Rohit Sharma IPL Record: ముంబయి ఇండియన్స్ స్టార్ బ్యాటర్ రోహిత్ శర్మ ఐపీఎల్లో మరో రికార్డ్ సాధించాడు. ఐపీఎల్లో కోల్కతా నైట్రైడర్స్పై ఇప్పటికే 1000+ పరుగులు బాదిన రోహిత్, తాజాగా దిల్లీ క్యాపిటల్స్పై కూడా ఈ ఫీట్ నమోదు చేశాడు. ఆదివారం దిల్లీ క్యాపిటల్స్తో జరుగుతున్న మ్యాచ్లో రోహిత్ ఈ ఘనత అందుకున్నాడు. దిల్లీపై 34 ఇన్నింగ్స్ ఆడిన రోహిత్ 1000కి పైగా పరుగులు బాదాడు. అందులో 6 హాఫ్ సెంచరీలు ఉన్నాయి.
దీంతో ఐపీఎల్లో రెండు జట్లపై 1000కి పైగా పరుగులు సాధించిన మూడో బ్యాటర్గా నిలిచాడు. కాగా, ఇప్పటికే విరాట్ కోహ్లీ చెన్నై, దిల్లీపై, డేవిడ్ వార్నర్ పంజాబ్ కింగ్స్, కోల్కతా నైట్రైడర్స్ జట్లపై ఈ ఫీట్ సాధించారు. ఇక దిల్లీపై విరాట్ తర్వాత 1000 పరుగుల మార్క్ అందుకుంది హిట్మ్యానే.
ఇక ఈ మ్యాచ్లో ముంబయి నిర్ణీత 20 ఓవర్లలో 5 వికెట్ల నష్టానికి 234 పరుగుల భారీ స్కోర్ నమోదు చేసింది. రోహిత్ ముంబయికి అదిరిపోయే ఆరంభాన్నిచ్చాడు. తొలి ఓవర్ నుంచే దూకుడుగా ఆడిన రోహిత్ (49 పరుగులు 27 బంతుల్లో ; 6x4, 3x6) త్రుటిలో హాఫ్ సెంచరీ మిస్ చేసుకున్నాడు. మరో ఓపెనర్ ఇషాన్ కిషన్ (42 పరుగులు, 23 బంతుల్లో ; 4x4, 2x6) అదరగొట్టాడు. వీరిద్దరి ధాటికి పవర్ప్లేలో ముంబయి 75 పరుగులు చేసింది.
పవర్ప్లే తర్వాత వరుస ఓవర్లలో రోహిత్, సూర్య కుమార్ యాదవ్ (0) పెలివియన్ చేరారు. ఆ తర్వాత ఇషాన్ కూడా అక్షర్ బౌలింగ్లో క్యాచౌట్ అయ్యాడు. తిలక్ వర్మ కూడా (6) స్వల్ప స్కోర్కే వెనుదిరిగాడు. దీంతో కెప్టెన్ హార్దిక్ పాండ్య (39 పరుగులు, 33 బంతుల్లో) కాస్త నెమ్మదిగా ఆడి వికెట్ల పతనాన్ని అడ్డుకున్నాడు. ఇక చివరి 5 ఓవర్లలో మాత్రం ముంబయి బ్యాటర్లు టిమ్ డేవిడ్ (45 పరుగులు), రొమారియో షెపర్డ్ (39 పరుగులు, 10 బంతుల్లో) ఆకాశమే హద్దుగా చెలరేగిపోయారు. దీంతో ముంబయికి చివరి 30 బంతుల్లో 96 పరుగులు వచ్చాయి.
రాజస్థాన్ మ్యాచ్లో రోహిత్ శర్మనే భయపెట్టేసిన అభిమాని - IPL 2024 RR VS MI
