ఫైనల్కు చేరలేకపోయింది. పేలవమైన ప్రదర్శనతో గ్రూప్ దశలోనే ఇంటిముఖం పట్టింది. ఫలితంగా ఐసీసీ ఈవెంట్లలో భారత మహిళల జట్టుకు కప్ అందని ద్రాక్షగానే మిగిలింది. అంతేగాక ఈ సారి సెమీస్కు కూడా చేరుకోకపోవడం వల్ల బీసీసీఐ చర్యలు చేపట్టాలని నిర్ణయించుకున్నట్లు సమాచారం. టీమ్ ఇండియా మహిళల జట్టు కెప్టెన్ హర్మన్ ప్రీత్ కౌర్పై వేటుకు బీసీసీఐ సిద్ధమైనట్లు తెలుస్తోంది.
హర్మన్ కెప్టెన్సీపై నిర్ణయం - హర్మన్ ప్రీత్ కెప్టెన్సీ భవితవ్యంపై సెలక్షన్ కమిటీ, ప్రధాన కోచ్ అమోల్ ముజుందార్లతో బీసీసీఐ మరికొద్ది రోజుల్లో సమావేశం కానుందని తెలిసింది. ఈ మీటింగ్లో హర్మన్ ప్రీత్ కెప్టెన్సీపై ఓ నిర్ణయం తీసుకోనున్నట్లు సమాచారం. అలాగే 2025లో భారత్లోని మహిళల వన్డే ప్రపంచ కప్ జరగనుంది. ఈ మెగాటోర్నీలో భారత్ విజేతగా నిలిచేలా కార్యచరణ సిద్ధం చేయాలని బీసీసీఐ భావిస్తోంది. ఈ క్రమంలో హర్మన్ ప్రీత్ స్థానంలో మరొకరికి కెప్టెన్సీ బాధ్యతలను అప్పగించాలని యోచిస్తున్నట్లు తెలుస్తోంది.
వేటు తప్పదా? - 2016లో టీ20 వరల్డ్ కప్లో భారత మహిళల జట్టు సెమీఫైనల్కు వెళ్లలేకపోయింది. ఈ దశలో మిథాలీ రాజ్ నుంచి టీ20 జట్టు పగ్గాలను హర్మన్ ప్రీత్ కౌర్ అందుకుంది. 2020 టీ20 ప్రపంచకప్లో జట్టును ఫైనల్కు చేర్చింది. అయితే దుబాయ్ వేదికగా జరుగుతున్న తాజాగా జరుగుతున్న టీ20 ప్రపంచకప్లో జట్టును సెమీస్కు చేర్చడంలో విఫలమైంది. అందుకే ఆమెపై వేటు పడనున్నట్లు తెలుస్తోంది.
'ప్లేయర్ గా ఆమె ఢోకా లేదు' - హర్మన్ ప్రీత్ను కెప్టెన్సీ నుంచి తప్పించినా జట్టులో ప్లేయర్గా ఆమె స్థానానికి ఢోకా లేదు. అయితే భారత మహిళా జట్టు వైస్ కెప్టెన్ స్మృతి మంధానకు జట్టు పగ్గాలు అప్పగించి, వన్డే వరల్డ్ కప్నకు టీమ్ ఇండియాను సిద్ధం చేసే యోచనలో బీసీసీఐ ఉన్నట్లు తెలుస్తోంది. "హర్మన్ ప్రీత్నే కెప్టెన్గా కొనసాగించాలా? లేదా కొత్తవారికి బాధ్యతలు అప్పగించాలా? అనే విషయంపై బీసీసీఐ కచ్చితంగా చర్చిస్తుంది. జట్టు కోరుకున్న ప్రతిదాన్ని బీసీసీఐ అందించింది. జట్టును నడిపించేందుకు కొత్త సారథి అవసరమయ్యే సమయం ఆసన్నమైందని భావిస్తున్నాం. హర్మన్ ప్రీత్ జట్టులో ప్లేయర్గా ఉంటారు." అని బీసీసీఐ వర్గాలు తెలిపాయి.
కివీస్తో తొలి టెస్ట్లో ఆగని వర్షం - సబ్‌ఎయిర్‌ సిస్టమ్‌ కాపాడుతుందా?
