వరల్డ్​కప్​లో యంగ్ ప్లేయర్లు- అందరి ఫోకస్ వారిపైనే- మెరిసేది ఎవరో? - T20 World Cup 2024

T20 World Cup Youngsters: 2024 టీ20 ప్రపంచకప్​లో ఆయా దేశాల్లోని పలువురు యువ ఆటగాళ్లపై ప్రత్యేక దృష్టి ఉండనుంది. మరి వారెవరెవరో చూద్దాం!

T20 World Cup Youngsters: 2024 టీ20 వరల్డ్​కప్ మరో రెండు రోజుల్లో ప్రారంభం కానుంది. ఇప్పటివరకు జరిగిన 8 ఎడిషన్లలో అనేక మంది ఆటగాళ్లు ప్రపంచానికి పరిచయం అయ్యారు. ముఖ్యంగా ప్రతి ఎడిషన్​లో ఆయా జట్లనుంచి పలువురు యంగ్ ప్లేయర్లు వెలుగులోకి వస్తుంటారు. ఇప్పటి స్టార్ ఆటగాళ్లు రోహిత్ శర్మ, విరాట్ కోహ్లీ, బాబర్ అజామ్, కర్లోస్ బ్రాత్​వైట్ తదితరులు అలా పొట్టికప్ టోర్నీలో రాణించి స్టార్లుగా ఎదిగినవారే. ఈ నేపథ్యంలో ఈసారి కూడా పలువురు ఆటగాళ్లపై స్పెషల్ ఫోకస్ ఉండనుంది. మరి వారెవరో తెలుసా?

యశస్వీ జైస్వాల్: 21ఎళ్ల టీమ్ఇండియా యంగ్ బ్యాటర్ కెరీర్​లో తొలి టీ20 ప్రపంచకప్ ఆడనున్నాడు. కెప్టెన్ రోహిత్ శర్మతో ఇన్నింగ్స్​ ఓపెనింగ్ చేసే అవకాశం దాదాపు జైశ్వాల్​కే దక్కుతుంది. గతేడాది ఐపీఎల్​లో రాణించిన జైశ్వాల్​కు టీమ్ఇండియా తరఫున అరంగేట్రం చేసే ఛాన్స్ వచ్చింది. దీంతో అంతర్జాతీయ టీ20ల్లో 16 ఇన్నింగ్స్​లో 502 పరుగులు చేశాడు. కాగా, 2024 ఐపీఎల్​లోనూ 435 పరుగులతో అదరగొట్టిన జైశ్వాల్, ప్రపంచకప్​లో రాణిస్తే భారత్​కు మంచి ఆరంభాలు దక్కుతాయి.

ట్రిస్టన్ స్టబ్స్: సౌతాఫ్రికా యంగ్ ప్లేయర్ స్టబ్స్ అంతర్జాతీయ క్రికెట్​లో పెద్దగా ఇంపాక్ట్ చూపలేదు. అయతే రీసెంట్​గా ముగిసిన ఐపీఎల్​లో మాత్రం స్టబ్స్ దిల్లీ క్యాపిటల్స్​కు మిడిలార్డర్​లో బలంగా నిలిచాడు. 13 ఇన్నింగ్స్​లో 378 పరుగులతో సత్తా చాటాడు. దీంతో సౌతాఫ్రికా ఈ కుర్రాడిని పొట్టికప్పు జట్టుకు ఎంపికచేసింది. ఇక ఐపీఎల్ ఫామ్ కొనసాగిస్తే, సఫారీలకు ఛేజింగ్​లో కీలక ప్లేయర్​గా మారే అవకాశం ఉంది.

కామెరూన్ గ్రీన్: ఆస్ట్రేలియా కుర్రాడు గ్రీన్ ఇప్పటివరకు అంతర్జాతీయ టీ20లో పెద్దగా రాణించలేదు. కానీ, 2024 ఐపీఎల్​లో ఆర్సీబీ తరఫున ఆడిన గ్రీన్ 255 పరుగులుతో ఫర్వాలేదనిపించాడు. దూకుడైన బ్యాటింగ్​తోపాటు బౌలింగ్ చేయగల నైపుణ్యాలు ఉండడం గ్రీన్​కు కలిసొచ్చే అంశం. ఈ కారణంగానే గ్రీన్ ఆసీస్ జట్టుకు సెలెక్ట్ అయ్యాడు. ఒకవేళ తుదిజట్టులో స్థానం దక్కితే పవర్​ ప్లేలో గ్రీన్ ఇంపాక్ట్ చూపించే ఛాన్స్ ఉంది. అటు బౌలింగ్​లోనూ రాణించగలడు.

విల్ జాక్స్: 25ఏళ్ల ఇంగ్లాండ్ ఆల్​రౌండర్ విల్ జాక్స్ ఒక్కసారి క్రీజులో కుదురుకుంటే విధ్వంసం సృష్టించగలడు. ఇటీవల ముగిసిన ఐపీఎల్​లో గుజరాత్​తో మ్యాచ్​లో సాధించిన సెంచరీయే అందుకు ఉదాహరణ. ఆర్సీబీకి ప్రాతినిధ్యం వహించిన జాక్స్ ఈ మ్యాచ్​లో 50 నుంచి 100 పరుగుల మార్క్​ అందుకోవడానికి కేవలం 10 బంతులు తీసుకున్నాడు. దీంతో ఒక్కసారిగా జాక్స్ వెలుగులోకి వచ్చాడు. ఈ పొట్టికప్​లోనూ ఇంగ్లాండ్ ఈ యంగ్ ఆల్​రౌండర్​పై ఆశలు పెట్టుకుంది.