'అరే భాయ్ ఇక్కడ ఓ ఫీల్డర్​ను ఉంచు'- బ్యాటింగ్ చేస్తుండగా బంగ్లా కెప్టెన్​​కు పంత్ హెల్ప్​! - Pant Sets Fielding

Pant Sets Fielding For BAN : టీమ్ఇండియా బ్యాటర్ రిషబ్ పంత్ బంగ్లా జట్టు ఫీల్డింగ్ సెట్ చేయడానికి సూచనలు ఇచ్చాడు. అది కూడా అతడు క్రీజులో ఉండగానే. దీంతో ఈ వీడియో వైరల్​గా మారింది.

Pant Sets Fielding For BAN : భారత్‌ - బంగ్లాదేశ్‌ మధ్య జరుగుతున్న తొలి టెస్టులో శనివారం ఆసక్తికర సన్నివేశం జరిగింది. క్రీజులో ఉన్న టీమ్ఇండియా యంగ్ బ్యాటర్ రిషభ్ పంత్ కాసేపు బంగ్లాదేశ్​ ప్లేయర్‌గా మారిపోయాడు. తాను బ్యాటింగ్‌ చేస్తున్నానని మరిచిపోయాడో, లేక బంగ్లాదేశ్ కెప్టెన్​ను సరదాగా ఆట పట్టించాలని చూశాడో తెలీదు. కానీ, ఓ దశలో పంత్ బంగ్లా ఫీల్డింగ్ సెట్ చేశాడు. దీంతో నిమిషాల్లోనే ఈ వీడియో సోషల్ వైరల్​గా మారిపోయింది. మరి అక్కడ ఏమైందంటే?

టీమ్ఇండియా బ్యాటర్లు శుభ్​మన్ గిల్, రిషభ్ పంత్ మూడో రోజు తొలి సెషన్​ను ఘనంగా ఆరంభించారు. బంగ్లాదేశ్ బౌలర్లపై ఆధిపత్యం ప్రదర్శిస్తూ స్కోర్ బోర్డును పరుగులు పెట్టించారు. తొలుత మెహిదీ హసన్, ఆ తర్వాత పేసర్లను రంగంలోకి దింపినా గిల్ - పంత్ జోడీ అస్సలు తగ్గలేదు. ఈ క్రమంలో వీళ్ల జోరుకు అడ్డుకట్ట వేసేందుకు ఫీల్డింగ్ ఎలా సెట్ చేయాలో కెప్టెన్ షాంటోకి అర్థం అవ్వలేదు. వెంటనే పంత్ 'అరే భాయ్‌ లెగ్‌సైడ్‌ ఒక ఫీల్డర్‌ తక్కువయ్యాడు. ఇటువైపు ఒకరిని ఉంచు' అని మిడ్​వికెట్ వైపు చేయి చూపుతూ షాంటోతో అన్నాడు. ఈ మాటలు స్టంప్స్​ మైక్​లో రికార్డ్ అయ్యాయి.

అయితే షాంటో కూడా పంత్ సూచించినట్లు ఫీల్డర్​ను సెట్ చేయ్యడం ఇక్కడ విశేషంగా మారింది. దీంతో ఒక్కసారిగా కామెంటర్లు కూడా నవ్వుకున్నారు. 'గతంలో ధోనీ కూడా బంగ్లాతో మ్యాచ్​లో ఇలాగే చేశాడు', 'టీమ్ఇండియా ఈ మ్యాచ్​ను వార్మప్​లా భావిస్తుంది', 'ఎంటర్టైన్​ చేయడంలో పంత్ ఎప్పుడూ ముందుంటా' అంటూ వీడియో చూసిన నెటిజన్లు కామెంట్ చేస్తున్నారు.

Always in the captain’s ear, even when it’s the opposition’s! 😂👂

Never change, Rishabh Pant! 🫶🏻#INDvBAN #IDFCFirstBankTestSeries #JioCinemaSports pic.twitter.com/PgEr1DyhmE

— JioCinema (@JioCinema) September 21, 2024

ఇక ఈ మ్యాచ్​లో పంత్ సెంచరీతో ఆకట్టుకున్నాడు. దాదాపు 20 నెలల తర్వాత టెస్టుల్లో రీ ఎంట్రీ ఇచ్చిన పంత్‌ (109 పరుగులు: 128 బంతుల్లో 13 ఫోర్లు, 4 సిక్స్‌లు) తన సత్తా ఏంటో మరోసారి నిరూపించాడు. కాగా, టెస్టుల్లో పంత్​కు ఇది 6వ శతకం. ఈ నేపథ్యంలో మాజీ క్రికెటర్ ఎమ్ఎస్ ధోనీ సెంచరీల రికార్డు సమం చేశాడు.